ଲେବାନନ୍: ପ୍ଲାଷ୍ଟିକ୍ ବ୍ୟବହାର ଯୋଗୁ କେବଳ ଭାରତ ନୁହେଁ, ସମଗ୍ର ବିଶ୍ୱ ପ୍ରତି ଏହା ବିପଦ ସୃଷ୍ଟି କରିଚାଲିଛି। ପ୍ରତ୍ୟେକ ଦେଶର ସରକାର ଏହାକୁ ସମ୍ପୂର୍ଣ୍ଣ ରୋକିବା ପାଇଁ ଜୋର୍ଦାର ପ୍ରୟାସ ବି ଚଳାଇଛନ୍ତି। ଏହି ଅଭିଯାନରେ ସାମିଲ ହୋଇଛି ଉତ୍ତର ଲେବାନନ୍। ପ୍ଲାଷ୍ଟିକ୍ ବନ୍ଦ କରିବାକୁ ଏହି ଦେଶ ଏକ ଅଭିନବ ପ୍ରୟାସ ଆରମ୍ଭ କରିଛି। ଏଠାରେ ୧ ଲକ୍ଷ ୨୦ ହଜାର ପ୍ଲାଷ୍ଟିକ୍ ବୋତଲ ବ୍ୟବହାର କରାଯାଇ ୨୮.୫ ମିଟର ଲମ୍ବର ଏକ କ୍ରିସ୍ମାସ ଟ୍ରି’ ତିଆରି କରାଯାଇଛି। ଏହାକୁ ଗିନିଜ୍ ଓ୍ବାଲର୍ଡ ରେକର୍ଡରେ ସ୍ଥାନ ଦେବାକୁ ଚେଷ୍ଟା ଜାରିରହିଛି।
ଉତ୍ତର ଲେବାନନ୍ର ଚେକ୍କା ଗାଁରେ ଏପରି ଏକ ଭିନ୍ନ କ୍ରିସ୍ମାସ ଟ୍ରି’ ଦେଖିବାକୁ ମିଳିଛି। ଏହାକୁ ସମସ୍ତ ଗ୍ରାମବାସୀ ମିଶି ତିଆରି କରିଛନ୍ତି। ଗ୍ରାମବାସୀ କୁହନ୍ତି, ଏହା ବିଶ୍ୱର ସବୁଠାରୁ ବଡ଼ କ୍ରିସ୍ମାସ ଟ୍ରି’, ଯାହା ଖୁବ୍ଶୀଘ୍ର ଗିନିଜ୍ ରେକର୍ଡରେ ସ୍ଥାନ ପାଇବାକୁ ଯାଉଛି। ଏହାର ମୁଖ୍ୟ କ୍ୟାରୋଲିନ୍ ଛେବିଟିନି କୁହନ୍ତି, ଏହି ଟ୍ରି ବିଶ୍ୱର ସମସ୍ତ ଲୋକଙ୍କୁ ପ୍ରଦୂଷଣରୁ ସୁରକ୍ଷିତ ରଖିବା ପାଇଁ ବାର୍ତ୍ତା ଦେବ। ଟ୍ରି’ଟିକୁ ତିଆରି କରିବା ପାଇଁ ୬ ମାସ ସମୟ ଲାଗିଛି। ଗ୍ରାମବାସୀ ସୋସିଆଲ ମିଡିଆ ମାଧ୍ୟମରେ ବୋତଲ ସଂଗ୍ରହ କରିବାକୁ ନିବେଦନ କରିଥିଲେ। ଲୋକେ ମଧ୍ୟ ଧୀରେ ଧୀରେ ଏଥିରେ ସହଯୋଗ କରିଥିଲେ। ଯେଉଁଥିପାଇଁ ଏହା ସମ୍ଭବ ହୋଇପାରିଛି। କ୍ୟାରୋଲିନ୍ କୁହନ୍ତି, ଏହି ଟ୍ରି’କୁ ଲୋକଙ୍କ ଦେଖିବା ଲାଗି ଦେଢ଼ ମାସ ରଖାଯିବ। ଏହା ପରେ ବୋତଲର ରିସାଇକ୍ଲିଂ କରାଯିବ।
