ବନ୍ତଳା,୧୯ା୧୨(ଡି.ଏନ.ଏ.)- ଅନୁଗୋଳ ଜିଲା ସାତକୋଶିଆ ବ୍ୟାଘ୍ର ଅଭୟାରଣ୍ୟର ରାଇଗୁଡା ରେଞ୍ଜ ଏନକ୍ଲୋଜର ମଧ୍ୟରେ ଥିବା ବାଘୁଣୀ ସୁନ୍ଦରୀ ସହ ଲଢ଼େଇ କରିବାକୁ ତୟାର ହେଉଛି ପୁରୁଣା ବାଘୁଣୀ। ଅଭୟାରଣ୍ୟରେ ସ୍ଥିତି ଜାହିର ତଥା ନିଜ ସୀମା ନିର୍ଦ୍ଧାରଣ ପାଇଁ ଅଧିକାଂଶ ଦିନ ପୁରୁଣା ବାଘୁଣୀ ଏନ୍କ୍ଲୋଜର ନିକଟକୁ ଆସି ଝାମ୍ପ ମାରୁଥିବା ବେଳେ ସୁନ୍ଦରୀ ମଧ୍ୟ ପାଲଟା ଜବାବ ଦେଉଛି। ଫଳରେ ଏନ୍କ୍ଲୋଜରର ତାର ଜାଲି ଦୋହଲି ଯାଉଛି। ଦୁଇ ବାଘୁଣୀଙ୍କ ମଧ୍ୟରେ ଏପରି ଲଢ଼େଇ ସ୍ଥିତି ସିସିଟିଭିରେ ଦେଖାଯିବା ପରେ ଏହାକୁ ଏଡ଼ାଇବା ପାଇଁ ପ୍ରୟାସ କରାଯାଉଥିବା ବନ ବିଭାଗ ପକ୍ଷରୁ ସୂଚନା ଦିଆଯାଇଛି।
ପ୍ରକାଶ ଯେ, ମଣିଷ ମାରିବା ପରଠାରୁ ବାଘୁଣୀ ସୁନ୍ଦରୀକୁ ୨୦୧୮ ନଭେମ୍ବର ୬ରୁ ରାଇଗୁଡାସ୍ଥିତ ଏନକ୍ଲୋଜରରେ ରଖାଯାଇଛି। ତେବେ ବ୍ୟାଘ୍ର ଅଭୟାରଣ୍ୟ ମଧ୍ୟରେ ପୂର୍ବରୁ ଥିବା ପୁରୁଣାବାଘୁଣୀ ଅଧିକାଂଶ ଦିନ ଏନକ୍ଲୋଜର ନିକଟକୁ ଆସି ସୁନ୍ଦରୀ ସହ ଲଢ଼େଇ ପାଇଁ ଝାମ୍ପ ମାରୁଥିବା ଦେଖାଯାଉଛି। ଅପରାହ୍ନ ୫ଟାରୁ ବିଳମ୍ବିତ ରାତି ଯାଏ ପୁରୁଣା ବାଘୁଣୀ ଏନ୍କ୍ଲୋଜର ମଧ୍ୟକୁ ପ୍ରବେଶ ପାଇଁ ବାରମ୍ବାର ଉଦ୍ୟମ କରୁଥିବା ବେଳେ ଭିତରେ ଥିବା ସୁନ୍ଦରୀ ମଧ୍ୟ ଲଢ଼େଇ ପାଇଁ ତାରଜାଲି ଉପରକୁ କୁଦା ମାରୁଛି। ଏନ୍କ୍ଲୋଜର ଚାରିପଟେ ଲାଗିଥିବା ସିସିଟିଭି କ୍ୟାମେରାରେ ବନ ବିଭାଗ କର୍ମଚାରୀମାନେ ଏହା ଦେଖୁଥିବା ଜଣାପଡ଼ିଛି। ଏ ବିଷୟରେ ଆଞ୍ଚଳିକ ବନ ସଂରକ୍ଷକ (ଆର୍ସିସିଏଫ୍) ପ୍ରଦୀପ ରାଜ କରାଟେ କୁହନ୍ତି, ବାଘମାନେ ସେମାନଙ୍କ ସୀମା ନିର୍ଦ୍ଧାରଣ କରିଥାନ୍ତି। ସେଥିପାଇଁ ଅନ୍ୟ ବାଘ ସହ ସେମାନଙ୍କୁ ଲଢ଼େଇ କରିବାକୁ ପଡ଼େ। ସାତକୋଶିଆ ପୁରୁଣା ବାଘୁଣୀ ସୁନ୍ଦରୀକୁ ଦେଖି ଗର୍ଜନ କରୁଛି। ଲଢ଼େଇ ପାଇଁ ଉଭୟ ଝାମ୍ପ ଦେଉଛନ୍ତି। ସିସିଟିଭି କ୍ୟାମେରାରେ ଏହା ଦେଖାଯିବା ପରେ ଏନ୍କ୍ଲୋଜର ଜାଲିରେ ଗଛଲତା ମାଡ଼ିବା ପରି ସବୁଜ ନେଟ୍ ଦିଆଯାଇଛି। ତଥାପି ଛୋଟ ଛୋଟ କଣା ଓ ଗନ୍ଧ ବାରି ଉଭୟ ବାଘୁଣୀ ଲଢ଼େଇ କରିବାକୁ ଝାମ୍ପ ମାରୁଥିବା ଆର୍ସିସିଏଫ ପ୍ରକାଶ କରିଛନ୍ତି।
