ବେଳେବେଳେ ପର୍ସ ହଜିବା କିମ୍ବା ଚୋରି ହେଉଥିବା ଶୁଣିଥିବେ। କିନ୍ତୁ ପର୍ସ ହଜିବା ପରେ ଆଉ ମିଳିବ ବୋଲି ଖୁବ୍ କମ୍ ଆଶା ଥାଏ। ମାତ୍ର ଜଣେ ବ୍ୟକ୍ତିଙ୍କର ପର୍ସ ହଜିବା ପରେ ତାଙ୍କ ଆକାଉଣ୍ଟକୁ ଥରକୁ ଥର ଟଙ୍କା ଆସିବାରେ ଲାଗିଲା। ଘଟଣା ଜାଣିବା ପରେ ସେ ଆଶ୍ଚର୍ଯ୍ୟ ହୋଇଯାଇଛନ୍ତି। ଏପରି ଏକ ଘଟଣା ଘଟିଛି ବ୍ରିଟେନ୍ରେ ରହୁଥିବା ଟିମ୍ କ୍ୟାମରନ୍ଙ୍କ କ୍ଷେତ୍ରରେ। ଦିନେ ସେ ଅଫିସରୁ କାମ ସାରି ଘରକୁ ଫେରୁଥିବାବେଳେ ରାସ୍ତାରେ ତାଙ୍କ ପର୍ସ ହଜିଯାଇଥିଲା। ଏଥିରେ କିଛି ଟଙ୍କା ଏବଂ ଏଟିଏମ୍ କାର୍ଡ ମଧ୍ୟ ଥିଲା। କିନ୍ତୁ ପର୍ସଟିକୁ ଜଣେ ସଚ୍ଚୋଟ ଲୋକ ପାଇଥିଲେ। ବ୍ୟକ୍ତିଜଣକ କ୍ୟାମରନ୍ଙ୍କ ସନ୍ଧାନ ପାଇଁ ଅନ୍ଲାଇନ୍ ବ୍ୟାକିଂର ସହାୟତା ନେଇଥିଲେ।
ଏକ ରିପୋର୍ଟ ଅନୁଯାୟୀ, ଉକ୍ତ ବ୍ୟକ୍ତିଜଣକ କ୍ୟାମରନ୍ଙ୍କ ବ୍ୟାଙ୍କ ଆକାଉଣ୍ଟ୍ରେ ୪ ଥର ଟଙ୍କା ଜମା କରିଛନ୍ତି। ଏଥିସହ ପ୍ରତିଥର କ୍ୟାମରନ୍ଙ୍କ ନିକଟକୁ ନୂଆ ନୂଆ ତଥ୍ୟ ଆସିଥାଏ। ବ୍ୟକ୍ତିଜଣକ ଶେଷରେ ଏଥିରେ ଏକ ଫୋନ୍ ନମ୍ବର ଲେଖି କ୍ୟାମରନ୍ଙ୍କ ନିକଟକୁ ପଠାଇଥିଲେ। କ୍ୟାମରନ୍ ଫୋନ୍ କରି ତାଙ୍କଠାରୁ ସମସ୍ତ କଥା ବୁଝି ସଂପୃକ୍ତ ବ୍ୟକ୍ତିଙ୍କୁ ପ୍ରଶଂସା ମଧ୍ୟ କରିଥିଲେ। ବ୍ୟକ୍ତିଜଣକ ସୋସିଆଲ ମିଡିଆରେ ପର୍ସର ଫଟୋ ସହ ଜମା ରସିଦ ଶେୟାର କରିଥିଲେ। ଏହା ଦେଖି ୟୁଜରମାନେ ତାଙ୍କୁ ନାନା ପ୍ରଶ୍ନ ପଚାରିବାରେ ଲାଗିଲେ। ତୁମେ କ୍ୟାମରନ୍ଙ୍କ ପତ୍ତା କେମିତି ପାଇଲ? ତାଙ୍କ ପାଖକୁ ଟଙ୍କା କିପରି ପଠାଇଲ? ଏହାର ଉତ୍ତରରେ ସେ କହିଛନ୍ତି, ବ୍ରିଟେନ୍ର କାର୍ଡ ଉପରେ ବ୍ୟାଙ୍କର ସବିଶେଷ ତଥ୍ୟ ରହିଥାଏ, ଯେଉଁଥିରୁ ସେ ଜାଣିବାକୁ ପାଇଥିଲେ। ଆଉ ଏହା ସହାୟତାରେ କ୍ୟାମରନ୍ଙ୍କ ପର୍ସରେ ଥିବା ଅର୍ଥ ତାଙ୍କୁ ଫେରାଇ ଦେଇଥିଲେ।
