ଢାକା,୧୪ା୯(ଆଇଏଏନ୍ଏସ୍): ବାଂଲାଦେଶ ମୁକ୍ତି ଯୁଦ୍ଧର ୪୮ ବର୍ଷ ପରେ ଏହି ଦେଶର ସମସ୍ତ ସୀମାସ୍ତମ୍ଭ (ବୋର୍ଡର ପିଲାର)ରୁ ପାକିସ୍ତାନର ନାମକୁ ହଟାଇ ଦିଆଯାଇଛି। ୧୯୪୭ରେ ଦେଶ ବିଭାଜନ ବେଳେ ଏହି ସୀମାସ୍ତମ୍ଭଗୁଡ଼ିକୁ ସ୍ଥାପନ କରାଯାଇଥିଲା।
ବାଂଲାଦେଶ ପ୍ରଧାନମନ୍ତ୍ରୀ ଶେଖ୍ ହାସିନାଙ୍କ ନିର୍ଦ୍ଦେଶକ୍ରମେ ବର୍ଡର ଗାର୍ଡ ବାଂଲାଦେଶ (ବିଜିବି) ନିଜ ପାଣ୍ଠିରେ ଏହି କାର୍ଯ୍ୟ ସମ୍ପୂର୍ଣ୍ଣ କରିଛି।
୧୯୭୧ରେ ପାକିସ୍ତାନ କବଳରୁ ମୁକ୍ତ ହୋଇ ବାଂଲାଦେଶର ଜନ୍ମ ହୋଇଥିଲା। ଏହାର ୪୮ ବର୍ଷ ପରେ ଦେଶର ସମସ୍ତ ସୀମାସ୍ତମ୍ଭରୁ ପାକିସ୍ତାନର ନାମକୁ ହଟାଇଦେଇଛି ବାଂଲାଦେଶ। ଏହାସହ ପାକିସ୍ତାନ/ପିଏକେ ପରିବର୍ତ୍ତେ ସବୁ ପିଲାରର ନୂଆ ନାମକରଣ କରାଯାଇଛି ବାଂଲାଦେଶ/ବିଡି। ଭାରତ-ପାକିସ୍ତାନ ଅଲଗା ହେବାବେଳକୁ ପୂର୍ବ ପାକିସ୍ତାନ ସୀମାରେ ୮,୦୦୦ରୁ ଊର୍ଦ୍ଧ୍ୱ ବର୍ଡର ପିଲାର ସ୍ଥାପନ କରାଯାଇଥିଲା। ସେଥିରେ ଇଣ୍ଡିଆ-ପାକିସ୍ତାନ ବୋଲି ଉଲ୍ଲେଖ କରାଯାଇଥିଲା। ସେଗୁଡ଼ିକ ସତଖିରା, ଜେସୋର, ଚୂଡ଼ଙ୍ଗ, କୁଷ୍ଟିଆ, ରାଜଶାହି, ନାଓଗାଓଁ, ଜମାଲପୁର, ସୁନାମଗଞ୍ଜ, ବ୍ରାହ୍ମଣବାଡିଆ ଓ ଚିଟ୍ଟାଗଙ୍ଗ ସୀମାନ୍ତ ଅଞ୍ଚଳରେ ଏହି ସବୁ ପିଲାର ସ୍ଥାପିତ ହୋଇଥିଲା।
