ଭଞ୍ଜନଗର,୨୪।୧୦(ବାବୁଲା ପ୍ରଧାନ):ଗଞ୍ଜାମ-କନ୍ଧମାଳ ଜିଲା ସୀମାରେ ଥିବା କଳିଙ୍ଗା ଘାଟି ଜାତୀୟ ରାଜପଥର ଅସ୍ଥାୟୀ କାମ ପ୍ରାୟ ଶେଷ ଅବସ୍ଥାରେ ପହଞ୍ଚିଛି। ଶୁକ୍ରବାର ଉକ୍ତ ରାସ୍ତା ଦୁଇ ଚକିଆ ଏବଂ ଚାରି ଚକିଆ ଯାନ ପାଇଁ ଖୋଲିବାର ଯୋଜନା ଥିଲା। କିନ୍ତୁ ପଥର ଫୁଟା କାମ ସରିନଥିବା ଯୋଗୁ ଆଜି ରାସ୍ତା ଖୋଲି ପାରିନାହିଁ। ବର୍ତ୍ତମାନ ପଥର ଫୁଟା ଚାଲିଛି। ଦିନେ ଦୁଇଦିନ ମଧ୍ୟରେ ତାହା ସରିବା ପରେ ରାସ୍ତା ଖୋଲିବା ସମ୍ଭାବନା ରହିଛି।
ସୂଚନାଯୋଗ୍ୟ ଯେ, ଗତ ମାସ ୧୬ ତାରିଖରେ କଳିଙ୍ଗା ଘାଟିର ଦୁଇଟି ଝରଣା ସ୍ଥାନରେ ବଡ ବଡ ପଥର ଖସିବା ଯୋଗୁ ରାସ୍ତା ଭୁଶୁଡି ପଡ଼ିଥିଲା। ସେହିଦିନଠାରୁ ଉକ୍ତ ରାସ୍ତାରେ ଯାତାୟାତ ବନ୍ଦ ଅଛି। ଲୋକେ ଅନ୍ୟ ରାସ୍ତାରେ ଯାତାୟାତ କରିବା ଦ୍ୱାରା ଦୂର ସହ ଖର୍ଚ୍ଚାନ୍ତ ମଧ୍ୟ ବଢୁଛି। ତେଣୁ ଅଞ୍ଚଳବାସୀ ବିକଳ୍ପ ରାସ୍ତା ନିର୍ମାଣ କରିବା ପାଇଁ ଦାବୀ କରିଥିଲେ। ତାହାର ମଧ୍ୟ ସର୍ଭେ ଚାଲିଛି। ଅନ୍ୟପଟେ ମୁଖ୍ୟ ରାସ୍ତା କାମ ମଧ୍ୟ ଅସ୍ଥାୟୀ ଭାବେ ଶେଷ ପର୍ଯ୍ୟାୟରେ ପହଞ୍ଚିଛି। ତେଣୁ ଦୀର୍ଘ ଦେଢ଼ ମାସ ପରେ ଉକ୍ତ ରାସ୍ତା ଖୋଲିବାକୁ ଯାଉଥିବା ଜଣାପଡିଛି ।
Dharitri – Odisha’s No.1 Odia Daily
