ନୂଆଦିଲ୍ଲୀ,୨୨ା୪: ଆଗାମୀ ୨୯ ତାରିଖରେ ଅନୁଷ୍ଠିତ ହେବାକୁ ଥିବା ପଶ୍ଚିମବଙ୍ଗ ବିଧାନସଭାର ଦ୍ୱିତୀୟ ପର୍ଯ୍ୟାୟ ନିର୍ବାଚନ ଲାଗି ପ୍ରତିଦ୍ୱନ୍ଦ୍ୱିତାରେ ଅବତୀର୍ଣ୍ଣ ହୋଇଥିବା ପ୍ରାର୍ଥୀଙ୍କ ମଧ୍ୟରୁ ୨୩ ପ୍ରତିଶତଙ୍କ ନାମରେ ଆପରାଧିକ ମାମଲା ଥିବା ସେମାନେ ସତ୍ୟପାଠରେ ଘୋଷଣା କରିଛନ୍ତି। ସେହିପରି ୨୨ ପ୍ରତିଶତ ପ୍ରାର୍ଥୀଙ୍କ ସମ୍ପତ୍ତି ୧ କୋଟି ଟଙ୍କାରୁ ଊର୍ଦ୍ଧ୍ୱ ବୋଲି ଆସୋସିଏଶନ ଫର୍ ଡେମୋକ୍ରାଟିକ୍ ରିଫର୍ମସ (ଏଡିଆର୍) ରିପୋର୍ଟରୁ ଜଣାପଡ଼ିଛି।
ଦ୍ୱିତୀୟ ପର୍ଯ୍ୟାୟରେ ଲଢ଼ୁଥିବା ୧,୪୪୫ ପ୍ରାର୍ଥୀଙ୍କ ମଧ୍ୟରେ ୩୩୮ ଜଣ (୨୩%)ଙ୍କ ନାମରେ ଆପରାଧିକ ମାମଲା ରହିଥିବାବେଳେ ୨୯୫ ଜଣ (୨୦%)ଙ୍କ ନାମରେ ଗୁରୁତର ଅପରାଧ ମାମଲା ରହିଛି। ୧୬ ପ୍ରାର୍ଥୀଙ୍କ ନାମରେ ହତ୍ୟା ମାମଲା ଏବଂ ୮୦ ଜଣଙ୍କ ନାମରେ ହତ୍ୟା ଉଦ୍ୟମ ମାମଲା ରହିଛି। ଭାଜପାର ୧୦୨ (୭୨%) ପ୍ରାର୍ଥୀ, ଟିଏମ୍ସିର ୪୯(୩୫%), ସିପିଆଇ(ଏମ୍)ର ୫୧ (୫୧%) ଏବଂ କଂଗ୍ରେସର ୩୭ ଜଣ (୨୬%)ଙ୍କ ବିରୋଧରେ ଅପରାଧ ମାମଲା ରହିଛି। ସେହିପରି ୧,୪୪୫ ପ୍ରାର୍ଥୀଙ୍କ ମଧ୍ୟରୁ ୩୨୧ ଜଣ (୨୨%)ଙ୍କ ହାରାହାରି ସମ୍ପତ୍ତି ପରିମାଣ ୧ କୋଟି ଟଙ୍କାରୁ ଅଧିକ। ଟିଏମ୍ସିର ୧୦୩ ଜଣ (୭୩%) କୋଟିପତି ହୋଇଥିବାବେଳେ ଭାଜପାର ୭୩ ଜଣ (୫୨%), କଂଗ୍ରେସର ୩୬ ଜଣ (୨୫%) ଏବଂ ସିପିଆଇ(ଏମ୍)ର ୩୩ ଜଣ (୩୩%)ଙ୍କ ସମ୍ପତ୍ତି ପରିମାଣ ୧ କୋଟିରୁ ଅଧିକ।
