ଓସିରିସ୍ ଏଗ୍ରିଟେଲ୍ ପ୍ରାଇଭେଟ୍ ଲିମିଟେଡ୍ ଅଧୀନ ‘ଓଡ଼ିଶା କଫି’ର ପ୍ରତିଷ୍ଠାତା ହେଉଛନ୍ତି ପ୍ରୀତି ପଲ୍ଲବୀ ପଟ୍ଟନାୟକ। କୋରାପୁଟ କଫିର ପ୍ରଚାରପ୍ରସାର କ୍ଷେତ୍ରରେ ‘ଓଡ଼ିଶା କଫି’ର ଯଥେଷ୍ଟ ଅବଦାନ ରହିଥିବାବେଳେ ପ୍ରୀତି ପଲ୍ଲବୀ ସର୍ୱଦା ଓଡ଼ିଶାର ଚାଷୀଙ୍କୁ ଗୁରୁତ୍ୱ ଦେଇଆସିଛନ୍ତି। ଏହି ଆଉଟଲେଟ୍ ମାଧ୍ୟମରେ ଓଡ଼ିଶାର ସଂସ୍କୃତିର ପ୍ରଚାରପ୍ରସାରକୁ ମଧ୍ୟ ପ୍ରାଧାନ୍ୟ ଦେଉଥିବା ପ୍ରୀତି ପଲ୍ଲବୀଙ୍କ ସହ ସ୍ୱତନ୍ତ୍ର ସାକ୍ଷାତ୍କାର…
ପ୍ର-କୋରାପୁଟରେ ଚାଷ କରାଯାଉଥିବା ‘ଆରାବିକା କଫି’ର ପ୍ରଚାର ପାଇଁ ‘ଓଡ଼ିଶା କଫି’ କିପରି ଅନୁପ୍ରାଣିତ ହେଲା?
ଉ- ଓଡ଼ିଶା କଫି ଆମର ସାମାଜିକ ସଂଗଠନ କଳିଙ୍ଗ ଦେଶୀଏଗ୍ରୋ ଫାଉଣ୍ଡେଶନ (କେଡିଏଫ୍)ର ଏକ ସମ୍ପ୍ରସାରଣ। କୋରାପୁଟର କଫି ସହିତ କାମ କରୁଥିବା ସମୟରେ ଆମ ବନ୍ଧୁ ଓ ପରିବାର ଲୋକେ ଉତ୍ତମମାନର କଫି (ରୋଷ୍ଟେଡ୍ ବିନ୍ସ) ଖୋଜୁଥିଲେ। ପ୍ରଥମେ ଆମେ ସେମାନଙ୍କୁ ଛୋଟ ଛୋଟ ବ୍ୟାଚ୍ ଦେଉଥିଲୁ। ପରେ ଭୁବନେଶ୍ୱରରେ କଫି ପପ୍-ଅପ୍ ଆୟୋଜନ କରି ଲୋକଙ୍କୁ କୋରାପୁଟ କଫି ଚଖାଇଲୁ। କୋରାପୁଟର ଉଚ୍ଚ ମାନର କଫିକୁ ସତେଜ ଭାବେ ରୋଷ୍ଟ କରି ଲୋକଙ୍କ ପାଖରେ ପହଞ୍ଚାଇବା ଏବଂ ଏକ ସ୍ୱତନ୍ତ୍ର ଗ୍ରାହକ ଗୋଷ୍ଠୀ ତିଆରି କରିବା ପାଇଁ ‘ଓଡ଼ିଶା କଫି’ ବ୍ରାଣ୍ଡ୍ର ଜନ୍ମ ହେଲା।
ପ୍ର-କଳିଙ୍ଗ ଦେଶୀଏଗ୍ରୋ ଫାଉଣ୍ଡେଶନ (କେଡିଏଫ୍) କୃଷକଙ୍କୁ କିପରି ସହାୟତା ପ୍ରଦାନ କରୁଛି?
ଉ- କେଡିଏଫ୍ ମାଧ୍ୟମରେ ଆମେ କୋରାପୁଟର ଚାଷୀଙ୍କ ସହ ସିଧାସଳଖ କାମ କରୁ, ଯାହା ଫଳରେ ଚାଷଠାରୁ ଆରମ୍ଭ କରି ଅମଳ ପର୍ଯ୍ୟନ୍ତ ସବୁ ପ୍ରକ୍ରିୟା ଉପରେ ଆମର ନଜର ରହିଥାଏ। କେଡିଏଫ୍ର କଫି ପ୍ରକ୍ରିୟାକରଣ ୟୁନିଟ୍ ଚାଷଜମିରୁ ଚୂଡ଼ାନ୍ତ ଉତ୍ପାଦ ପର୍ଯ୍ୟନ୍ତ ଗୁଣବତ୍ତା
ବଜାୟ ରଖିବାରେ ସାହାଯ୍ୟ କରେ। ମଧ୍ୟସ୍ଥମାନଙ୍କୁ ବାଦ୍ ଦେଇ ଆମେ ସିଧାସଳଖ ଚାଷୀଙ୍କଠାରୁ କଫି ସଂଗ୍ରହ କରୁ, ଯାହାଦ୍ୱାରା ସେମାନେ ବଜାର ଦରଠାରୁ ଅଧିକ ମୂଲ୍ୟ ପାଇପାରୁଛନ୍ତି। ଏହା ଚାଷୀଙ୍କ ସହ ଆମର ଏକ ଦୀର୍ଘକାଳୀନ ସମ୍ପର୍କ ସ୍ଥାପନ କରିବା ସହ କଫିର ମାନ ବୃଦ୍ଧି କରିବାରେ ସହାୟକ ହେଉଛି।
ପ୍ର- ବର୍ତ୍ତମାନ ପର୍ଯ୍ୟନ୍ତ ଆପଣଙ୍କ ଯାତ୍ରା କିପରି ରହିଛି? କଫି କାଫେରେ କେଉଁ ନୂଆ ଜିନିଷ କରୁଛନ୍ତି?
ଉ- ଆମର ଯାତ୍ରା ସ୍ୱାଭାବିକ ଏବଂ ପରିବର୍ତ୍ତନଶୀଳ ରହିଛି। ପ୍ରଥମେ ଆମେ କେବଳ ଅନ୍ଲାଇନ (ଡି୨ସି) ମାଧ୍ୟମରେ କଫି ବିକ୍ରି କରିବାକୁ ଚାହୁଁଥିଲୁ, କିନ୍ତୁ ଭୁବନେଶ୍ୱର ପଟିଆରେ ଏକ ସେଲୁନ ଭିତରେ କାଫେ ଖୋଲିବାର ସୁଯୋଗ ମିଳିଲା। ଏହା ଆମକୁ ସହରର କଫି ସଂସ୍କୃତିକୁ ଏକ ନୂଆ ରୂପ ଦେବା ପାଇଁ ସୁଯୋଗ ଦେଲା। ଆଜି ‘ଓଡ଼ିଶା କଫି’ କେବଳ ଏକ ଉତ୍ପାଦ ନୁହେଁ, ବରଂ ଏକ ସାଂସ୍କୃତିକ ଅନୁଭୂତି। ଆମେ ‘ଲାଟେ ଆର୍ଟ’ ୱାର୍କଶପ ଏବଂ ‘କଫି ରେଭ୍ସ’ ଭଳି କାର୍ଯ୍ୟକ୍ରମ କରୁଛୁ। ପାନୀୟ କ୍ଷେତ୍ରରେ ଆମେ କୋକୋନଟ କ୍ଲାଉଡ୍ କଫି ଏବଂ ପିସ୍ତା ଲାଟେ ଭଳି ଅନ୍ତର୍ଜାତୀୟ ଟ୍ରେଣ୍ଡ୍ ସହିତ ମାଣ୍ଡିଆ କଫି, ଛତୁଆ କଫି ଏବଂ ମହୁଲ ଫୁଲ କୋଲ୍ଡ ବ୍ରୁ ଭଳି ସ୍ଥାନୀୟ ସ୍ୱାଦକୁ ମଧ୍ୟ ସାମିଲ କରିଛୁ।
ପ୍ର- ‘ଓଡ଼ିଶା ଅନ୍ସ୍କ୍ରିପ୍ଟେଡ୍’ ଭଳି କାର୍ଯ୍ୟକ୍ରମ କଫି ଶିକ୍ଷା ଏବଂ ସାଂସ୍କୃତିକ କାହାଣୀ ପ୍ରଚାରରେ କିପରି ସାହାଯ୍ୟ କରୁଛି?
ଉ- ଓଡ଼ିଶା ଅନ୍ସ୍କ୍ରିପ୍ଟେଡ୍ ହେଉଛି ଏକ ସାମାଜିକ ପ୍ଲାଟ୍ଫର୍ମ, ଯାହା ‘ଓଡ଼ିଶା କଫି’କୁ କେବଳ ଏକ କାଫେ ମଧ୍ୟରେ ସୀମିତ ନ ରଖି ଆଳାପ ଏବଂ ସାଂସ୍କୃତିକ ଆଦାନପ୍ରଦାନର ଏକ କେନ୍ଦ୍ରରେ ପରିଣତ କରେ। ଏହା କେବଳ କଫିପ୍ରେମୀଙ୍କ ପାଇଁ ନୁହେଁ, ବରଂ ସମସ୍ତଙ୍କ ପାଇଁ ଏକ ମାଧ୍ୟମ। ଏଠାରେ କଫି ବିଷୟରେ ଶିକ୍ଷା ଦେବା ଅପେକ୍ଷା ଲୋକଙ୍କୁ କଫିର ଅନୁଭୂତି ଦେବା ଉପରେ ଗୁରୁତ୍ୱ ଦିଆଯାଏ। ଏହି କାର୍ଯ୍ୟକ୍ରମ ମାଧ୍ୟମରେ ଆମେ ଓଡ଼ିଆ ପରିଚୟ ଏବଂ ସଂସ୍କୃତିକୁ ନୂତନ ପିଢ଼ି ପାଖରେ ପହଞ୍ଚାଇବାକୁ ଚେଷ୍ଟା କରୁଛୁ।
ପ୍ର- ଆପଣ କାହିଁକି ଏହି ବ୍ୟବସାୟକୁ ବାଛିଲେ? ନୂତନ ଉଦ୍ୟୋଗୀମାନଙ୍କୁ ଆପଣ କି ପରାମର୍ଶ ଦେବେ?
ଉ-ସତ କହିବାକୁ ଗଲେ, ‘ଓଡ଼ିଶା କଫି’ କୌଣସି ଯୋଜନାବଦ୍ଧ ବ୍ୟବସାୟ ନ ଥିଲା। ଏହା ଆମର ସାମାଜିକ ଲକ୍ଷ୍ୟର ଏକ ଅଂଶ ଥିଲା। ଆମର ଉଦ୍ଦେଶ୍ୟ ଥିଲା ଭୁବନେଶ୍ୱରରେ ଏକ କଫି ପରିବେଶ ସୃଷ୍ଟି କରିବା ଏବଂ କୋରାପୁଟ କଫିକୁ ସ୍ୱତନ୍ତ୍ର ପରିଚୟ ଦେବା। କଫି ଚାଷୀଙ୍କୁ ବଜାର ସହ ଯୋଡ଼ିବା ଏବଂ ଏକ ସ୍ଥାୟୀ ଜୀବିକା ପ୍ରଦାନ କରିବାକୁ ଆମେ ଚାହୁଁଥିଲୁ। ନୂତନ ଉଦ୍ୟୋଗୀମାନଙ୍କ ପାଇଁ ମୋର ପରାମର୍ଶ ହେଉଛି, କଫି ବଜାର ସବୁବେଳେ ପରିବର୍ତ୍ତନଶୀଳ, ତେଣୁ ଶିଖିବାକୁ ଚେଷ୍ଟା କରନ୍ତୁ। ନିଜର ବ୍ରାଣ୍ଡ୍କୁ ସ୍ୱତନ୍ତ୍ର କରନ୍ତୁ ଏବଂ ଧୈର୍ଯ୍ୟ ଧରନ୍ତୁ। ମନରେ ସଦିଚ୍ଛା ଥିଲେ ସଫଳତା ନିଶ୍ଚୟ ମିଳିବ।
