ଦିଗପହଣ୍ଡି,୨୧।୪(ଅଶେଷ ନାଥ ମିଶ୍ର): ଚାକିରି କରାଇଦେବା ନାଁରେ ଲକ୍ଷ ଲକ୍ଷ ଟଙ୍କା ଠକେଇ ଏବଂ ପରବର୍ତ୍ତୀ ସମୟରେ ଅର୍ଥ ଫେରସ୍ତ ମାଗିବାରୁ ହତ୍ୟା ଉଦ୍ୟମ ଭଳି ଏକ ସାଂଘାତିକ ମାମଲା ଦିଗପହଣ୍ଡି ଅଞ୍ଚଳରୁ ଆସିଛି। ଅମିନ ଚାକିରି ପ୍ରଲୋଭନ ଦେଖାଇ ଜଣେ ଯୁବକଙ୍କଠାରୁ ୭ ଲକ୍ଷରୁ ଅଧିକ ଟଙ୍କା ହଡ଼ପ କରିଥିବା ଅଭିଯୁକ୍ତକୁ ପୋଲିସ ଗିରଫ କରି କୋର୍ଟ ଚାଲାଣ କରିଛି।
ସୂଚନା ଅନୁଯାୟୀ, ଦିଗପହଣ୍ଡି ବ୍ଲକ ପଦ୍ମନାଭପୁର ଗ୍ରାମର ମେହୁଲ କୁମାର ସାବତ ଓ ତାଙ୍କ ଭାଇ ରାକେଶ ସାବତ ୨୦୨୩ ମସିହାରେ ଚୁଡୁଙ୍ଗପୁର ଗ୍ରାମର ଇନ୍ସୁରାନ୍ସ ଏଜେଣ୍ଟ ବାବୁଲି ମହାରଣା ଓରଫ ସତ୍ୟବାଦୀଙ୍କୁ ଭେଟିଥିଲେ। ବାବୁଲି ନିଜକୁ ଜଣେ ବ୍ୟାଙ୍କ ଫାଇନାନ୍ସ ଅଫିସର ବୋଲି ପରିଚୟ ଦେଇଥିଲେ। ମେହୁଲଙ୍କୁ ରାଜ୍ୟ ଷ୍ଟାଫ ସିଲେକ୍ସନ ବୋର୍ଡ (OSSC) ଦ୍ୱାରା ହେଉଥିବା ଅମିନ ପରୀକ୍ଷାରେ ପାସ କରାଇ ଚାକିରି କରାଇଦେବା ପାଇଁ ବାବୁଲି ପ୍ରତିଶ୍ରୁତି ଦେଇଥିଲେ।
ଏହି ପ୍ରତିଶ୍ରୁତି ବଦଳରେ ବାବୁଲି ମେହୁଲ ଓ ତାଙ୍କ ଭାଇଙ୍କ ଠାରୁ ଫୋନ ପେ’ ମାଧ୍ୟମରେ ୪ ଲକ୍ଷ ୬୫ ହଜାର ଟଙ୍କା, ନଗଦ ଆକାରରେ ୨ ଲକ୍ଷ ୬୪ ହଜାର ୯୭୦ ଟଙ୍କା ସେ ନେଇଥିଲେ। ଏହିପରି ସମୁଦାୟ ୭ ଲକ୍ଷ ୩୦ ହଜାର ଟଙ୍କା ହାତେଇଥିଲେ। ପରେ ଠକ ବାବୁଲି ଏକ ନକଲି ନିଯୁକ୍ତିପତ୍ର (Fake Appointment Letter) ମଧ୍ୟ ପ୍ରଦାନ କରିଥିଲେ।
ନିଯୁକ୍ତିପତ୍ରଟି ନକଲି ବୋଲି ଜାଣିବା ପରେ ରାକେଶ ଟଙ୍କା ଫେରସ୍ତ ମାଗିଥିଲେ। ବାବୁଲି ମାତ୍ର ୧ ଲକ୍ଷ ୮୦ ହଜାର ଟଙ୍କା ଫେରସ୍ତ କରି ଚୁପ ବସିଥିଲେ। ବାକି ୫ ଲକ୍ଷ ୫୦ ହଜାର ଟଙ୍କା ମାଗିବାରୁ ଗତ ଜାନୁୟାରୀ ୨୨ ତାରିଖରେ ବାବୁଲି, ରାକେଶଙ୍କୁ ଦିଗପହଣ୍ଡି ଡକାଇ ମାଡ଼ ମାରିବା ସହ ତଣ୍ଟି ଚିପି ହତ୍ୟା କରିବାକୁ ଉଦ୍ୟମ କରିଥିଲେ। ଏଥିସହ ବାରମ୍ବାର ଧମକ ଚମକ ଦେଇଥିଲେ।
ଅତିଷ୍ଠ ହୋଇ ରାକେଶ ଦିଗପହଣ୍ଡି ଥାନାରେ ଏତଲା ଦେବା ପରେ ଆଇଆଇସି (IIC) କିଶୋର କୁମାର ସାମଲ ମାମଲା ରୁଜୁ କରିଥିଲେ। ମଙ୍ଗଳବାର ପୋଲିସ ଅଭିଯୁକ୍ତ ବାବୁଲିଙ୍କୁ ଗିରଫ କରିଥିଲା। ଜାମିନ ଆବେଦନ ଖାରଜ ହେବାରୁ ତାଙ୍କୁ ଦିଗପହଣ୍ଡି ସବ-ଜେଲ ହାଜତକୁ ପଠାଇ ଦିଆଯାଇଛି।
ପୋଲିସର ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଏହି ଚାକିରି ଠକେଇ ରାକେଟ ପଛରେ କଟକ ସତୀ ଚଉରା ଅଞ୍ଚଳର ଜଣେ ଆକାଉଣ୍ଟ କ୍ଲର୍କଙ୍କ ମଧ୍ୟ ସମ୍ପୃକ୍ତି ରହିଛି। ପୋଲିସ ଏବେ ଏହି ଘଟଣାର ଅଧିକ ଖୋଳତାଡ଼ ଜାରି ରଖିଛି।
