ଥୁଆମୂଳ ରାମପୁର, ୨୨ା୪ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକରେ ବିକାଶ ନାଁରେ ଚାଲିଥିବା ‘ମହାଘୋଟାଲା’କୁ ନେଇ ଜନଅସନ୍ତୋଷ ଏବେ ଆଗ୍ନେୟଗିରିର ରୂପ ଧାରଣ କରିଛି। ବ୍ଲକରେ କାର୍ଯ୍ୟରତ ତିନି ଜଣ କନିଷ୍ଠ ଯନ୍ତ୍ରୀଙ୍କ ମନମୁଖୀ କାର୍ଯ୍ୟକଳାପ, ନିଜେ ଠିକାଦାର ସାଜିବା ଏବଂ ସରକାରୀ ଅର୍ଥ ହରିଲୁଟକୁ ବିରୋଧ କରି ଶତାଧିକ ଜନସାଧାରଣ ବ୍ଲକ କାର୍ଯ୍ୟାଳୟ ସମ୍ମୁଖରେ ବିଶାଳ ବିକ୍ଷୋଭ ପ୍ରଦର୍ଶନ କରିଛନ୍ତି। ସରକାରୀ ଟଙ୍କା ଗିଳିଛନ୍ତି ଯଦି ଓଗାଳିବାକୁ ପଡ଼ିବ ଏବଂ ଆମ ବ୍ଲକର ଟଙ୍କା ଲୁଟିବାକୁ ଦେବୁ ନାହିଁ ବୋଲି କହି ଉତ୍ତ୍ୟକ୍ତ ସାଧାରଣ ଜନତାମାନେ ବ୍ଲକ ପ୍ରଶାସନ ସମ୍ମୁଖରେ ଗର୍ଜନ କରିଛନ୍ତି।
ଅଭିଯୋଗ ଅନୁଯାୟୀ, କନିଷ୍ଠ ଯନ୍ତ୍ରୀ ସତ୍ୟନାରାୟଣ ବେହେରା, ମଳୟ ଶତପଥୀ ଏବଂ ପ୍ରତାପ କୁମାର ସାହୁ ସରକାରୀ କର୍ମଚାରୀ ହୋଇ ମଧ୍ୟ ପରୋକ୍ଷରେ ଠିକାଦାର ସାଜି ସବୁ ସରକାରୀ କାମରେ ବ୍ୟାପକ ‘ଫଲ୍ସ ବିଲ’ କରୁଛନ୍ତି। ବିଶେଷ କରି ଯନ୍ତ୍ରୀ ମଳୟ ଶତପଥୀ DMF (District Mineral Foundation) ଯୋଜନାରେ ମହାଘୋଟାଲା କରୁଥିବା ବେଳେ କିଆପଦର ଗ୍ରାମ ପଞ୍ଚାୟତର ସମସ୍ତ ବିକାଶମୂଳକ କାର୍ଯ୍ୟରେ ନିଜେ ଠିକାଦାର ସାଜିଛନ୍ତି। ଏହି ବାବୁମାନେ ସରକାରୀ କାର୍ଯ୍ୟ କରିବା ପରିବର୍ତ୍ତେ ବ୍ୟବସାୟରେ ଲିପ୍ତ ରହି ଠିକା କାମ ପାଇଁ ଆବଶ୍ୟକ ହେଉଥିବା ବାଲି, ଚିପ୍ସ, ସିମେଣ୍ଟ ଓ ରଡ ଭଳି ସମସ୍ତ Infrastructure Material ନିଜେ ସପ୍ଲାଏ କରୁଛନ୍ତି। ସେହିପରି ତଳନାଗୀ ପଞ୍ଚାୟତରେ କନିଷ୍ଠ ଯନ୍ତ୍ରୀ ସତ୍ୟନାରାୟଣ ବେହେରା ନିଜ ମନଇଚ୍ଛା ସରକାରୀ ଟଙ୍କା ଅପବ୍ୟବହାର କରୁଥିବା ବେଳେ ଯନ୍ତ୍ରୀ ପ୍ରତାପ ସାହୁ ମନରେଗା (MGNREGA)ଠାରୁ ଆରମ୍ଭ କରି ଅନେକ ଯୋଜନାରେ କାମ ନକରାଇ ଲକ୍ଷ ଲକ୍ଷ ଟଙ୍କାର ଫଲ୍ସ ବିଲ ଉଠାଉଥିବା ନେଇ ଜନସାଧାରଣ ଅଭିଯୋଗ କରିଛନ୍ତି। ଏହି ଦୁର୍ନୀତିଗ୍ରସ୍ତ ଯନ୍ତ୍ରୀମାନଙ୍କୁ ତୁରନ୍ତ ବଦଳି କରିବା ଏବଂ ସେମାନେ ଆତ୍ମସାତ କରିଥିବା ଅର୍ଥ ଓଗାଳିବା ଦାବିରେ ଥୁଆମୂଳ ରାମପୁରର ଶତାଧିକ ଜନସାଧାରଣ ବିଡ଼ିଓଙ୍କ ଜରିଆରେ ମାନ୍ୟବର ମୁଖ୍ୟମନ୍ତ୍ରୀ (ଓଡ଼ିଶା), ମାନ୍ୟବର ସାଂସଦ (କଳାହାଣ୍ଡି) ଏବଂ CDO-cum-EO, DRDA (କଳାହାଣ୍ଡି)ଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ପ୍ରଦାନ କରିଛନ୍ତି।
ବ୍ଲକ ଗୋଷ୍ଠୀ ଉନ୍ନୟନ ଅଧିକାରୀ (BDO) ଧ୍ରୁବ ଚରଣ ମୁଦୁଲିଙ୍କ ଅନୁପସ୍ଥିତିରେ ଆନ୍ଦୋଳନକାରୀମାନେ ମୁଖ୍ୟ କିରାଣୀ ତଥା ବଡ଼ବାବୁ ଭାସ୍କର ସବରଙ୍କୁ ସାକ୍ଷାତ କରି ଏହି ଦାବିପତ୍ର ପ୍ରଦାନ କରିଛନ୍ତି। ଏହି ବିଶାଳ ଜନସମାଗମ ଓ ବିକ୍ଷୋଭରେ ଡମ୍ବରୁଧର ମହାରଣା, ରାବେନା ନାଏକ, ବଳରାମ କବାଡି, ବିଜୟ ପ୍ରଧାନୀ, ସତ୍ୟନାରାୟଣ ସିଂ, କ୍ରିଷ୍ଣା ଚନ୍ଦ୍ର ନାଏକ, ବିଦ୍ୟାଧର ଗୌଡ଼, କବିଟ ଗୌଡ଼, ର୍ବିଶିଂ ମାଝୀ, ରାମେଶ୍ୱର ବାଗ, ମାଗୁ ମାଝୀ, ସୁନା ମାଝୀ, ଗଙ୍ଗା ମାଝୀ, ଡମ୍ବରୁଧର ନାଏକ, ଜଗଦୀଶ ମାଝୀ, ଧନେଶ୍ୱର ସାହୁ, ବସନ୍ତ ମାଝୀ, ଗଙ୍ଗାଧର ନାଏକ, ଗୋବିନ୍ଦ ଗୌଡ଼, ନରସିଂହ ମାଝୀ, ତ୍ରିନାଥ ସିଂ ଏବଂ ରାମତୁ ମାଝୀଙ୍କ ସମେତ ଥୁଆମୂଳ ରାମପୁର ଅଞ୍ଚଳର ଶତାଧିକ ଜନସାଧାରଣ ସାମିଲ ହୋଇଥିଲେ।
Dharitri – Odisha’s No.1 Odia Daily
