ଲଣ୍ଡନ,୨୨ା୪: ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ସମୁଦ୍ର ପଥ ହର୍ମୁଜ ପ୍ରଣାଳୀକୁ ନେଇ ଆମେରିକା ଏବଂ ଇରାନ ମଧ୍ୟରେ ପ୍ରବଳ ଉତ୍ତେଜନା ଲାଗି ରହିଛି। ଆମେରିକାର ନୌସେନା ଅବରୋଧ ଯୋଗୁ ଇରାନ ପୁନର୍ବାର ହର୍ମୁଜ ପ୍ରଣାଳୀକୁ ବନ୍ଦ କରିଦେଇଛି। ଏହା ପ୍ରଣାଳୀ ଦେଇ ଜାହାଜ ଚଳାଚଳକୁ ଗୁରୁତର ଭାବରେ ବାଧାପ୍ରାପ୍ତ କରିଛି, ଯାହା ଅନେକ ଦେଶରେ ଶକ୍ତି ସଙ୍କଟ ସୃଷ୍ଟି କରିଛି। ଏହି ପଥକୁ ପୁନଃ ଖୋଲିବା ପାଇଁ ୩୦ରୁ ଅଧିକ ଦେଶ ଏବେ ଏକାଠି ହୋଇଛନ୍ତି।
ରିପୋର୍ଟ ଅନୁଯାୟୀ, ହର୍ମୁଜ ପ୍ରଣାଳୀ ଦେଇ ଜାହାଜ ଚଳାଚଳ ପୁନଃ ଆରମ୍ଭ କରିବା ପାଇଁ ବୁଧବାର ଲଣ୍ଡନରେ ଏକ ଗୁରୁତ୍ୱପୂର୍ଣ୍ଣ ବୈଠକରେ ୩୦ରୁ ଅଧିକ ଦେଶର ସାମରିକ ଯୋଜନାକାରୀ ଯୋଗଦେବେ। ୟୁକେ ପ୍ରତିରକ୍ଷା ମନ୍ତ୍ରଣାଳୟ ନେତୃତ୍ୱରେ ଆୟୋଜିତ ଏହି ବୈଠକର ଲକ୍ଷ୍ୟ ହେଉଛି ପରିସ୍ଥିତି ସ୍ବାଭାବିକ ହେବା ପରେ ସମୁଦ୍ର ପଥକୁ ସୁରକ୍ଷିତ କରିବା ପାଇଁ ଏକ କଠିନ ସାମରିକ ରଣନୀତି ପ୍ରସ୍ତୁତ କରିବା।
ବ୍ରିଟିଶ ପ୍ରତିରକ୍ଷା ମନ୍ତ୍ରୀ ଜନ୍ ହିଲି କହିଛନ୍ତି ଯେ, ଲଣ୍ଡନ ବୈଠକର ପ୍ରାଥମିକ ଉଦ୍ଦେଶ୍ୟ ହେଉଛି କୂଟନୈତିକ ସହମତିକୁ କାର୍ଯ୍ୟରେ ପରିଣତ କରିବା। ସେ କହିଛନ୍ତି, ‘ଆମର ଲକ୍ଷ୍ୟ ହେଉଛି ଏହି ସହମତିକୁ ଏକ ମିଳିତ ଯୋଜନାରେ ପରିଣତ କରିବା ଯାହା ଦ୍ୱାରା ହର୍ମୁଜ ପ୍ରଣାଳୀରେ ନୌଚାଳନା ସ୍ବାଧୀନତା ସୁନିଶ୍ଚିତ ହୋଇପାରିବ ଏବଂ ଏକ ସ୍ଥାୟୀ ଯୁଦ୍ଧବିରତିକୁ ସମର୍ଥନ କରାଯାଇପାରିବ। ଅଧିକାରୀଙ୍କ ଅନୁଯାୟୀ, ବୈଠକରେ ସାମରିକ କ୍ଷମତା, କମାଣ୍ଡ ଏବଂ ନିୟନ୍ତ୍ରଣ ଭିତ୍ତିଭୂମି ଏବଂ ଅଞ୍ଚଳରେ ସୈନ୍ୟ ମୁତୟନ ପାଇଁ ସମ୍ଭାବ୍ୟ ରଣନୀତି ଉପରେ ଆଲୋଚନା ହେବ।
ଏକ ରିପୋର୍ଟ ଅନୁଯାୟୀ, ପୂର୍ବରୁ ୧୨ରୁ ଅଧିକ ଦେଶ ଏହି ପ୍ରସ୍ତାବିତ ମିଶନରେ ଯୋଗଦେବା ପାଇଁ ଆଗ୍ରହ ପ୍ରକାଶ କରିଛନ୍ତି। ଏହା ବ୍ରିଟେନ ଏବଂ ଫ୍ରାନ୍ସ ଦ୍ୱାରା ପରିଚାଳିତ ହେବ ଏବଂ ଏହି ଗୁରୁତ୍ୱପୂର୍ଣ୍ଣ ଜଳପଥରେ ପରିବହନ କରୁଥିବା ଜାହାଜର ସୁରକ୍ଷା ସୁନିଶ୍ଚିତ କରିବା ଏହାର ଲକ୍ଷ୍ୟ। ଗତ ସପ୍ତାହରେ ୟୁରୋପ, ଏସିଆ ଏବଂ ମଧ୍ୟପ୍ରାଚ୍ୟର ପ୍ରାୟ ୫୦ଟି ଦେଶ ଏକ ଭର୍ଚୁଆଲ ବୈଠକରେ ଅଂଶଗ୍ରହଣ କରିବା ପରେ ଏହି ଯୋଜନା ଗତିଶୀଳ ହୋଇଥିଲା, ଯାହାକୁ ଏକ ବିଶ୍ୱସ୍ତରୀୟ ସାମୂହିକ ପଦକ୍ଷେପ ଭାବରେ ଦେଖାଯାଉଛି। ଏହି ସମୟରେ, ଆମେରିକା ଇରାନ ସହିତ ଯୁଦ୍ଧବିରତି ବୃଦ୍ଧି ଘୋଷଣା କରିଛି। ତଥାପି ଆମେରିକା ହର୍ମୁଜ ପ୍ରଣାଳୀରେ ଏହାର ଅବରୋଧ ଉଠାଇବା ଘୋଷଣା କରିନାହିଁ।
ଅଂଶଗ୍ରହଣକାରୀ ୩୦ଟି ଦେଶର ନାମ ସାର୍ବଜନୀନ ଭାବରେ ପ୍ରକାଶ କରାଯାଇ ନାହିଁ। ତଥାପି ସମ୍ଭାବ୍ୟ ତାଲିକାରେ ବ୍ରିଟେନ, ଫ୍ରାନ୍ସ, ଜର୍ମାନୀ, ଇଟାଲି, ନେଦରଲ୍ୟାଣ୍ଡ, ସ୍ବିଡେନ, ନରଓ୍ବେ, ଫିନଲାାଣ୍ଡ, ଡେନମାର୍କ, ପୋଲାଣ୍ଡ ଏବଂ ବେଲଜିୟମ ଅନ୍ତର୍ଭୁକ୍ତ ହୋଇପାରେ। ଜାପାନ, ଦକ୍ଷିଣ କୋରିଆ, ଅଷ୍ଟ୍ରେଲିଆ ଏବଂ ନ୍ୟୁଜିଲାଣ୍ଡ ବିଷୟରେ ମଧ୍ୟ ଆଲୋଚନା କରାଯାଉଛି। ବାହାରିନ, ସଂଯୁକ୍ତ ଆରବ ଏମିରେଟ୍ସ, କାନାଡା ଏବଂ ଅନ୍ୟାନ୍ୟ ଉପସାଗରୀୟ ଦେଶ ମଧ୍ୟ ଏହି କାର୍ଯ୍ୟକ୍ରମରେ ସାମିଲ ହୋଇପାରନ୍ତି। ଭାରତ ଏବଂ ପାକିସ୍ତାନ ଏଥିରେ ଅଂଶଗ୍ରହଣ କରିବେ କି ନାହିଁ ତାହା ବର୍ତ୍ତମାନ ସୁଦ୍ଧା ପ୍ରକାଶ କରାଯାଇନାହିଁ।
