ନୂଆଦିଲ୍ଲୀ,୨୦।୪: ଆଫଗାନିସ୍ତାନର ଅଲରାଉଣ୍ଡର ରଶିଦ ଖାନ କ୍ରିକେଟ ଜଗତରେ ନିଜ ପାଇଁ ଏକ ସ୍ବତନ୍ତ୍ର ସ୍ଥାନ ସୃଷ୍ଟି କରିଛନ୍ତି। ତାଙ୍କୁ ବର୍ତ୍ତମାନ ବିଶ୍ୱର ଶ୍ରେଷ୍ଠ ସ୍ପିନରମାନଙ୍କ ମଧ୍ୟରୁ ଜଣେ ବୋଲି ବିବେଚନା କରାଯାଏ। ଏବେ ଏହି ଅଭିଜ୍ଞ କ୍ରିକେଟର୍ ଏକ ଆଶ୍ଚର୍ଯ୍ୟଜନକ ଖୁଲାସା କରିଛନ୍ତି। ତାଙ୍କୁ ଟିମ ଇଣ୍ଡିଆ ପାଇଁ ଖେଳିବା ଏବଂ ଭାରତୀୟ ନାଗରିକତା ପାଇଁ ପ୍ରସ୍ତାବ ମିଳିଥିଲା।
ରଶିଦ ଖାନ ତାଙ୍କ ପୁସ୍ତକ ‘ରଶିଦ ଖାନ: ଫ୍ରମ ଷ୍ଟ୍ରିଟ୍ସ ଟୁ ଷ୍ଟାରଡମକ୍ଷରେ ଏହା ପ୍ରକାଶ କରିଛନ୍ତି। ରଶିଦ କହିଛନ୍ତି ଯେ, ତାଙ୍କୁ କେବଳ ଭାରତରେ ନୁହେଁ ବରଂ ଅଷ୍ଟ୍ରେଲିଆରେ ମଧ୍ୟ ଖେଳିବା ପାଇଁ ପ୍ରସ୍ତାବ ମିଳିଥିଲା। ଆଫଗାନିସ୍ତାନ କ୍ରିକେଟରଙ୍କୁ ଏହି ପ୍ରସ୍ତାବ ୨୦୨୩ ଆଇପିଏଲ ସମୟରେ ମିଳିଥିଲା, ଯେତେବେଳେ ସେ ଟିମ ଇଣ୍ଡିଆର ଜଣେ ପ୍ରମୁଖ ବ୍ୟକ୍ତିଙ୍କୁ ଭେଟିଥିଲେ।
ରଶିଦଙ୍କ ଟିମ ଇଣ୍ଡିଆର ଜଣେ ପ୍ରମୁଖ ବ୍ୟକ୍ତିଙ୍କୁ ଭେଟିବା ଏବଂ ଭାରତୀୟ ନାଗରିକତା ପ୍ରଦାନ କରିବା ବିଷୟରେ ରସିଦ ପୁସ୍ତକରେ ଲେଖିଛନ୍ତି, ମୁଁ ଯାଇ ତାଙ୍କୁ ଭେଟିଥିଲି। ଆମେ କଥାବାର୍ତ୍ତା ଆରମ୍ଭ କଲୁ ଏବଂ ସେ କହିଲେ, ତୁମର ଦେଶର ପରିସ୍ଥିତି ବହୁତ ଖରାପ। ଭାରତରେ ଆସି ରୁହ। ଆମେ ତୁମକୁ ଭାରତୀୟ ଡକ୍ୟୁମେଣ୍ଟ ଦେବୁ। ଏଠାରେ ରୁହ ଏବଂ ଏଠାରେ କ୍ରିକେଟ ଖେଳ। ତାଙ୍କ କଥା ଶୁଣି ମୁଁ ଆଶ୍ଚର୍ଯ୍ୟ ହୋଇଗଲି ଏବଂ କିପରି ଉତ୍ତର ଦେବି ଜାଣି ନ ଥିଲି। କିନ୍ତୁ ମୁଁ ହସିକି କହିଲି ଆପଣଙ୍କୁ ବହୁତ ଧନ୍ୟବାଦ, ମୁଁ ମୋ ଦେଶ ଆଫଗାନିସ୍ତାନ ପାଇଁ ଖେଳିବାକୁ ଚାହେଁ।
ତାଙ୍କୁ ଅଷ୍ଟ୍ରେଲିଆରୁ ମଧ୍ୟ ସମାନ ପ୍ରସ୍ତାବ ମିଳିଥିଲା। ରଶିଦ ଲେଖିଛନ୍ତି, ମୁଁ ଭାରତ ଏବଂ ଅଷ୍ଟ୍ରେଲିଆ ଉଭୟରୁ ସମାନ ପ୍ରସ୍ତାବ (ନାଗରିକତା ଏବଂ କ୍ରିକେଟ ଖେଳିବା) ପାଇଥିଲି। କିନ୍ତୁ ମୁଁ ସେମାନଙ୍କୁ କହିଥିଲି ଯେ, ଯଦି ମୁଁ ମୋ ଦେଶ ପାଇଁ ନ ଖେଳେ, ତେବେ ମୁଁ ଅନ୍ୟ କୌଣସି ଦେଶ ପାଇଁ ଖେଳିବି ନାହିଁ।
ରଶିଦ ଖାନ ଟି-୨୦ କ୍ରିକେଟରେ ଏକ ଅନନ୍ୟ ସ୍ଥାନ ଅଧିକାର କରିଛନ୍ତି। କାରଣ ସେ ବର୍ତ୍ତମାନ ଫର୍ମାଟରେ ସର୍ବାଧିକ ଉଇକେଟ ନେଇଥିବା ଖେଳାଳି। ସେ ୭୦୮ ଉଇକେଟ ନେଇଛନ୍ତି। ରଶିଦ ଟି-୨୦ରେ ୭୦୦ ଉଇକେଟ ଅତିକ୍ରମ କରିଥିବା ପ୍ରଥମ ଖେଳାଳି। ୱେଷ୍ଟଇଣ୍ଡିଜର ଡ୍ବେନ ବ୍ରାଭୋ ୬୩୧ ଉଇକେଟ ସହିତ ପ୍ରମୁଖ ଉଇକେଟ ନେବାର ତାଲିକାରେ ଦ୍ୱିତୀୟ ସ୍ଥାନରେ ଅଛନ୍ତି।
Dharitri – Odisha’s No.1 Odia Daily
