ଥୁଆମୂଳ ରାମପୁର,୨୧ା୪ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲ୍ଲା ଥୁଆମୂଳ ରାମପୁର ବ୍ଲକରେ ପ୍ରସ୍ତାବିତ ସିଜିମାଲି ଖଣି ଖନନକୁ ନେଇ ଅଞ୍ଚଳବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ମଙ୍ଗଳବାର ଦିନ ଶତାଧିକ ସଚେତନ ନାଗରିକ ଏକଜୁଟ ହୋଇ ମୈତ୍ରୀ ଇନଫ୍ରା ଏବଂ ବେଦାନ୍ତ କମ୍ପାନୀ ବିରୋଧରେ ହୁଙ୍କାର ଭରିବା ସହ ଏକ ବିରାଟ ଶୋଭାଯାତ୍ରା କରିଛନ୍ତି। ସ୍ଥାନୀୟ ମାଁ ମାଣିକେଶ୍ୱରୀ ମନ୍ଦିର ପ୍ରାଙ୍ଗଣରୁ ଏକ ବିରାଟ ରାଲି ବାହାରି ସହର ପରିକ୍ରମା କରିଥିଲା। ବିକ୍ଷୋଭକାରୀମାନେ “ବେଦାନ୍ତ କମ୍ପାନୀ ମୂର୍ଦାବାଦ”, “ମୈତ୍ରୀ କମ୍ପାନୀ ମୂର୍ଦାବାଦ” ଏବଂ “ମୈତ୍ରୀ କମ୍ପାନୀ ଗୋ ବ୍ୟାକ୍” ଭଳି ନାରା ଦେଇ ଥୁଆମୂଳ ରାମପୁର ତହସିଲ କାର୍ଯ୍ୟାଳୟ ସମ୍ମୁଖରେ ପହଞ୍ଚିଥିଲେ। ସେଠାରେ ତହସିଲଦାର ସତ୍ୟ ସନାତନ ପାଣିଗ୍ରାହୀ ଏବଂ ଅତିରିକ୍ତ ତହସିଲଦାର ତପନ କୁମାର ପତିଙ୍କ ଉପସ୍ଥିତିରେ କେନ୍ଦ୍ର ଓ ରାଜ୍ୟ ଖଣି ମନ୍ତ୍ରୀଙ୍କ ଉଦ୍ଦେଶ୍ୟରେ ସ୍ମାରକପତ୍ର ପ୍ରଦାନ କରାଯାଇଥିଲା।
ଖଣି ଖନନ ପାଇଁ ନିୟୋଜିତ ମୈତ୍ରୀ ଇନଫ୍ରା (ବେଦାନ୍ତ କମ୍ପାନୀର ସହଯୋଗୀ ସଂସ୍ଥା) ବିରୋଧରେ ଗ୍ରାମବାସୀମାନେ ସାଙ୍ଘାତିକ ଅଭିଯୋଗ ଆଣିଛନ୍ତି। କମ୍ପାନୀ ପକ୍ଷରୁ ପୋଲିସ ଓ ପ୍ରଶାସନର ଭୟ ଦେଖାଇ ସାଧାରଣ ଲୋକଙ୍କୁ ହଇରାଣ କରାଯାଉଥିବା ଏବଂ ଲୋକଙ୍କ ଜମିବାଡ଼ି ଓ ଗଛଲତା ନଷ୍ଟ କରାଯାଉଥିବା ନେଇ ସେମାନେ ଦର୍ଶାଇଛନ୍ତି। ସ୍ଥାନୀୟ ବାସିନ୍ଦାଙ୍କ ଜୀବିକା ଛଡ଼ାଇ ନେବା ପାଇଁ କମ୍ପାନୀ ପକ୍ଷରୁ ଏଭଳି ଦମନଲୀଳା ଚାଲିଥିବା ଅଭିଯୋଗ ହୋଇଛି। ଏହି ପରିପ୍ରେକ୍ଷୀରେ ପ୍ରସ୍ତାବିତ ଖଣି ପାଇଁ ହେବାକୁ ଥିବା ଜନଶୁଣାଣି ଓ ଗ୍ରାମସଭାକୁ ତୁରନ୍ତ ବାତିଲ କରିବାକୁ ଦାବି କରାଯାଇଛି। ଯଦି ଭବିଷ୍ୟତରେ ଗ୍ରାମସଭା ହୁଏ, ତେବେ କେବଳ ଥୁଆମୂଳ ରାମପୁରର ସ୍ଥାନୀୟ ବାସିନ୍ଦାଙ୍କୁ ନେଇ ନିରପେକ୍ଷ ଭାବେ କରାଯାଉ ଏବଂ ବାହାର ଲୋକଙ୍କୁ ଏଥିରୁ ଦୂରେଇ ରଖାଯାଉ ବୋଲି ଲୋକେ ଜିଦ୍ ଧରିଛନ୍ତି। ଯେପର୍ଯ୍ୟନ୍ତ ମୈତ୍ରୀ ଇନଫ୍ରା କମ୍ପାନୀ ଏହି କାର୍ଯ୍ୟରୁ ବାଦ୍ ପଡ଼ିନାହିଁ, ସେପର୍ଯ୍ୟନ୍ତ କୌଣସି କାର୍ଯ୍ୟ ହେବାକୁ ଦିଆଯିବ ନାହିଁ ବୋଲି ପ୍ରଶାସନିକ ହସ୍ତକ୍ଷେପ ଲୋଡ଼ାଯାଇଛି।
ଏହି ପ୍ରତିବାଦ ସଭାରେ ଡମ୍ବରୁଧର ମହାରଣା, ରାବେନା ନାଏକ, ବଳରାମ କବାଡି, ବିଜୟ ପ୍ରଧାନୀ, ସତ୍ୟନାରାୟଣ ସିଂ, କ୍ରିଷ୍ଣା ଚନ୍ଦ୍ର ନାଏକ, ବିଦ୍ୟାଧର ଗୌଡ଼, କବିଟ ଗୌଡ଼, ବିର୍ଶିଂ ମାଝୀ, ରାମେଶ୍ୱର ବାଗ ଓ ମାଗୁ ମାଝୀଙ୍କ ସମେତ ଅନେକ ସଚେତନ ନାଗରିକ ସାମିଲ ଥିଲେ। ଯଦି ପ୍ରଶାସନ ଓ ସରକାର ସ୍ଥାନୀୟ ଲୋକଙ୍କ ସ୍ୱାର୍ଥ ରକ୍ଷା ନକରନ୍ତି, ତେବେ ଆଗାମୀ ଦିନରେ ଏହି ଆନ୍ଦୋଳନକୁ ଆହୁରି ଜୋରଦାର କରାଯିବ ବୋଲି ଅଞ୍ଚଳବାସୀ ଚେତାବନୀ ଦେଇଛନ୍ତି।
