ହାଇଦ୍ରାବାଦ୍,୨୨ା୪: ଅଭିଷେକ ଶର୍ମାଙ୍କ ବିସ୍ଫୋରକ ଅପରାଜିତ ଐତିହାସିକ ଶତକ ବଳରେ ସନରାଇଜର୍ସ ହାଇଦ୍ରାବାଦ୍ (ଏସ୍ଆର୍ଏଚ୍) ମଙ୍ଗଳବାର ଖେଳାଯାଇଥିବା ଆଇପିଏଲ୍ ମ୍ୟାଚ୍ରେ ଦିଲ୍ଲୀ କ୍ୟାପିଟାଲ୍ସ (ଡିସି)କୁ ୪୭ ରନରେ ପରାସ୍ତ କରିଛି। ମ୍ୟାଚ୍ରେ ’ପ୍ଲେୟାର ଅଫ ଦି ମ୍ୟାଚ’ ବିଜେତା ଅଭିଷେକ ଶର୍ମା ୧୩୫ ରନ୍ର ଏକ ରେକର୍ଡ ଇନିଂସ ଖେଳି ଅରେଞ୍ଜ କ୍ୟାପ ହାସଲ କରିବାରେ ସକ୍ଷମ ହୋଇଛନ୍ତି। ଏହି କ୍ୟାପ ଲିଗ୍ରେ ସର୍ବାଧିକ ରନ କରିଥିବା ବ୍ୟାଟ୍ସମ୍ୟାନଙ୍କୁ ପ୍ରଦାନ କରାଯାଇଥାଏ। ପୂର୍ବରୁ ହେନରିଚ କ୍ଲାସେନଙ୍କ ହାତରେ ଏହି କ୍ୟାପ ଥିଲା। ବର୍ତ୍ତମାନ ସେ ଅଭିଷେକଙ୍କଠାରୁ ମାତ୍ର ୩ ରନ୍ ପଛରେ ରହିଛନ୍ତି।
ହାଇଦ୍ରାବାଦ୍ ଲାଗି ଏହା ହ୍ୟାଟ୍ରିକ ବିଜୟ ଏବଂ ସପ୍ତମ ମ୍ୟାଚ୍ରେ ଚତୁର୍ଥ ବିଜୟ। ଏହି ବିଜୟ ସହ ହାଇଦ୍ରାବାଦ୍ ୮ ପଏଣ୍ଟ ପାଇ ତୃତୀୟ ସ୍ଥାନକୁ ଉନ୍ନିତ ହୋଇଛି। ଅନ୍ୟପକ୍ଷରେ ଦିଲ୍ଲୀ ପାଇଁ ୬ ମ୍ୟାଚ୍ରେ ତୃତୀୟ ପରାଜୟ।
ବ୍ୟାଟିଂ କରିଥିବା ହାଇଦ୍ରାବାଦ୍ ନିର୍ଦ୍ଧାରିତ ୨୦ ଓଭରରେ ୨ ଉଇକେଟରେ ୨୪୨ ରନ କରିଥିଲା। ଦଳ ପାଇଁ ଅଭିଷେକ ଶର୍ମା ୬୮ ବଲରେ ୧୦ ଲେଖାଏ ଚୌକା ଓ ଛକା ସହିତ ୧୩୫ ରନର ଅପରାଜିତ ଶତକୀୟ ଇନିଂସ ଖେଳିଥିଲେ। ଏହା ତାଙ୍କର ଦ୍ୱିତୀୟ ଆଇପିଏଲ୍ ଓ ନବମ ଟି୨୦ ଶତକ ଥିଲା।
ଅନ୍ୟମାନଙ୍କ ମଧ୍ୟରେ ଟ୍ରାଭିସ ହେଡ୍ ୨୬ ବଲରେ ୩୭ (୨ ଲେଖାଏ ଚୌକା ଓ ଛକା) ଓ ହେନରିଚ୍ କ୍ଲାସେନ ୧୩ ବଲରେ ୩୭ ( ୩ ଲେଖାଏ ଚୌକା ଓ ଛକା) ରନ କରି ଅପରାଜିତ ରହିଥିଲେ।
ଜବାବରେ ଦିଲ୍ଲୀ ଆରମ୍ଭରୁ ପଥୁମ ନିଶଙ୍କା (୮)ଙ୍କ ଉଇକେଟ ହରାଇଥିଲା। ଲୋକେଶ ରାହୁଲ ଓ ନୀତୀଶ ରାଣା ଦ୍ୱିତୀୟ ଉଇକେଟରେ ୪୫ ବଲରେ ୮୬ ରନ ଯୋଡ଼ି ଦଳୀୟ ସ୍କୋରକୁ ୧୦୦ ଅତିକ୍ରମ କରାଇଥିଲେ। ପରେ ଦଳ କ୍ରମାଗତ ବ୍ୟବଧାନରେ ନୀତୀଶ (୩୦ ବଲ, ୫୭ ରନ୍, ୭ ଚୌକା ଓ ୩ ଛକା), ରାହୁଲ (୨୩ ବଲ, ୩୭ ରନ, ୧ ଚୌକା ଓ ୩ ଛକା) ଓ ଡେଭିଡ୍ ମିଲର (୦)ଙ୍କ ଉଇକେଟ ହରାଇଥିଲା।
ସମୀର ରିଜଭି ୨୮ ବଲରେ ୪୧ (୨ ଲେଖାଏ ଚୌକା ଓ ଛକା), ଟ୍ରିଷ୍ଟାନ ଷ୍ଟବ୍ସ ୧୬ ବଲରେ ୨୭ (୩ ଚୌକା ଓ ୧ ଛକା) ଓ ଆଶୁତୋଷ ଶର୍ମା ୧୪ (୨ ଚୌକା) ରନ କରିଥିଲେ। ହେଲେ ତାହା ଦଳର ବିଜୟ ଲାଗି ଯଥେଷ୍ଟ ହୋଇ ନ ଥିଲା। ଦିଲ୍ଲୀ ନିର୍ଦ୍ଧାରିତ ୨୦ ଓଭରରେ ୯ ଉଇକେଟ ହରାଇ ୧୯୫ ରନ କରିଥିଲା।
ଏହି ପ୍ରତିଯୋଗିତାରେ ’ପ୍ଲେୟାର ଅଫ ଦି ମ୍ୟାଚ’ ବିଜେତା ଅଭିଷେକ ଶର୍ମା ୧୩୫ ରନ୍ର ଏକ ରେକର୍ଡ ସ୍ଥାପନକାରୀ ଇନିଂସ ଖେଳିଥିଲେ, ଯାହା ତାଙ୍କୁ ଅରେଞ୍ଜ କ୍ୟାପ ହାସଲ କରିବାରେ ସକ୍ଷମ କରିଥିଲା। ଏହି କ୍ୟାପ ଲିଗ୍ରେ ସର୍ବାଧିକ ରନ କରିଥିବା ବ୍ୟାଟ୍ସମ୍ୟାନ୍ଙ୍କୁ ପ୍ରଦାନ କରାଯାଏ; ତାଙ୍କ ପୂର୍ବରୁ, ହେନରିଚ କ୍ଲାସେନ୍ଙ୍କ ହାତରେ ଏହି କ୍ୟାପ ଥିଲା, ଯିଏ ଏବେ ଅଭିଷେକଙ୍କଠାରୁ ମାତ୍ର ୩ ରନ ପଛରେ ଅଛନ୍ତି।
