ମୁମ୍ବାଇ,୨୦।୩: ତିଲକ ବର୍ମାଙ୍କ ବିସ୍ଫୋରକ ଶତକ ଏବଂ ନମନ ଧୀରଙ୍କ ଦୃଢ଼ ବ୍ୟାଟିଂ ବଳରେ ମୁମ୍ବାଇ ଇଣ୍ଡିଆନ୍ସ ସୋମବାର ଅନୁଷ୍ଠିତ ଗୁଜରାଟ ଟାଇଟନ୍ସ ବିପକ୍ଷ ଆଇପିଏଲ୍ ମ୍ୟାଚରେ ସମ୍ମାନଜନକ ସ୍କୋର କରିଛି। ତିଲକ ୧୦୧ ରନରେ ଅପରାଜିତ ରହିଥିବାବେଳେ ମୁମ୍ବାଇ ୨୦ ଓଭରରେ ୫ ଉଇକେଟ ହରାଇ ୧୯୯ ରନ ସଂଗ୍ରହ କରିଛି। ତିଲକ ମାତ୍ର ୪୫ ବଲ୍ରେ ଶତକ ମାରିଥିଲେ।
ତିଲକ ବର୍ମା ଆଇପିଏଲ ଇତିହାସରେ ମୁମ୍ବାଇ ଇଣ୍ଡିଆନ୍ସ ପାଇଁ ଶତକ ମାରିବାରେ ସବୁଠାରୁ ଦ୍ରୁତତମ ଭାରତୀୟ ଖେଳାଳି ହୋଇଛନ୍ତି। ତିଲକ ବର୍ମାଙ୍କ ପୂର୍ବରୁ ସନଥ ଜୟସୁରିଆ ମାତ୍ର ୪୫ ବଲ୍ରେ ଶତକ ମାରିଥିଲେ। ସେ ୨୦୦୮ରେ ଚେନ୍ନାଇ ସୁପର କିଙ୍ଗ୍ସ ବିପକ୍ଷରେ ଏହି ଇନିଂସ ଖେଳିଥିଲେ। ତିଲକ ୫୨ ବଲ୍ରେ ଶତକ ମାରିଥିବା ସଞ୍ଜୁ ସାମସନଙ୍କ ରେକର୍ଡ ଭାଙ୍ଗିଥିଲେ। ଏହି ଦୁଇଜଣଙ୍କ ବ୍ୟତୀତ କ୍ୱିଣ୍ଟନ ଡି କକ ମଧ୍ୟ ଦ୍ରୁତତମ ଶତକ ମାରିଥିଲେ। ଏହା ଆଇପିଏଲରେ ତିଲକ ବର୍ମାଙ୍କ ପ୍ରଥମ ଶତକ।
ଟସ୍ ଜିତି ଫିଲ୍ଡିଂ ନିଷ୍ପତ୍ତି ନେଇଥିଲେ ଗୁଜରାଟ ଅଧିନାୟକ ଶୁବମନ ଗିଲ୍। ଏକାଧିକ ପରିବର୍ତ୍ତନ ସହ ପଡ଼ିଆକୁ ଓହ୍ଲାଇଥିଲା ମୁମ୍ବାଇ ଇଣ୍ଡିଆନ୍ସ। ଟପ୍ ଅର୍ଡର ବ୍ୟାଟର ଡାନିସ ମେଲଓ୍ବେର ଓ ମିଡିୟମ ଫାଷ୍ଟ ବୋଲର କ୍ରିଶ୍ ଭଗତ ଆଇପିଏଲ୍ ଡେବ୍ୟୁ କରିବାର ସୌଭାଗ୍ୟ ପାଇଥିଲେ। ମେଲଓ୍ବେର ନିଜ ପ୍ରଥମ ମ୍ୟାଚରେ ମାତ୍ର ୨ ରନ କରିବାକୁ ସକ୍ଷମ ହୋଇଥିବାବେଳେ କ୍ୱିଣ୍ଟନ ଡି’କକ୍ ୧୩ ରନରେ ଆଉଟ ହେବାରୁ ମୁମ୍ବାଇ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଫର୍ମ ପାଇଁ ସଂଘର୍ଷ କରୁଥିବା ସୂର୍ଯ୍ୟକୁମାର ଯାଦବ ମଧ୍ୟ ମାତ୍ର ୧୫ ରନରେ ପ୍ୟାଭିଲିୟନ ଫେରିଥିଲେ। ଆରମ୍ଭରେ ଧିମା ଖେଳିଥିବା ତିଲକ ବର୍ମା ପରେ ଦ୍ରୁତ ହାରରେ ରନ ସଂଗ୍ରହ କରିବା ସହ ମୁମ୍ବାଇ ଇନିଂସର ବ୍ୟାଟିଂ ମେରୁଦଣ୍ଡ ସାଜିଥିଲେ। ସେ ୪ର୍ଥ ଉଇକେଟରେ ନମନ ଧୀରଙ୍କ ସହ ୫୨ ଓ ୫ମ ଉଇକେଟରେ ଅଧିନାୟକ ହାର୍ଦ୍ଦିକ ପାଣ୍ଡ୍ୟାଙ୍କ ସହ ୩୮ ବଲ୍ରୁ ୮୧ ରନର ମୂଲ୍ୟବାନ ଭାଗୀଦାରି ଗଢ଼ିଥିଲେ। ଦଳର ସଙ୍କଟ ସମୟରେ ନମନ ୩୨ ବଲ୍ରୁ ୪୫ (୬ ଚୌକା, ୧ ଛକା) ରନ ସଂଗ୍ରହ କରିଥିଲେ। ହାର୍ଦ୍ଦିକ ପ୍ରଭାବୀ ବ୍ୟାଟିଂ କରିପାରି ନ ଥିଲେ ମଧ୍ୟ ତିଲକ ଷ୍ଟୋକପୂର୍ଣ୍ଣ ଶତକ ହାସଲ କରିବାରୁ ମୁମ୍ବାଇ ସ୍କୋର ୧୯୯ ହୋଇ ଯାଇଥିଲା। ୪୫ଟି ବଲ୍ର ସମ୍ମୁଖୀନ ହୋଇଥିବା ତିଲକ ୮ ଚୌକା ଓ ୭ ଛକା ସହାୟତାରେ ୧୦୧ ରନକରି ଅପରାଜିତ ରହିଥିଲେ। ଆଇପିଏଲ୍ରେ ଏହାଥିଲା ତାଙ୍କର ପ୍ରଥମ ଶତକ। ପୂର୍ବରୁ ୮୪*ଥିଲା ତାଙ୍କର ସର୍ବାଧିକ ସ୍କୋର। ଏଠାରେ ପ୍ରଥମ ୨୨ ବଲ୍ରେ ମାତ୍ର ୧୯ ରନ କରିଥିବା ତିଲକ ପରବର୍ତ୍ତୀ ୨୩ ବଲ୍ରେ ୮୨ ରନ ସଂଗ୍ରହ କରି ମୁମ୍ବାଇ ସ୍କୋରକୁ ୧୯୯ରେ ପହଞ୍ଚାଇବାରେ ମୁଖ୍ୟ ଭୂମିକା ଗ୍ରହଣ କରିଥିଲେ। ଗୁଜରାଟ ପକ୍ଷରୁ କାଗିସୋ ରାବାଡ଼ା ୩ଟି ଏବଂ ମହମ୍ମଦ ସିରାଜ ଓ ପ୍ରସିଦ୍ଧ କ୍ରିଷ୍ଣା ଗୋଟିଏ ଲେଖାଏ ଉଇକେଟ ନେଇଥିଲେ।
Dharitri – Odisha’s No.1 Odia Daily
