ଗୁଡ଼ାରି, ୨୨।୪ (ପ୍ରମୋଦ କୁମାର ପତି ): ରାୟଗଡ଼ା ଜିଲା ଚନ୍ଦ୍ରପୁର ବ୍ଲକ୍ର ବକାଗୁଡ଼ା ନିକଟସ୍ଥ ଘାଟିରେ ଭାରସାମ୍ୟ ହରାଇ ଏକ ମୋଟର ସାଇକେଲ ମଙ୍ଗଳବାର ଅପରାହ୍ନରେ ଦୁର୍ଘଟଣାଗ୍ରସ୍ତ ହୋଇଛି। ଦୁର୍ଘଟଣାରେ ବଡଭାଇଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବାବେଳେ ସାନଭାଇ ଗୁରୁତର ଅବସ୍ଥାରେ ଗୁଡାରି ମେଡିକାଲରେ ଭର୍ତ୍ତି ହୋଇଥିଲେ। ତାଙ୍କ ଅବସ୍ଥା ଗୁରୁତର ଥିବାରୁ ପ୍ରାଥମିକ ଚିକତ୍ସା ପରେ ତାଙ୍କୁ ରାୟଗଡ଼ା ଜିଲା ମୁଖ୍ୟ ଚିକିତ୍ସାଳୟକୁ ପଠାଯାଇଛି। ଏହି ଦୁର୍ଘଟଣାରେ ତାଙ୍କର ୩ ବର୍ଷର ନାତୁଣୀ ସୁରକ୍ଷିତ ଥିବା ଚିକିତ୍ସା କରୁଥିବା ଡାକ୍ତର ସୂଚନା ଦେଇଛନ୍ତି। ମୃତକ ହେଲେ ଗୁଡାରି ବ୍ଲକ୍ ଏମ୍କେରାଇ ଗ୍ରାମପଞ୍ଚାୟତ ଜଳନିଧିର ଗ୍ରାମର ବୃନ୍ଦାବନ ମୁଗୁଲି (୫୫)।
ସୂଚନା ମୁତାବକ, ଗୁଡ଼ାରି ବ୍ଲକ୍ର ଏମ୍କେରାଇ ଗ୍ରାମପଞ୍ଚାୟତ ଜଳନିଧିର ଗ୍ରାମର ୨ ଭାଇ ବୃନ୍ଦାବନ ମୁଗୁଲି ଓ କୈଳାସ ମୁଗୁଲି (୪୦) କନ୍ଧମାଳ ଜିଲାର ମିଡ଼ିଆଘାଟିକୁ ଭୋଜି ଖାଇବାକୁ ଯାଇଥିଲେ। ସେଠାରୁ ଫେରିବା ସମୟରେ ଚନ୍ଦ୍ରପୁର ବ୍ଲକ୍ର ବୁଡୁବାଲି ଗ୍ରାମପଞ୍ଚାୟତର କମାରଗୁଡ଼ିରେ ତାଙ୍କ ବିବାହିତ ଝିଅ ଘରକୁ ଯାଇ କଥାବାର୍ତ୍ତା ହେବା ସହ ୩ ବର୍ଷର ନାତୁଣୀକୁ ମୋଟରସାଇକେଲରେ ଧରି ନିଜ ଗାଁକୁ ଫେରୁଥିଲେ। ଚନ୍ଦ୍ରପୁର ବ୍ଲକ୍ର ବକାଗୁଡା ନିକଟସ୍ଥ ଘାଟିରେ ଭାରସାମ୍ୟ ହରାଇ ମୋଟର ସାଇକେଲ ଦୁର୍ଘଟଣାଗ୍ରସ୍ତ ହୋଇଥିଲା। ଏହି ଖବର ଶୁଣିବା ପରେ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି।
