ବେଜିଂ,୨୧।୪: ଚାଇନା ତାଇୱାନର ରାଷ୍ଟ୍ରପତି ୱିଲିୟମ୍ ଲାଇ ଚିଙ୍ଗ-ତେଙ୍କ ବିରୁଦ୍ଧରେ ଏକ ସାଇଲେଣ୍ଟ ଗେମ୍ ଖେଳିଛି। ଫଳସ୍ୱରୂପ, ରାଷ୍ଟ୍ରପତି ଲାଇ ତାଙ୍କ ଘର ଅର୍ଥାତ୍ ଦେଶ ବାହାରକୁ ଯାଇ ପାରିବେ ନାହିଁ। ତାଇୱାନ ସରକାରଙ୍କ ଜଣେ ମୁଖପାତ୍ର କହିଛନ୍ତି ଯେ, ଚାଇନା ଚାପ ଯୋଗୁଁ, ରାଷ୍ଟ୍ରପତି ଲାଇ ଏସ୍ୱାଟିନିକୁ ଯୋଜନାବଦ୍ଧ ଗସ୍ତ କରିପାରିବେ ନାହିଁ । କାରଣ ସେଚେଲ୍ସ, ମାଡାଗାସ୍କର ଏବଂ ମରିସସ୍ ଏସୱାଟିନିକୁ ଯିବା ରାସ୍ତାରେ ତାଇୱାନ ରାଷ୍ଟ୍ରପତିଙ୍କୁ ସେମାନଙ୍କ ଆକାଶ ମାର୍ଗ ଦେଇ ଉଡ଼ାଣ ପାଇଁ ଅନୁମତି ମନା କରିଛନ୍ତି । ଆଶ୍ଚର୍ଯ୍ୟଜନକ ଭାବରେ, କିଛି ଦିନ ପୂର୍ବରୁ ଚାଇନା ତାଇୱାନକୁ ଘେରି ରହିଥିବା ଆକାଶ ମାର୍ଗ ବନ୍ଦ କରିବାକୁ ନିଷ୍ପତ୍ତି ନେଇଥିଲା।
ତାଇୱାନ ସରକାର ଉଲ୍ଲେଖ କରିଛନ୍ତି ଯେ, ଦେଢ଼ ବର୍ଷ ମଧ୍ୟରେ ପ୍ରଥମ ଥର ପାଇଁ ଚାଇନାର କାର୍ଯ୍ୟକଳାପ ଯୋଗୁଁ ତାଇୱାନ ରାଷ୍ଟ୍ରପତି କୌଣସି ବିଦେଶୀ ରାଷ୍ଟ୍ର ଗସ୍ତ କରିପାରିବେ ନାହିଁ । ତାଙ୍କର ଏସୱାଟିନି ଯାତ୍ରା ବାତିଲ କରାଯାଇଛି । ରାଷ୍ଟ୍ରପତି ଲାଇ ଚାଇନା ସରକାରଙ୍କୁ ଟାର୍ଗେଟ କରି କହିଛନ୍ତି ଯେ ସମଗ୍ର ବିଶ୍ୱ ଚାଇନାର ଏହି ଆଚରଣ ଦେଖୁଛି ଏବଂ ଚାଇନା ଏଥିରୁ ସମ୍ପୂର୍ଣ୍ଣ କିଛି ପାଇବ ନାହିଁ । ମାଡାଗାସ୍କରର ବୈଦେଶିକ ମନ୍ତ୍ରଣାଳୟର ଜଣେ ଅଧିକାରୀ କହିଛନ୍ତି, “ଆମେ କେବଳ ଚାଇନାକୁ ଚିହ୍ନିଛୁ। ତେଣୁ ତାଇୱାନ ରାଷ୍ଟ୍ରପତିଙ୍କ ବିମାନ ଯାତ୍ରା ଉପରେ ପ୍ରତିବନ୍ଧକ ଲଗାଯାଇଛି।” ଚାଇନା ତାଇୱାନକୁ ଘେରି ରହିଛି । ଆମେରିକାର ସୁରକ୍ଷା ଅଧିକାରୀମାନେ ବିଶ୍ୱାସ କରନ୍ତି ଯେ ଚାଇନା ୨୦୨୭ ଶେଷ ସୁଦ୍ଧା ତାଇୱାନ ଉପରେ ଆକ୍ରମଣ କରିପାରେ।
