ବେଙ୍ଗାଲୁରୁ,୧୨।୬: କର୍ନାଟକର ରାଜଧାନୀ ବେଙ୍ଗାଲୁରୁର ଅନେକାଲ ଅଞ୍ଚଳରୁ ଏକ ଲୋମହର୍ଷଣକାରୀ ଘଟଣା ସାମ୍ନାକୁ ଆସିଛି। ୨୮ ବର୍ଷୀୟ ଶଙ୍କର ତାଙ୍କ ପତ୍ନୀ ମନସା (୨୬)ଙ୍କୁ ନିର୍ମମ ଭାବରେ ହତ୍ୟା କରିଥିଲେ ଏବଂ ରାତି ୧ଟାରେ ତାଙ୍କ କଟା ମୁଣ୍ଡ ନେଇ ନିଜେ ପୋଲିସ ଷ୍ଟେଶନରେ ପହଞ୍ଚିଥିଲେ। ଅବୈଧ ସମ୍ପର୍କକୁ ନେଇ ବିବାଦ ପରେ ଏହି ଘଟଣା ଘଟିଥିଲା।
ଶଙ୍କର ଏବଂ ତାଙ୍କ ପତ୍ନୀ ମନସା କିଛି ଦିନ ପୂର୍ବରୁ ବେଙ୍ଗାଲୁରୁ ଗ୍ରାମୀଣ ଜିଲାର ହିଲାଲିଗେ ଗାଁରେ ଏକ ଭଡା ଘରେ ରହିବାକୁ ଆସିଥିଲେ। ଶଙ୍କର ପେଶାରେ ଜଣେ ଶ୍ରମିକ ଏବଂ ସବୁଦିନ ପରି ଜୁନ ୩ ରାତିରେ କାମ କରିବାକୁ ଯାଉଥିବା କହି ଘରୁ ବାହାରି ଆସିଥିଲେ।
ଶଙ୍କର କହିଛନ୍ତି, ସେ ଜୁନ ୩ ରାତିରେ ଶୀଘ୍ର କାମ ଶେଷ କରି ହଠାତ୍ ଘରକୁ ଫେରି ଆସିଥିଲେ। ଯେତେବେଳେ ସେ ଘରେ ପହଞ୍ଚିଲେ, ସେ ତାଙ୍କ ସ୍ତ୍ରୀଙ୍କୁ ଅନ୍ୟ ଜଣେ ପୁରୁଷ ସହିତ ପାଇଥିଲେ। ଏହି ବିଷୟକୁ ନେଇ ଉଭୟଙ୍କ ମଧ୍ୟରେ ପ୍ରବଳ ଝଗଡ଼ା ହୋଇଥିଲା। ଏହି ଘଟଣା ପରେ ମନସା ଘରୁ ବାହାରି ଯାଇଥିଲେ।
ପୋଲିସ ଅନୁଯାୟୀ, ଗତ କିଛି ଦିନ ଧରି ମନସା ବାରମ୍ବାର ଘରକୁ ଫେରୁଥିଲେ ଏବଂ ଶଙ୍କରଙ୍କୁ ମାନସିକ ଭାବରେ ହଇରାଣ କରୁଥିଲେ। ହତ୍ୟାର ଗୋଟିଏ ରାତିରେ ମଧ୍ୟ ସେ ଘରକୁ ଆସି ବହୁତ ହଙ୍ଗାମା କରିଥିଲେ। ଏହି ଉତ୍ତେଜନା ଶଙ୍କରଙ୍କୁ ମାନସିକ ଭାବରେ ଭାଙ୍ଗି ଦେଇଥିଲା। କ୍ରୋଧରେ ଶଙ୍କର ୪ ଜୁନ ରାତିରେ ମାନସାଙ୍କ ଗଳା କାଟି ହତ୍ୟା କରିଥିବା ଅଭିଯୋଗ ହୋଇଛି। ଏହା ପରେ, ସେ ତାଙ୍କ କଟା ମୁଣ୍ଡକୁ ଏକ ବ୍ୟାଗରେ ରଖି ସିଧା ସୂର୍ଯ୍ୟନଗର ପୋଲିସ ଷ୍ଟେଶନକୁ ଯାଇ ଆତ୍ମସମର୍ପଣ କରିଥିଲେ।
ବେଙ୍ଗାଲୁରୁ ଗ୍ରାମୀଣ ପୋଲିସ ଅଧୀକ୍ଷକ (ଏସପି) ସିକେ ବାବା କହିଛନ୍ତି, ଘଟରା ଦିନ ରାତିରେ ସ୍ବାାମୀ ଏବଂ ସ୍ତ୍ରୀଙ୍କ ମଧ୍ୟରେ ଝଗଡ଼ା ହୋଇଥିଲା। ସେହି ସମୟରେ ସ୍ବାମୀ ସ୍ତ୍ରୀଙ୍କୁ ବହୁତ ମାଡ଼ ମାରିଥିଲେ ଏବଂ ପରେ ତାଙ୍କୁ ହତ୍ୟା କରିଥିଲେ। ହତ୍ୟା ପରେ, ସେ ନିଜେ ପୋଲିସ ଷ୍ଟେଶନକୁ ଆସି ଅପରାଧ ସ୍ବୀକାର କରିଥିଲେ। ପ୍ରେମ ସମ୍ପର୍କ ପ୍ରକାଶ ପାଇବା ପରେ, ଗତ ସପ୍ତାହରୁ ଉଭୟଙ୍କ ମଧ୍ୟରେ ବିବାଦ ଲାଗି ରହିଥିଲା। ସେମାନଙ୍କର ଏକ ପିଲା ମଧ୍ୟ ଅଛି।
ଶଙ୍କରଙ୍କୁ ତୁରନ୍ତ ହେପାଜତକୁ ନିଆଯାଇ ହତ୍ୟା ମାମଲା ରୁଜୁ କରାଯାଇଛି। ସୂର୍ଯ୍ୟନଗର ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଶଙ୍କରଙ୍କ ଅଭିଯୋଗ କେତେ ସତ୍ୟ ଏବଂ ହତ୍ୟା ପୂର୍ବ ଯୋଜନାବଦ୍ଧ ଥିଲା କି ନାହିଁ ତାହା ମଧ୍ୟ ପୋଲିସ ତଦନ୍ତ କରୁଛି।
