ମାଞ୍ଚେଷ୍ଟର,୨୨ା୮(ପି.ଟି.): ପ୍ରଫେଶନାଲ ଫୁଟବଲର୍ସ ଆସୋସିଏଶନ (ପିଏଫ୍ଏ) ପକ୍ଷରୁ ବୁଧବାର ଇଂଲିଶ ସକ୍କରର ଶ୍ରେଷ୍ଠ ଖେଳାଳି ପୁରସ୍କାର ପ୍ରଦାନ କରାଯାଇଛି। ମାଞ୍ଚେଷ୍ଟର ସିଟି ପକ୍ଷରୁ ଖେଳୁଥିବା ଫିଲ ଫୋଡେନ ପୁରୁଷ ବର୍ଗରେ ଓ ମହିଳା ବର୍ଗରେ ଖାଡିଜା ଶ’ଙ୍କୁ ସମ୍ମାନିତ କରାଯାଇଛି। ଫୋଡେନ୍ ଚଳିତ ସିଜନରେ ୧୯ଟି ଗୋଲ ସ୍କୋର କରିଥିଲେ। ମାଞ୍ଚେଷ୍ଟର ସିଟି ପକ୍ଷରୁ ୧୯ ଗୋଲ ସ୍କୋର କରିବା ସହ କ୍ରମାଗତ ଚତୁର୍ଥ ଥର ପ୍ରିମିୟର ଲିଗ୍ ଟାଇଟଲ ବିଜୟୀ କରିଥିଲେ। ଏହା ସହିତ ସେ ୮ଟି ଗୋଲରେ ଆସିଷ୍ଟ ମଧ୍ୟ କରିଥିଲେ। ଅନ୍ୟ ପକ୍ଷରେ ଜାମାଇକା ପକ୍ଷରୁ ଖେଳୁଥିବା ଖାଡିଜା ଶ’ ଚମତ୍କାର ପ୍ରଦର୍ଶନ କରି ଚଳିତ ସିଜନର ଓମେନ୍ସ ସୁପର ଲିଗ୍ରେ ୨୧ ଗୋଲ ସ୍କୋର କରିଥିଲେ। ଗୋଲ ବ୍ୟବଧାନରେ ପଛୁଆ ରହିଥିବା ସିଟି ଅଳ୍ପକେ ଟାଇଟଲ ହାସଲରୁ ବଞ୍ଚିତ ହୋଇଥିଲା। ଚେଲ୍ସୀ ଓମେନ୍ସ ସୁପର ଲିଗ୍ ବିଜୟୀ ହୋଇଥିଲା। ପ୍ରଫେଶନାଲ ଖେଳାଳିଙ୍କ ଭୋଟ ଜରିଆରେ ଉଭୟଙ୍କୁ ଏହି ପୁରସ୍କାର ମିଳିଥିଲା।
ସେହିପରି କ୍ରିଟିକ୍ମାନଙ୍କ ପକ୍ଷରୁ ମଧ୍ୟ ଉଭୟଙ୍କୁ ଶ୍ରେଷ୍ଠ ଖେଳାଳି ପୁରସ୍କାର ପ୍ରଦାନ କରାଯାଇଛି। ଚେଲ୍ସୀର ଆଟାକିଂ ମିଡଫିଲ୍ଡର କୋଲ୍ ପାଲମରଙ୍କୁ ଶ୍ରେଷ୍ଠ ଯୁବ ଖେଳାଳି ଭାବରେ ସମ୍ମାନିତ କରାଯାଇଛି। ମାଞ୍ଚେଷ୍ଟର ୟୁନାଇଟେଡ୍ ମହିଳା ଦଳର ମିଡଫିଲ୍ଡର ଗ୍ରେସ୍ କ୍ଲିଣ୍ଟନଙ୍କୁ ଶ୍ରେଷ୍ଠ ଯୁବ ଖେଳାଳି ପୁରସ୍କାର ମିଳିଛି। ପାଲ୍ମର ଚେଲ୍ସୀ ପକ୍ଷରୁ ୨୨ଟି ଗୋଲ୍ ସ୍କୋର କରିଥିବା ବେଳେ ୧୧ଟି ଆସିଷ୍ଟ କରିଛନ୍ତି। ଦ୍ୱିତୀୟ ଚେଲ୍ସୀ ଖେଳାଳି ଭାବରେ ସେ ଏହି ସଫଳତା ହାସଲ କରିଛନ୍ତି। ୨୦୨୩ରେ ଚେଲ୍ସୀ ପକ୍ଷରୁ ଖେଳୁଥିବା ଏର୍ଲିଙ୍ଗ ହାଲାଣ୍ଡ ଏହି ପୁରସ୍କାର ହାସଲ କରିଥିଲେ। ଅନ୍ୟ ପକ୍ଷରେ ଗ୍ରେସ୍ କ୍ଲିଣ୍ଟନ ବର୍ତ୍ତମାନ ଟଟ୍ଟେନହାମ୍ ପକ୍ଷରୁ ଲୋନରେ ଖେଳୁଛନ୍ତି।
