ମୁମ୍ବାଇ, ୨୫।୫: ଭାରତୀୟ କ୍ରିକେଟ ଦଳର ପରବର୍ତ୍ତୀ କୋଚ୍ ପାଇଁ ପୂର୍ବତନ ଅଷ୍ଟ୍ରେଲୀୟ ଖେଳାଳିଙ୍କୁ ଅଫର ଦିଆଯାଇଥିଲା ବୋଲି ଯାହା ଆଲୋଚନା ହେଉଛି ତାହାକୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସମ୍ପାଦକ ଜୟ ଶାହା ଖଣ୍ଡନ କରିଛନ୍ତି। ରାହୁଲ ଡ୍ରାଭିଡଙ୍କ ଉତ୍ତରାଧିକାରୀ ଜଣେ ଭାରତୀୟ ହେବେ, ଯିଏକି ଭାରତୀୟ କ୍ରିକେଟ ଢାଞ୍ଚାକୁ ଭଲଭାବେ ବୁଝିଥିବେ ବୋଲି ଶାହା ସ୍ପଷ୍ଟ କରିଛନ୍ତି। ଡ୍ରାଭିଡ କୋଚ୍ ପଦରେ ଅପରିବର୍ତ୍ତିତ ରହିବାକୁ ଆଗ୍ରହୀ ନ ଥିବା ବୋର୍ଡକୁ ଜଣାଇ ଦେଇଛନ୍ତି ବୋଲି ରିପୋର୍ଟମାନ ପ୍ରକାଶ ପାଇଛି। ଅନ୍ୟପକ୍ଷରେ ଏହି ହାଇ ପ୍ରୋଫାଇଲ ପୋଜିଶନ ପାଇଁ ତାଙ୍କୁ ଆପ୍ରୋଚ କରାଯାଇଥିଲା ଏବଂ ରିକି ପଣ୍ଟିଂ ଓ ଜଷ୍ଟିନ ଲାଙ୍ଗରଙ୍କ ପରି ପୂର୍ବତନ ଅଷ୍ଟ୍ରେଲିଆ ଖେଳାଳି ଅନିଚ୍ଛା ପ୍ରକାଶ କରିଥିବା ଉକ୍ତ ରିପୋର୍ଟରେ ଦର୍ଶାଯାଇଛି। ଏହାକୁ ନେଇ ଶାହା ଏକ ବିବୃତି ମାଧ୍ୟମରେ ସ୍ପଷ୍ଟ କରିଛନ୍ତି ଯେ, ”ମୁଁ କିମ୍ବା ବିସିସିଆଇର ଅନ୍ୟ କେହି କୌଣସି ପୂର୍ବତନ ଅଷ୍ଟ୍ରେଲୀୟ କ୍ରିକେଟରଙ୍କୁ କୋଚ୍ ଅଫର ଦେଇନାହୁଁ। କେତେକ ମିଡିଆରେ ଏ ସମ୍ପର୍କରେ ଯାହା ପ୍ରସାରିତ ହେଉଛି ସେଥିରେ ସତ୍ୟତା ନାହିଁ“।
ଉଭୟ ପଣ୍ଟିଂ ଓ ଲାଙ୍ଗର ଇଣ୍ଡିଆନ ପ୍ରିମିୟର ଲିଗ୍ରେ ମୁଖ୍ୟ କୋଚ୍ଭାବେ ଯଥାକ୍ରମେ ଦିଲ୍ଲୀ କ୍ୟାପିଟାଲ୍ସ ଓ ଲକ୍ଷ୍ନୌ ସୁପର ଜାଏଣ୍ଟ୍ସ ଦଳର ଦାୟିତ୍ୱରେ ଥିଲେ। ବର୍ତ୍ତମାନ କୋଲକାତା ନାଇଟ ରାଇଡର୍ସ ଦଳର ମେଣ୍ଟର ଥିବା ବିଶ୍ୱକପ ବିଜୟୀ ପୂର୍ବତନ ବ୍ୟାଟିଂ ତାରକା ଗୌତମ ଗମ୍ଭୀର କୋଚ୍ ଦୌଡ଼ର ସର୍ବାଗ୍ରେ ରହିଥିବା ଆକଳନ କରାଯାଉଛି। ”ଆମ ଜାତୀୟ ଦଳପାଇଁ ଉପଯୁକ୍ତ କୋଚ୍ ଲାଗି ଏକ କଷ୍ଟସାଧ୍ୟ ପ୍ରକ୍ରିୟା। ଏଥିପାଇଁ ସାବଧାନତା ଅବଲମ୍ବନ କରିବାକୁ ପଡ଼ିଥାଏ। ଭାରତୀୟ କ୍ରିକେଟର ଢାଞ୍ଚାସହ ଭଲଭାବେ ପରିଚିତ ଥିବା ଜଣେ ବ୍ୟକ୍ତିଙ୍କ ସନ୍ଧାନରେ ଅଛୁ“। ପରବର୍ତ୍ତୀ କୋଚ୍ ପାଇଁ ଭାରତୀୟ ଘରୋଇ କ୍ରିକେଟ ପ୍ରତି ଗଭୀର ଜ୍ଞାନକୁ ମଧ୍ୟ ଅନ୍ୟତମ ଗୁରୁତ୍ୱପୂର୍ଣ୍ଣ ମାନଦଣ୍ଡ ରୂପେ ନିଆଯିବ ବୋଲି ଶାହା କହିଛନ୍ତି। କୋଚ୍ ପଦପାଇଁ ଆବେଦନର ଶେଷ ତାରିଖ ମେ’ ୨୭କୁ ଧାର୍ଯ୍ୟ କରାଯାଇଛି।
ପ୍ରକାଶ ଯୋଗ୍ୟ, ଗତ ଗୁରୁବାର ପଣ୍ଟିଂ ଦାବି କରିଥିଲେ ଯେ, ତାଙ୍କୁ ଏହି ପଦପାଇଁ ଆପ୍ରୋଚ୍ କରାଯାଇଥିଲା। ମାତ୍ର ବର୍ତ୍ତମାନ ତାଙ୍କ ଲାଇଫ୍ଷ୍ଟାଇଲ ସହ ଖାପ୍ ଖାଉ ନ ଥିବାରୁ ସେ ଏହାକୁ ଅସ୍ବୀକାର କରିଥିଲେ। ସେହିପରି ଲାଙ୍ଗର ଏ କ୍ଷେତ୍ରରେ ଲକ୍ଷ୍ନୌ ସୁପର ଜାଏଣ୍ଟ୍ସ ଅଧିନାୟକ ଲୋକେଶ ରାହୁଲଙ୍କ ଗୁରୁତ୍ୱପୂର୍ଣ୍ଣ ପରାମର୍ଶକୁ ଗ୍ରହଣ କରିଥିବା ପ୍ରକାଶ କରିଛନ୍ତି। ” ମୁଁ ଏ ସମ୍ପର୍କରେ ରାହୁଲଙ୍କ ସହ ଆଲୋଚନା କରିଥିଲି। ସେ କହିଥିଲେ ଯେ, ଏକ ଆଇପିଏଲ୍ ଦଳରେ ଯଦି ପ୍ରେସର ଓ ପଲିଟିକ୍ସ ରହୁଛି ତେବେ ଭାରତୀୟ ଦଳକୁ କୋଚିଂ ଦେବାକୁ ହେଲେ ଏହାର ହଜାରେ ଗୁଣ ଅଧିକ ରହିବ। ତାଙ୍କର ଏହି ପରାମର୍ଶ ମୋତେ ଖୁବ୍ ଭଲ ଲାଗିଥିଲା“ ବୋଲି ବିବିସି ଷ୍ଟମ୍ପେଡ୍ ପୋଡକାଷ୍ଟକୁ ଲାଙ୍ଗର କହିଛନ୍ତି। ପୂର୍ବତନ ଇଂଲଣ୍ଡ ଏବଂ ବର୍ତ୍ତମାନର ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ମୁଖ୍ୟ କୋଚ୍ ଆଣ୍ଡି ଫ୍ଲାଓ୍ବାର ମଧ୍ୟ ନିଜକୁ ଏହି ଦୌଡ଼ରୁ ଓହରାଇ ନେଇଛନ୍ତି। ଫ୍ରାଞ୍ଚାଇଜ୍ କ୍ରିକେଟ ସହିତ ସମ୍ପୃକ୍ତ ରହି ସେ ଖୁସି ଅନୁଭବ କରୁଛନ୍ତି ବୋଲି ପ୍ରକାଶ କରିଛନ୍ତି।
