ବ୍ରଜରାଜନଗର,୫।୪ (ଡି.ଏନ.ଏ.): ଝାରସୁଗୁଡା ଜିଲା ତଥା ସାରା ରାଜ୍ୟରେ ଚହଳ ସୃଷ୍ଟି କରିଥିବା ନାବାଳକ ସମର୍ଥ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଅମିତ ଶର୍ମା ମଙ୍ଗଳବାର ଆତ୍ମହତ୍ୟା ଉଦ୍ୟମ କରିଥିଲେ। ଏହି ଘଟଣାରେ ଗିରଫ ଅମିତ ଓ ଅନ୍ୟ ଜଣେ ଅଭିଯୁକ୍ତଙ୍କୁ ପୋଲିସ ଜେରା ପାଇଁ ଝାରସୁଗୁଡ଼ା ସେକେଣ୍ଡ ବାଟାଲିଅନରେ ରଖିଥିଲା। ପୂର୍ବାହ୍ନରେ ଅମିତ କୌଣସି କାରଣରୁ ରହୁଥିବା କୋଠରୀର ବାଥ୍ରୁମ୍ରେ ଲାଗିଥିବା ଦର୍ପଣ ଭାଙ୍ଗି ଭଙ୍ଗା କାଚରେ ନିଜ ହାତ, ବେକ କାଟି ଆତ୍ମହତ୍ୟା ଉଦ୍ୟମ କରିଥିଲେ। କର୍ତ୍ତବ୍ୟରତ ପୋଲିସ କର୍ମଚାରୀ ତୁରନ୍ତ ତାଙ୍କୁ ଉଦ୍ଧାର କରି କଡ଼ା ସୁରକ୍ଷା ବଳୟ ଭିତରେ ଡାକ୍ତରଖାନା ନେଇଥିଲେ। ସେଠାରେ ଚିକିତ୍ସିତ ହେବା ପରେ ତାଙ୍କୁ ଜେଲକୁ ପଠାଯାଇଥିବା ଆରକ୍ଷୀ ଅଧୀକ୍ଷକ ସ୍ମିଥ ପରମାର ପ୍ରକାଶ କରିଛନ୍ତି। ସୂଚନାଯୋଗ୍ୟ ଝାରସୁଗୁଡ଼ା ସରବହାଲର ସୁମିତ ଅଗ୍ରୱାଲଙ୍କ ପୁଅ ସମର୍ଥ ଅଗ୍ରୱାଲ (୧୫)ଙ୍କୁ ୫୦ଲକ୍ଷ ଟଙ୍କା ପାଇଁ ଗତ ୨୮ତାରିଖରେ ହତ୍ୟା କରାଯାଇଥିଲା। ଏହି ଘଟଣାରେ ପୋଲିସ ଅମିତଙ୍କ ସହ ଦିନେଶ ଅଗ୍ରଓ୍ବାଲଙ୍କୁ ଗିରଫ କରିଛି। ଇତିମଧ୍ୟରେ ପୋଲିସ ଉଭୟ ଅଭିଯୁକ୍ତଙ୍କୁ ଧରି ସିନ୍ ରିକ୍ରିଏଶନ କରିସାରିଲାଣି।
