ପୋଲସରା,୩ା୪(ଡି.ଏନ.ଏ.): ପୋଲସରା ବିଜ୍ଞାପିତ ଅଞ୍ଚଳ ପରିଷଦର ବ୍ୟବସାୟୀମାନଙ୍କ ସୁବିଧା ଲାଗି ୩୯୬.୦୦ଲକ୍ଷରେ ମାର୍କେଟ କମ୍ପ୍ଲେକ୍ସ ନିର୍ମାଣ ଲାଗି ଭୂମି ପୂଜନ କରିବା ସହ ଟେଣ୍ଡର ପ୍ରକ୍ରିୟା ହୋଇଥିଲା। ଟେଣ୍ଡର ପେପରରେ ନିର୍ମାଣ କାର୍ଯ୍ୟର ସମୟସୀମା ଅବଧି ଏକ ବର୍ଷ ରହିଛି, ଯାହାକି ସୂଚନା ଫଳକରେ ଉଲ୍ଲେଖ ରହିଛି। କାର୍ଯ୍ୟାରମ୍ଭ ତାରିଖ ୩୦ା୪ା୨୦୨୧ ରହିଛି ଏବଂ କାର୍ଯ୍ୟ ସମୟସୀମା ୧୨ମାସ ରହିଛି। ଅର୍ଥାତ୍ ୩୦ା୪ା୨୦୨୨ରେ ମାର୍କେଟ କମ୍ପ୍ଲେକ୍ସର ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହେବା କଥା। କିନ୍ତୁ ଏହାର ନିର୍ମାଣ କାର୍ଯ୍ୟ ସରୁନାହିଁ। ନିର୍ଦ୍ଧାରିତ ସମୟସୀମା ଅବଧିଠାରୁ ୧୧ମାସ ବିତିଲାଣି କିନ୍ତୁ ଏହାର ନିର୍ମାଣ କାର୍ଯ୍ୟ ସମ୍ପାଦନ ହୋଇପାରୁନାହିଁ। ଏହିଭଳି କାର୍ଯ୍ୟ ଦେଖିବାକୁ ମିଳିଛି ପୋଲସରା ସହରରେ। ସହରର ଜଣେ ପ୍ରତିଷ୍ଠିତ ବ୍ୟବସାୟୀ କହିଛନ୍ତି, ପ୍ରଶାସନିକ ଅଧିକାରୀଙ୍କ ଅବହେଳା ସାଙ୍ଗକୁ ରବରଷ୍ଟାମ୍ପ ସାଜିଥିବା ନଗରପାଳିକାଙ୍କ ଦାୟିତ୍ୱହୀନତା ଯୋଗୁ ଏହା ବିଳମ୍ବର ମୁଖ୍ୟ କାରଣ। ବ୍ୟବସାୟୀ ହରି ଖଟେଇ କୁହନ୍ତି, ସେହି ସ୍ଥାନରେ ଏନ୍ଏସି ଦୋକାନ ଗୃହ ଦେଇଥିଲା। ଆମେ ଦୋକାନ କରି ଚଳିଆସୁଥିଲୁ। ମାର୍କେଟ କମ୍ପ୍ଲେକ୍ସ ନିର୍ମାଣ ଲାଗି ଆମକୁ ଉଠାଇଲେ, ଅନ୍ୟତ୍ର ସ୍ଥାନାନ୍ତର ହୋଇ ଦୁଃଖ କଷ୍ଟରେ ଦୋକାନ ଚଳାଉଛୁ। ଠିକାଦାର ଓ ଏନ୍ଏସି ପ୍ରଶାସନର ମଧୁଚନ୍ଦ୍ରିକା ଯୋଗୁ ନିର୍ମାଣ କାର୍ଯ୍ୟରେ ବିଳମ୍ବ ଘଟୁଛି। ତୁରନ୍ତ ଏହି ମାର୍କେଟ କମ୍ପ୍ଲେକ୍ସର ନିର୍ମାଣ କାର୍ଯ୍ୟ ସମ୍ପାଦନ କରି ବ୍ୟବସାୟୀମାନଙ୍କୁ ତୁରନ୍ତ ଥଇଥାନ କରନ୍ତୁ ବୋଲି କହିଥିଲେ। ପୋଲସରା ସହର ହେଉଛି ଏହି ଅଞ୍ଚଳର ବ୍ୟବସାୟିକ ପେଣ୍ଠସ୍ଥଳୀ। ଏହି ବଜାର ଉପରେ ୨୬ ପଞ୍ଚାୟତର ପ୍ରାୟ ୧୩୬ ଗୋଟି ଗ୍ରାମର ଲକ୍ଷାଧିକ ଜନସାଧାରଣ ନିର୍ଭର କରୁଛନ୍ତି। ଅନ୍ୟପକ୍ଷରେ ଏନ୍ଏସିର ଯନ୍ତ୍ରୀ ଚିତ୍ରସେନ ରେଡ୍ଡି କୁହନ୍ତି, ବିଦ୍ୟୁତ ଟ୍ରାନ୍ସଫର୍ମର ଯୋଗୁ କିଛି ସମୟ ବିଳମ୍ବ ଘଟିଛି। ଠିକ ସମୟରେ ନିର୍ମାଣ କାର୍ଯ୍ୟ ନ ସରିଲେ ଫାଇନ କରାଯିବ ବୋଲି କହିଥିଲେ। ପ୍ରଶାସନ ଯଦି ଏହି ମାର୍କେଟ କମ୍ପ୍ଲେକ୍ସର ନିର୍ମାଣ କାର୍ଯ୍ୟ ତୁରନ୍ତ ସମ୍ପାଦନ ଦିଗରେ ଦୃଷ୍ଟି ନ ଦିଏ ତା’ହେଲେ ଆଗାମୀ ଦିନରେ ପ୍ରଶାସନକୁ ଉଚିତ ଜବାବ ଦିଆଯିବ ବୋଲି କେତେଜଣ ବ୍ୟବସାୟୀ କହିଛନ୍ତି।
