ନୂଆଦିଲ୍ଲୀ,୧୮ା୩: ଲଣ୍ଡନରେ କଂଗ୍ରେସ ନେତା ରାହୁଲ ଗାନ୍ଧୀ ଭାରତୀୟ ଗଣତନ୍ତ୍ର ଉପରେ ଦେଇଥିବା ମନ୍ତବ୍ୟକୁ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡାଙ୍କ ସମେତ ଦଳର ଅନେକ ନେତା ସମାଲୋଚନା କରିଛନ୍ତି। ଏହାର ଜବାବରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ଶୁକ୍ରବାର କହିଛନ୍ତି, ଯେଉଁମାନେ ଦେଶବିରୋଧୀ ସେମାନେ ଆମକୁ ଦେଶଭକ୍ତିର ପାଠ ପଢ଼ାଇବା ବନ୍ଦ କରନ୍ତୁ। ସେମାନେ ଆମଠୁ ଦେଶଭକ୍ତି ଶିଖିବା ଉଚିତ ହେବ। ନିକଟରେ ନଡ୍ଡା ରାହୁଲଙ୍କୁ ଭାରତ ବିରୋଧୀ ସ୍ଥାୟୀ ଟୁଲ୍କିଟ୍ର ଏକ ଅଂଶ ଭାବେ ଅଭିହିତ କରିଥିଲେ। ଏହା ଉପରେ ଖାର୍ଗେ କହିଛନ୍ତି, ଭାଜପା ନିଜର ସର୍ବୋତ୍ତମ ବନ୍ଧୁଙ୍କ ଦୁର୍ନୀତି, ଦେଶରେ ମୁଦ୍ରସ୍ଫୀତି, ବେରୋଜଗାରି ଭଳି ପ୍ରସଙ୍ଗରୁ ଲୋକଙ୍କ ଧ୍ୟାନ ହଟାଇବା ପାଇଁ ଏପରି ଅଭିଯୋଗ ଆଣୁଛି। ଭାଜପା ନେତାମାନେ ସ୍ବାଧୀନତା ପୂର୍ବରୁ ହିଁ ଦେଶବିରୋଧୀ କାର୍ଯ୍ୟ କରିଆସୁଛନ୍ତି। ସେମାନେ ସ୍ବାଧୀନତା ସଂଗ୍ରାମରେ କେବେହେଲେ ସାମିଲ ହୋଇ ନ ଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୫ରୁ ୭ ଦେଶକୁ ଯାଇ ଭାରତ ବିରୋଧୀ ମନ୍ତବ୍ୟ ଦେଇଥିଲେ। ଏଭଳି ବ୍ୟକ୍ତି ଆମକୁ ଦେଶବିରୋଧୀ ଆଖ୍ୟା ଦେବା ଦୁର୍ଭାଗ୍ୟଜନକ ବୋଲି ଖାର୍ଗେ ଏକାଧିକ ଟୁଇଟ୍ କରି କହିଛନ୍ତି।
