ଅହମଦାବାଦ,୭।୩ : ଗୁଜୁରାଟର ମୋର୍ବି ଝୁଲାପୋଲ ଦୁର୍ଘଟଣା ମାମଲାରେ ଓରେଭା କମ୍ପାନୀର ଏମଡି ଜୟସୁଖଭାଇ ପଟେଲଙ୍କ ମଧ୍ୟବର୍ତ୍ତୀକାଳୀନ ଜାମିନ ଆବେଦନକୁ ଜିଲ ଓ ସେସନ୍ସ କୋର୍ଟ ଖାରଜ କରିଛନ୍ତି। ଏହାପୂର୍ବରୁ ଓରେଭା କମ୍ପାନୀର ପ୍ରମୋଟର ଜୟସୁଖ ପଟେଲଙ୍କ ମଧ୍ୟବର୍ତ୍ତୀକାଳୀନ ଜାମିନ ଆବେଦନକୁ ସରକାର ବିରୋଧ କରିଥିଲେ।
ଏହି ଦୁର୍ଘଟଣାରେ ମୃତ ତଥା ୫୬ ଆହତଙ୍କ ପରିବାରକୁ କ୍ଷତିପୂରଣ ଦେବା ପାଇଁ ଜୟସୁଖ ପଟେଲ ୧୫ ରୁ ୨୦ ଦିନ ପର୍ଯ୍ୟନ୍ତ ଜାମିନ ମାଗିଥିଲେ। ତେବେ ଔପଚାରିକତା ପୂରଣ କରିବା ପାଇଁ ତାଙ୍କ ଉପସ୍ଥିତି ଆବଶ୍ୟକ ନୁହେଁ ବୋଲି ସରକାର ଏହି ଆବେଦନକୁ ବିରୋଧ କରିଛନ୍ତି।
ଫେବୃଆରୀ ୨୨ ରେ, ଗୁଜୁରାଟ ହାଇକୋର୍ଟ ଓରେଭା କମ୍ପାନୀକୁ ଏହି ଦୁର୍ଘଟଣାରେ ମୃତ୍ୟୁ ଘଟିଥିବା ଲୋକଙ୍କ ପରିବାରକୁ ୧୦ ଲକ୍ଷ ଟଙ୍କା ଏବଂ ଚାରି ସପ୍ତାହ ମଧ୍ୟରେ ଆହତମାନଙ୍କୁ ୨ଲକ୍ଷ ଟଙ୍କା କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଥିଲେ। ମାର୍ଚ୍ଚ ୪ ରେ ଏହି ମାମଲାର ଶୁଣାଣି ପରେ ଜିଲା ତଥା ସେସନ୍ସ ଜଜ ପିସି ଜୋଶୀଙ୍କ କୋର୍ଟ ମାର୍ଚ୍ଚ ୭ ପାଇଁ ପଟେଲଙ୍କ ମଧ୍ୟବର୍ତ୍ତୀକାଳୀନ ଜାମିନ ଆବେଦନ ଉପରେ ରାୟ ସଂରକ୍ଷିତ ରଖିଥିଲେ।
ମୋର୍ବି ପୋଲିସ ଦୁର୍ଘଟଣାରେ ପୋଲିସ ଜୟସୁଖ ପଟେଲଙ୍କ ସହ ୧୦ ଜଣଙ୍କୁ ଗିରଫ କରିଛି। ବର୍ତ୍ତମାନ ସମସ୍ତ ଅଭିଯୁକ୍ତ ଜେଲରେ ଅଛନ୍ତି। ସ୍ବତନ୍ତ୍ର ଅନୁସନ୍ଧାନକାରୀ ଦଳ (ଏସଆଇଟି) ଦ୍ୱାରା ଦାଖଲ ହୋଇଥିବା ଚାର୍ଜଶିଟରେ ପଟେଲଙ୍କୁ ଅଭିଯୁକ୍ତ କରାଯାଇଛି। ଏହି ଦୁର୍ଘଟଣାରେ ୧୩୫ ଜଣଙ୍କର ମୃତ୍ୟୁ ହୋଇଥିବାବେଳେ ଅନେକ ଲୋକ ଆହତ ହୋଇଛନ୍ତି। ଏହାର ପ୍ରାଥମିକ ଅନୁସନ୍ଧାନରେ ଏସଆଇଟି ଜାଣିବାକୁ ପାଇଛି ଯେ ଝୁଲାପୋଲର ଅଧାରୁ ଅଧିକ କେବୁଲ ତାରଗୁଡ଼ିକ କଳଙ୍କିତ ହୋଇଥିଲା ଏବଂ ଏଥିରେ ପୁରୁଣା ସସପେଣ୍ଡରଗୁଡ଼ିକ ଲଗାଯାଇଥିଲା। ଯେଉଁଥିପାଇଁ ପୋଲ ଭାର ସହି ନ ପାରି ଭୁଶୁଡି ପଡିଥିଲା।
