ଚେନ୍ନାଇ,୧୯।୨ : ମାର୍ଟିନ ଫାଉଣ୍ଡେଶନ ଡ.ଏପିଜେ ଅବଦୁଲ କଲାମ ସାଟେଲାଇଟ ଲଞ୍ଚ ଭେହିକିଲ ମିଶନ-୨୦୨୩ ଡ. ଏପିଜେ ଅବଦୁଲ କଲାମ ଇଣ୍ଟରନ୍ୟାଶନାଲ ଫାଉଣ୍ଡେଶନ ଏବଂ ସ୍ପେସ ଜୋନ ଇଣ୍ଡିଆର ସହଯୋଗରେ ତାମିଲନାଡୁର ପଟିପୋଲାମ ଗ୍ରାମରୁ ଶୁଭାରମ୍ଭ କରାଯାଇଛି। ଏହି ଅବସରରେ ତେଲେଙ୍ଗାନା ରାଜ୍ୟପାଳ ତାମିଲସାଇ ସୁନ୍ଦରରାଜନ ଉପସ୍ଥିତ ଥିଲେ। ଏହି ସୂଚନା ଏକ ସରକାରୀ ବିବୃତ୍ତିରେ ଦିଆଯାଇଛି।
ଏହି ପଦକ୍ଷେପ ମାଧ୍ୟମରେ ଦେଶର ବିଭିନ୍ନ ପ୍ରାନ୍ତରୁ ଷଷ୍ଠରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ୫୦୦୦ ରୁ ଅଧିକ ଛାତ୍ରୀଛାତ୍ର ୧୫୦ଟି ପିଆଇସିଓ ଉପଗ୍ରହର ପରିକଳ୍ପନା ତଥା ବିକାଶ କରିବାରେ ସକ୍ଷମ ହୋଇଛନ୍ତି। ଯାହାକୁ ରକେଟ ମାଧ୍ୟମରେ ଉତକ୍ଷେପଣ କରାଯିବ।
ବିବୃତ୍ତି ଅନୁଯାୟୀ, ଏହି ମିଶନରେ ମନୋନୀତ ଛାତ୍ରୀଛାତ୍ରମାନଙ୍କୁ ବିଜ୍ଞାନ, ପ୍ରଯୁକ୍ତିବିଦ୍ୟା, ଇଞ୍ଜିନିୟରିଂ ଏବଂ ଗଣିତ ବିଷୟରେ ଅଧିକ ଜାଣିବାକୁ ଏକ ସୁଯୋଗ ପ୍ରଦାନ କରିଛି। ମାର୍ଟିନ ଫାଉଣ୍ଡେଶନ ଏହି ପ୍ରକଳ୍ପ ପାଇଁ ସମୁଦାୟ ୮୫ ପ୍ରତିଶତ ଅର୍ଥ ପ୍ରଦାନ କରିଛି। ମନୋନୀତ ଛାତ୍ରୀଛାତ୍ରମାନଙ୍କୁ ଭର୍ଚୁଆଲ କ୍ଲାସ ମାଧ୍ୟମରେ ଉପଗ୍ରହ ପ୍ରଯୁକ୍ତିବିଦ୍ୟା ବିଷୟରେ ଶିକ୍ଷା ଦିଆଯାଇଛି ଏବଂ ସେମାନଙ୍କୁ ପ୍ରକଳ୍ପ କ୍ଷେତ୍ର ଅନୁସନ୍ଧାନରେ ସାହାଯ୍ୟ କରିବାକୁ ବ୍ୟବହାରିକ ଅଧିବେଶନ କରାଯାଇଛି। ଏହି କ୍ଷେତ୍ରରେ ଉପଲବ୍ଧ ଅନେକ ସୁବିଧା ବିଷୟରେ ସେମାନଙ୍କୁ ମଧ୍ୟ ଅବଗତ କରାଯାଇଛି ।
୧୦୦ରୁ ଅଧିକ ସରକାରୀ ବିଦ୍ୟାଳୟର ମୋଟ ୨ ହଜାର ଛାତ୍ରୀଛାତ୍ର ଏହି ରକେଟ ପ୍ରକଳ୍ପର ଅଂଶ ଅଟନ୍ତି। ସରକାରୀ ବିଦ୍ୟାଳୟର ଛାତ୍ରୀଛାତ୍ରମାନଙ୍କ ପାଇଁ ମହାକାଶ ବିଜ୍ଞାନରେ ତାଲିମ ପ୍ରାପ୍ତ ହେବା ଏବଂ ସେହି କ୍ଷେତ୍ରରେ ସେମାନଙ୍କ କ୍ୟାରିୟର ଅନୁସନ୍ଧାନ ପାଇଁ ଏକ ପ୍ଲାଟଫର୍ମ ପ୍ରଦାନ କରିବାରେ ଏକ ଉତ୍ତମ ମାଧ୍ୟମ ହେବ ବୋଲି ବିବୃତିରେ କୁହାଯାଇଛି।
