ଖଲ୍ଲିକୋଟ,୭ା୨(ଡି.ଏନ.ଏ.): ଗଞ୍ଜାମ ଜିଲା ଖଲ୍ଲିକୋଟ କରଣ ସାହିରେ ମଙ୍ଗଳବାର ପାଇଖାନା ଘରୁ ଜଣେ ଯୁବକଙ୍କ ମୃତଦେହ ପୋଲିସ ଜବତ କରିଛି। ସେ ହେଲେ ଖଲ୍ଲିକୋଟ ଖୋଲ ସାହିର ଗଙ୍ଗାଧର ପ୍ରଧାନଙ୍କ ପୁଅ ମିଲୁ (୨୪)। ହତ୍ୟା ସନ୍ଦେହରେ ପୋଲିସ ଜଣେ ମହିଳାଙ୍କୁ ଥାନାକୁ ନେଇ ପଚରାଉଚରା କରୁଛି।
ମିଲୁ ଜଣେ ମହିଳାଙ୍କ ଘରକୁ ଯିବା ଆସିବା କରନ୍ତି। ମଙ୍ଗଳବାର ସେହି ମହିଳାଙ୍କ ଘରର ପଡିଶା ଘର ପାଇଖାନା ଘରୁ ମିଲୁଙ୍କ ମୃତଦେହ ମିଳିଥିଲା। ପାଇଖାନା ଘରରେ ଏକ ଲୁଗା ବନ୍ଧା ଯାଇ ତଳକୁ ଓହଳି ରହିଥିବା ବେଳେ ମିଲୁଙ୍କ ମୃତଦେହ ତଳେ ବସିଥିବା ଅବସ୍ଥାରେ ରହିଛି। ପାଖରେ କିଛି ରକ୍ତ ମଧ୍ୟ ପଡିଥିବା ଦେଖିବାକୁ ମିଳିଛି। ପାରିପାଶର୍ବିକ ସ୍ଥିତିରୁ ମିଲୁଙ୍କୁ ହତ୍ୟା କରାଯାଇଥିବା ସନ୍ଦେହକରି ପରିବାର ଲୋକେ ସ୍ଥାନୀୟ ଥାନାରେ ଏତଲା ଦେଇଥିଲେ। ଫରେନସିକ୍ ଟିମ ପହଞ୍ଚି ଘଟଣାସ୍ଥଳ ଯାଞ୍ଚ କରି ଫେରିବା ପରେ ପୋଲିସ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠେଇଥିଲା। ସମ୍ପୃକ୍ତ ମହିଳାଙ୍କୁ ପୋଲିସ ଥାନାକୁ ନେଇ ପଚରାଉଚରା କରୁଛି। ତେବେ ସମ୍ପୃକ୍ତ ମହିଳାଙ୍କୁ ଥାନାକୁ ନେବା ବେଳେ ସେଠାରେ ଉତ୍ତେଜନା ମୂଳକ ପରିସ୍ଥିତି ସୃଷ୍ଟି ହୋଇଥିଲା। ମୃତ ଯୁବକଙ୍କ ସମ୍ପର୍କୀୟ ଲୋକେ ମହିଳାଙ୍କୁ ଆକ୍ରମଣ କରିବା ପାଇଁ ଉଦ୍ୟମ କରୁଥିବା ବେଳେ ଆଇଆଇସି ଜଗନ୍ନାଥ ମଲ୍ଲିକ କୌଶଳ କ୍ରମେ ପୋଲିସ ଗାଡ଼ିରେ ବସାଇ ମହିଳାଙ୍କୁ ଥାନାକୁ ନେବାରେ ସଫଳ ହୋଇଥିଲେ। ମୃତଦେହ ବ୍ୟବଚ୍ଛେଦ ରିପୋର୍ଟ ଆସିବା ପରେ ଏହା ହତ୍ୟା ନା ଆତ୍ମହତ୍ୟା ତାହା ସ୍ପଷ୍ଟ ହେବ ବୋଲି ପୋଲିସ କହିଛି। ଉପଯୁକ୍ତ ତଦନ୍ତ କରି ନ୍ୟାୟ ପ୍ରଦାନ ନ କଲେ ତେବେ ଖଲ୍ଲିକୋଟ ଥାନା ସମ୍ମୁଖରେ ଆତ୍ମାହୁତି ଦେବେ ବୋଲି ମୃତ ମିଲୁଙ୍କ ମା’ ଓ ଭଉଣୀ ଚେତାବନୀ ଦେଇଛନ୍ତି। ଏ ଏ ନେଇ ଖଲ୍ଲିକୋଟ ଥାନରେ ନଂ. ୪/୨୩ ଅନୁଯାୟୀ ଏକ ଅପମୃତ୍ୟୁ ମାମଲା ରୁଜୁ କରାଯାଇଛି।
