ଗୋପାଳପୁର,୬ା୨(ଡି.ଏନ.ଏ.): ଗୋଳନ୍ଥରା ଥାନା କନିଷି ହାଟ ଅଞ୍ଚଳରେ ଏକ ପରିବାରକୁ ଅଶ୍ଳୀଳ ଗାଳିଗୁଲଜ ସହ ୨ ଭାଇଙ୍କୁ ମରଣାନ୍ତକ ଆକ୍ରମଣ ହୋଇଥିଲା। ଏହି ମାମଲାରେ ପୋଲିସ ସୋମବାର ହଳଦିଆପଦର ଓ ଗୋଷଣୀନୂଆଗାଁ ଅଞ୍ଚଳର ୭ ଯୁବକଙ୍କୁ ଗିରଫ ପରେ କୋର୍ଟ ଚାଲାଣ କରିଛି। ସେମାନେ ହେଲେ ହଳଦିଆପଦର ଗ୍ରାମର ପ୍ରଦୀପ ବାଡତ୍ୟା, ଚନ୍ଦନ ସେଠୀ ଓରଫ ଜାଟି କାଳିଆ, ଶିଶିର ଦାଶ, କିରଣ ବେହେରା, ଅମୀୟ ରଞ୍ଜନ ପଟ୍ଟନାୟକ ଓରଫ ବୁବୁନ ଏବଂ ଗୋଷଣୀନୁଆଗାଁର ସମୀର କୁମାର ସାହୁ ଓ ସଦାନନ୍ଦ ଦାସ । ଅଭିଯୁକ୍ତମାନଙ୍କ ଠାରୁ ଏକ ପିସ୍ତଲ, ୩ ଖଣ୍ଡା ଓ ଏକ ଲୁହାରଡ଼ ଜବତ ହୋଇଥିବା ପୋଲିସ ସୂଚନା ଦେଇଛି।
ଗତ ଶନିବାର ରାତି ପ୍ରାୟ ୧୦ଟାରେ କନିଷି ହାଟ କେନାଲ ସାହିରେ ଘରେ ପଶି ଅଭିଯୁକ୍ତମାନେ ସୁଜାତା ପାତ୍ର ଏବଂ ତାଙ୍କ ଝିଅକୁ ଅଶ୍ଳୀଳ ଗାଳିଗୁଲଜ କରିବା ସହ ଅସଦାଚରଣ କରିଥିଲେ। ସେଠାରେ ଉପସ୍ଥିତ ଦୁଇ ପୁଅ ସୁମନ ଓ କୋକଙ୍କୁ ଘରୁ ଟାଣିନେଇ ଖଣ୍ଡା ଏବଂ ଲୁହା ରଡ଼ରେ ମରଣାନ୍ତକ ଆକ୍ରମଣ କରିଥିବା ନେଇ ସୁଜାତା ଗୋଳନ୍ଥରା ଥାନାରେ ଅଭିଯୋଗ କରିଥିଲେ। ପୋଲିସ ନଂ ୬୭ /୨୩ରେ ମାମଲା ରୁଜୁ କରି ତଦନ୍ତ ଚଳାଇଥିଲା। ବ୍ରହ୍ମପୁର ଶକ୍ତି ନଗର ଅଞ୍ଚଳରୁ ଅଭିଯୁକ୍ତମାନଙ୍କୁ କାବୁ କରିବା ସହ ସେମାନଙ୍କ ଠାରୁ ପିସ୍ତଲ ଓ ଖଣ୍ଡା ଜବତ କରିଥିଲା। ଅପରାହ୍ନରେ ୭ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି। ଅନ୍ୟପଟେ ଉକ୍ତ ରାତିରେ କନିଷି ଢ଼ାବା ପଛପଟେ ପ୍ରଦୀପ ଦଳବେହେରା ଓରଫ କଟିଙ୍ଗ ଦିପୁଙ୍କୁ ସଂଘବଦ୍ଧ ଆକ୍ରମଣ କରିଥିବା ନେଇ ପ୍ରଦୀପଙ୍କ ମା’ ଗୋଳନ୍ଥରା ଥାନାରେ ଲିଖିତ ଅଭିଯୋଗ କରିଥିଲେ। ପୋଲିସ ନଂ୬୬/୨୨ରେ ଏକ ମାମଲା ରୁଜୁ କରିଥିବା ପୋଲିସ ସୂଚନା ଦେଇଛି।
