ଫୁଲବାଣୀ ଅଫିସ,୩୧।୧୨: ରାୟଗଡ଼ାରେ ରୁଷୀୟ ପର୍ଯ୍ୟଟକ ମୃତ୍ୟୁ ମାମଲାର ତଦନ୍ତ ପ୍ରକ୍ରିୟା ଯେତେ ଆଗଉଛି ଘଟଣାର ରହସ୍ୟ ସେତେ ବଢ଼ିବାରେ ଲାଗିଛି। ତେବେ ଏହି ଘଟଣାର ଲିଙ୍କ କନ୍ଧମାଳରେ ମଧ୍ୟ ରହିଥିବା ଜଣାପଡ଼ିଛି। ରୁଷୀୟ ପର୍ଯ୍ୟଟକ ଆଣ୍ଟେଭ ପାଭେଲ ଓ ଭ୍ଲାଡିମିର ବିଦାନୋଭ କନ୍ଧମାଳ ଜିଲା ଦାରିଙ୍ଗବାଡିର ଏକ ରିସର୍ଟରେ ରହିଥିଲେ ବୋଲି ସୂଚନା ମିଳିଛି। ହେଲେ ସେମାନେ ଜିଲାର କୌଣସି ପର୍ଯ୍ୟଟନ ସ୍ଥଳୀ ନ ବୁଲି ରାୟଗଡ଼ା ଚାଲି ଯାଇଥିବାରୁ ସନ୍ଦେହ ସୃଷ୍ଟି ହୋଇଛି। ଭ୍ଲାଡିମିର ବିଦାନୋଭ ରିସର୍ଟରେ ମଦ୍ୟପାନ କରିଥିବା ଫଟୋ ଭାଇରାଲ ହେଉଛି। ରିସର୍ଟରେ କ’ଣ ହୋଇଥିଲା, ତାହାର ଏକ ଉଚ୍ଚସ୍ତରୀୟ ତଦନ୍ତର ଆବଶ୍ୟକତା ରହିଛି। ରିସର୍ଟ ମାଲିକ ଏ ସମ୍ପର୍କରେ କୌଣସି ତଥ୍ୟ ଦେଉନାହାନ୍ତି। ରିସର୍ଟକୁ ତାଲା ପକାଇ ଦିଆଯାଇଛି। ସୂଚନା ଅନୁଯାୟୀ, ଗତ ୨୦ ତାରିଖ ସନ୍ଧ୍ୟା ୭ଟାରେ ପାଭେଲ, ବିଦାନୋଭ ଓ ସେମାନଙ୍କ ସହ ଆସିଥିବା ଦମ୍ପତି ଏବଂ ଜଣେ ଟୁରିଷ୍ଟ ଗାଇଡ୍ ଦାରିଙ୍ଗବାଡି ଥାନା କିରିକୁଟିରେ ଥିବା ପାନାସିଆ ଇକୋ ରିସର୍ଟରେ ରାତ୍ରିଯାପନ କରି ରାୟଗଡା ଚାଲିଯିବା ଘଟଣା ଦ୍ୱନ୍ଦ୍ୱ ସୃଷ୍ଟି କରିଛି।
