ଭଦ୍ରକ ଅଫିସ, ୨୨ା୧୨: ପରିମଳ କ୍ଷେତ୍ରରେ ଉଲ୍ଲେଖନୀୟ ପ୍ରଦର୍ଶନ ପାଇଁ ଇଣ୍ଡିଆ ସାନିଟେସନ କୋଆଲିସନ ପକ୍ଷରୁ ସ୍ବଚ୍ଛତା ପରିବର୍ତ୍ତନକାରୀ ମହିଳା-୨୦୨୨ ଜାତୀୟ ପୁରସ୍କାର ପାଇଇନ୍ତି ଭଦ୍ରକ ପୌରପାଳିକା ୧୭ନଂ. ୱାଡର୍ର୍ର ସ୍ବଚ୍ଛ ସାଥି ସସ୍ମିତା ବାରିକ। ଜାତୀୟସ୍ତରରେ ଓଡ଼ିଶାରୁ ୩ ଜଣ ଜାତୀୟ ପୁରସ୍କାର ପାଇଥିବା ବେଳେ ଭଦ୍ରକରୁ ସସ୍ମିତା ଏହି ପୁରସ୍କାର ପାଇ ଜିଲା ତଥା ରାଜ୍ୟ ପାଇଁ ଗୌରବ ଆଣିଛନ୍ତି। ଗତ ୭ ତାରିଖରେ ନୂଆଦିଲ୍ଲୀରେ ତାଙ୍କୁ ଏହି ପୁରସ୍କାର ସହ ସମ୍ବର୍ଦ୍ଧିତ କରାଯାଇଛି। ଭଦ୍ରକ ୧୭ ନଂ. ୱାଡର୍ର୍ର ନରେନ୍ଦ୍ର ବାରିକ ଓ ଲକ୍ଷ୍ମୀପ୍ରିୟା ବାରିକଙ୍କ ମଝିଆ ଝିଅ ହେଉଛନ୍ତି ସସ୍ମିତା। ଗ୍ରାଜୁଏସନ ପରେ ୨୦୧୯ରେ ଭଦ୍ରକ ପୌରପାଳିକାରେ ସ୍ବଚ୍ଛସାଥି ଭାବେ କାର୍ଯ୍ୟ କରୁଛନ୍ତି। ନିଜ ୱାଡର୍ର୍କୁ ସ୍ବଚ୍ଛ ରଖିବା ପାଇଁ ସବୁବେଳେ ଲୋକମାନଙ୍କୁ ସଚେତନ କରାଇଥାନ୍ତି। ପ୍ରତ୍ୟେକ ଦିନ ସକାଳ ୭ଟାରୁ ସାଇକେଲରେ ବାହାରି ନିଜ ୱାର୍ଡ ସହିତ ଅନ୍ୟ ୱାର୍ଡର ଘର ଘର ବୁଲି ଲୋକମାନଙ୍କୁ ଶୁଖିଲା ଅଳିଆ ଓ ଓଦା ଅଳିଆ ପୃଥକ ପୃଥକ୍ ପକାଇବା ପାଇଁ ବୁଝାଇଥାନ୍ତି। ପାଇଖାନା ଟାଙ୍କି ପୌରପାଳିକା ଗାଡ଼ି ଦ୍ୱାରା ସଫେଇ କରିବା ପାଇଁ ଲୋକମାନଙ୍କୁ ବୁଝାଇଥାନ୍ତି। ଅଳିଆ ଗାଡ଼ିରେ ବସି ଅଳିଆ ଏଣେ ତେଣେ ନ ପକାଇ ଅଳିଆ ଗାଡ଼ିରେ ପକାଇବା ପାଇଁ କୁହନ୍ତି। ତାଙ୍କର ଏପରି ନିଷ୍ଠାପର କାର୍ଯ୍ୟ ପାଇଁ ପୌରପାଳିକା ପକ୍ଷରୁ ମଧ୍ୟ ସ୍ବଚ୍ଛସାଥି ଭାବେ ପୁରସ୍କୃତ ହୋଇଛନ୍ତି। ଏହି ପୁରସ୍କାର ତାଙ୍କୁ ଆଗକୁ କାମ କରିବା ପାଇଁ ପ୍ରେରଣା ଯୋଗାଇବ ବୋଲି କହିଛନ୍ତି ସସ୍ମିତା। ଏହି ଜାତୀୟ ପୁରସ୍କାର ପାଇବା ପରେ ସେ ପୌରପାଳିକାର ସମସ୍ତ ଅଧିକାରୀଙ୍କୁ ଏହାର ଶ୍ରେୟ ଦେଇଛନ୍ତି।
