ଭୁବନେଶ୍ୱର, ୧୭।୧୨ (ବ୍ୟୁରୋ): ମଶା ଦାଉରେ କଲବଲ ରାଜଧାନୀବାସୀ। ରାତି ହେଉ କି ଦିନ ଘରେ, ବାହାରେ ସାଲୁବାଲୁ ହେଉଛନ୍ତି ମଶା। ବସ୍ତିରୁ ଆପାର୍ଟମେଣ୍ଟ, ସ୍କୁଲରୁ ଅଫିସ ସବୁଠି ମଶା ଲାଗି ଅତିଷ୍ଠ ହେଉଛନ୍ତି ଲୋକେ। ମଶା ଯୋଗୁ ସହରରେ ଅସମ୍ଭାଳ ପରିସ୍ଥିତି। ସହରରେ ମଶାର ସାନ୍ଦ୍ରତା ୧୦୦ ଟପିଛି। ଅର୍ଥାତ୍ ଘଣ୍ଟାଏ ମଧ୍ୟରେ ଜଣେ ଲୋକକୁ ୧୦ଟି ମଶା କାମୁଡ଼ିବାକୁ ଜଗିଛନ୍ତି। ମଶାଙ୍କ ଦାଉରୁ ବର୍ତ୍ତିବାକୁ ଘରେ ବ୍ୟବହାର ହେଉଥିବା ମଶାଧୂପ, ଲିକ୍ୱିଡ୍, ଝୁଣା ଧୂଆଁ କିଛି କାମ କରୁନି। ଏମିତି ମଶା ମାରିବାକୁ ବ୍ୟବହାର ହେଉଥିବା ବ୍ୟାଟ୍ ବି ଆଉ କାମ ଦେଉନି। ସ୍ଥିତି ଏପରି ହେଲାଣି ଯେ, ପିଲାମାନେ ମଶାରି ଭିତରେ ବସି ପାଠ ପଢୁଥିବା ଦେଖିବାକୁ ମିଳୁଛି। ଅପରପକ୍ଷେ ସହରବାସୀ ମଶାଙ୍କୁ ନେଇ ଅତିଷ୍ଠ ହେବା ପରେ ଏବେ ବିଏମ୍ସିର ଚେତା ପଶିଛି। ଡ୍ରୋନ ସାହାଯ୍ୟରେ ମଶାଙ୍କୁ ଦମନ କରାଯିବ ବୋଲି ମେୟର, କମିଶନର କହିଛନ୍ତି। ଏଥିସହ ବୈଷୟିକ ବିଶେଷଜ୍ଞଙ୍କ ଦ୍ୱାରା ମଶାଙ୍କ ବଂଶବୃଦ୍ଧିର କାରଣ, ନିରାକରଣ ଉପରେ ଦୃଷ୍ଟି ଦିଆଯିବ ବୋଲି ମଧ୍ୟ କୁହାଯାଇଛି। ବିଶେଷକରି ବର୍ଷା ଋତୁ ପରେ ବିଏମ୍ସି ଜଳ ଉତ୍ସଗୁଡିକରେ ମଶାତେଲ ନ ପକାଇ ନିଦରେ ଶୋଇଥିବାରୁ ଏଭଳି ସ୍ଥିତି ଉପୁଜିଥିବା ଅଭିଯୋଗ ହୋଇଛି। ସେହିପରି ହକି ପାଇଁ ସହରର ସୌନ୍ଦର୍ଯ୍ୟକରଣ ନେଇ ବ୍ୟସ୍ତ ଥିବା ବିଏମ୍ସି ଲୋକଙ୍କୁ ମୌଳିକ ସୁବିଧା ଯୋଗାଇଦେବାରେ ଅସମର୍ଥ ହୋଇଛି। ସ୍ଥିତିର ଗମ୍ଭୀରତାକୁ ଦେଖି ବିଏମ୍ସି ଏବେ ତତ୍ପରତା ଦେଖାଉଥିଲେ ବି ମଶାଙ୍କ ଉତ୍ପାତ ବଢିଚାଲିଛି। ତେଣୁ ଏହାକୁ ଦମନ କରିବା ପାଇଁ ବିଏମ୍ସି କେତେଦୂର ସମର୍ଥ ହେବ ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଅପରପକ୍ଷେ ଆଗକୁ ହକି ବିଶ୍ୱକପ୍ ଥିବାରୁ ବାହାରୁ ଆସିବାକୁ ଥିବା ଖେଳାଳି, ପ୍ରଶଂସକ ଯେପରି ରାଜଧାନୀରୁ ମଶା କାମୁଡ଼ା ଅଭିଜ୍ଞତା ନେଇ ନ ଫେରନ୍ତି ତାହା ଦେଖିବାକୁ ପଡ଼ିବ। ଏ ସମ୍ପର୍କରେ କମିଶନର ବିଜୟ ଅମୃତା କୁଲାଙ୍ଗେ କହିଛନ୍ତି, ମଶା ଦମନ ପାଇଁ ଆମେ ପଦକ୍ଷେପ ନେଉଛୁ। ପୂର୍ବରୁ ସହରରେ ୧୦ଟି ଫଗିଂ ଟିମ୍ ଥିଲେ ଏବଂ ଏବେ ଆଉ ୪ଟି ଟିମ୍କୁ ନିୟୋଜିତ କରାଯାଇଛି। ଏମାନେ ନିୟମିତ ସହରରେ ମଶାଧୂଅଁା ଛାଡ଼ିବେ। ସେହିପରି ରବିବାରଠାରୁ ଡ୍ରୋନ୍ ସାହାଯ୍ୟରେ ମଶା ମରାଯିବ। ଏହାବାଦ୍ ମଶାତେଲ ସିଞ୍ଚନ ଏବଂ ଅନାବନା ଗଛ କଟା ଆଦି ବିଭିନ୍ନ ପଦକ୍ଷେପ ନିଆଯାଉଛି। ଖୁବ୍ଶୀଘ୍ର ମଶାଙ୍କ ପ୍ରାଦୁର୍ଭାବ କମିବ ବୋଲି କମିଶନର କହିଛନ୍ତି।
