କାଠମାଣ୍ଡୁ: ଦୃଢ଼ ଇଚ୍ଛାଶକ୍ତି ଦ୍ୱାରା ସବୁ ସମ୍ଭବ। ଏହାକୁ ପ୍ରମାଣିତ କରି ଦେଖାଇଛନ୍ତି ସିଙ୍ଗାପୁରର ୬ ବର୍ଷୀୟ ଭାରତୀୟ ବଂଶୋଦ୍ଭବ ଓମ୍ ମଦନ ଗାର୍ଗ। ପର୍ବତାରୋହଣରେ ରୁଚି ରଖୁଥିବା ଓମ୍ ଏଭରେଷ୍ଟ ବେସ୍ କ୍ୟାମ୍ପ ଚଢ଼ି ଏବେ ଚର୍ଚ୍ଚା ସାଉଁଟିଛନ୍ତି। ନେପାଳରେ ଥିବା ବେସ୍ କ୍ୟାମ୍ପର ଉଚ୍ଚତା ୫,୩୬୪ ମିଟର ହୋଇଥିବାବେଳେ ୧୦ ଦିନରେ ଓମ୍ ବେସ୍ କ୍ୟାମ୍ପ ଆରୋହଣ କରି ପ୍ରଶଂସାର ପାତ୍ର ହୋଇଛନ୍ତି। ତେବେ ଓମ୍ ତାଙ୍କ ମା’ବାପାଙ୍କ ସହ ଏହି ଟ୍ରେକିଂ କରିଛନ୍ତି।
ସେ ସିଙ୍ଗାପୁରର କାନୋସ ସାଭିଲେ ପ୍ରିସ୍କୁଲରେ ପାଠ ପଢ଼ୁଛନ୍ତି। ମା’ବାପାଙ୍କ ସହ ଓମ୍ ପ୍ରଥମେ ଆସି ଲୁକଲାରେ ପହଞ୍ଚିଥିଲେ, ଯାହା ହେଉଛି ଏଭରେଷ୍ଟ ବେସ୍କ୍ୟାମ୍ପର ଷ୍ଟାର୍ଟିଂ ପଏଣ୍ଟ। ସେପ୍ଟେମ୍ବର ୨୮ରୁ ଗାର୍ଗ ପରିବାର ଟ୍ରେକିଂ ଆରମ୍ଭ କରିଥିବାବେଳେ ବେସ୍କ୍ୟାମ୍ପରେ ସେମାନେ ନଭେମ୍ବର ୭ରେ ପହଞ୍ଚିଥିଲେ। ସାଙ୍ଗରେ ସେମାନେ ଗାଇଡ୍ ନେଇଥିଲେ। ଲୁକଲାରୁ ସେମାନେ ଫାକଡିଙ୍ଗ ଆଡକୁ ବଢ଼ିଥିଲେ। ଏହାପରେ ସେମାନେ ନାମଚେ ବାଜାରରେ ପହଞ୍ଚିଥିଲେ, ଯାହା ଏଭରେଷ୍ଟ ରିଜିୟନ୍ର ଟ୍ରେଡ୍ ବା ବାଣିଜ୍ୟ କେନ୍ଦ୍ର ଭାବେ ଜଣାଯାଏ। ସେଠାରୁ ସେମାନେ ଟେଙ୍ଗବୋଚେ ଯାଇଥିଲେ, ପରିଶେଷରେ ଓମ୍ ଓ ତାଙ୍କ ପରିବାର ଏଭରେଷ୍ଟ ବେସ୍ କ୍ୟାମ୍ପରେ ପହଞ୍ଚିଥିଲେ। ସେଠାରେ ଓମ୍ ସିଙ୍ଗାପୁର ପତାକା ଉଡ଼ାଇଥିଲେ। ବିଶ୍ୱର ସବୁଠାରୁ ବିଶାଳ ଗିରିଶୃଙ୍ଗ ଏଭରେଷ୍ଟର ବେସ୍କ୍ୟାମ୍ପରେ ଜଣେ ସର୍ବକନିଷ୍ଠ ପହଞ୍ଚିବା ବିରଳ ଘଟଣା ହୋଇଥିବାବେଳେ ଓମ୍ଙ୍କ ନାମ ସିଙ୍ଗାପୁର ବୁକ୍ ରେକର୍ଡରେ ସାମିଲ କରାଯାଇଛି। ପୂର୍ବରୁ ଭାରତର ୩ ବର୍ଷର ନାବାଳକ ହେୟାନ୍ସ କୁମାର ଏଭରେଷ୍ଟ ବେସ୍ କ୍ୟାମ୍ପ ଆରୋହଣ କରି ଚର୍ଚ୍ଚାକୁ ଆସିଥିଲେ।
