ଇସଲାମାବାଦ,୩।୧୨ : କାବୁଲରେ ଥିବା ପାକିସ୍ତାନ ଦୂତାବାସ ଉପରେ ହୋଇଥିବା ଆକ୍ରମଣକୁ ନେଇ ଇସଲାମାବାଦରେ ଆଫଗାନିସ୍ତାନ ରାଷ୍ଟ୍ରଦୂତଙ୍କୁ ଜବାବ ତଲବ କରିଥିଲା। ପରେ ସେ ହାଜର ହୋଇଥିଲେ। କାବୁଲରେ ଏହାର ମିଶନ ପ୍ରମୁଖଙ୍କ ଉପରେ ହୋଇଥିବା ଆକ୍ରମଣକୁ ନେଇ ପାକିସ୍ତାନ ସରକାର ମଧ୍ୟ ନିଜର ଚିନ୍ତା ପ୍ରକଟ କରିଛନ୍ତି। ପାକିସ୍ତାନର ବୈଦେଶିକ କାର୍ଯ୍ୟାଳୟ ଏକ ବିବୃତ୍ତିରେ କହିଛି ଯେ ଆଫଗାନିସ୍ତାନ କୂଟନୀତିଜ୍ଞଙ୍କୁ ଡକାଯାଇ ମିଶନ ମୁଖ୍ୟଙ୍କ ଉପରେ ଆକ୍ରମଣ ହୋଇଥିବା ଘଟଣାରେ ପାକିସ୍ତାନର ଗଭୀର ଚିନ୍ତା ପ୍ରକଟ କରାଯାଇଛି। ସେ ନିରାପଦରେ ଥିଲେ ମଧ୍ୟ ତାଙ୍କର ସୁରକ୍ଷାକର୍ମୀର ଗୁରୁତର ଆହତ ହୋଇଛନ୍ତି।
ଆଫଗାନିସ୍ତାନ କୂଟନୀତିଜ୍ଞଙ୍କୁ ଏହା ଜଣାଯାଇଛି ଯେ ପାକିସ୍ତାନର କୂଟନୈତିକ ମିଶନ ଏବଂ କର୍ମଚାରୀଙ୍କ ସୁରକ୍ଷା ଆଫଗାନିସ୍ତାନର ମଧ୍ୟବର୍ତ୍ତୀକାଳୀନ ସରକାରଙ୍କ ଦାୟିତ୍ୱ। ଏହି ଘଟଣାରେ ସୁରକ୍ଷା ଦୃଷ୍ଟିରୁ ଗୁରୁତର ଅବହେଳା ଘଟିଛି।
ସୂଚନାଯୋଗ୍ୟ, ଶୁକ୍ରବାର ଆଫଗାନିସ୍ତାନର ରାଜଧାନୀ କାବୁଲରେ ପାକିସ୍ତାନର ଦୂତାବାସ ଉପରେ ଆକ୍ରମଣ ହୋଇଥିଲା, ଯେଉଁଥିରେ ପାକ ରାଷ୍ଟ୍ରଦୂତ ଉବାଇଦ-ଉର୍-ରେହମାନ ନିଜାମାନି ଅଳ୍ପକେ ବର୍ତ୍ତି ଯାଇଥିଲେ। ପାକିସ୍ତାନ ଏହି ଆକ୍ରମଣକୁ ନିନ୍ଦା କରି ତଦନ୍ତ ଦାବି କରିଥିଲା। ଏହି ଆକ୍ରମଣରେ ସମ୍ପୃକ୍ତ ଅପରାଧୀଙ୍କୁ ତୁରନ୍ତ ଧରାଯିବା ସହ ଦଣ୍ଡ ଦିଆଯିବାକୁ ପାକିସ୍ତାନ ସରକାର ଦାବି କରିଛନ୍ତି। ଏଥି ସହ କୂଟନୈତିକ ପରିସର, ଅଧିକାରୀ ଏବଂ କର୍ମଚାରୀଙ୍କ ସୁରକ୍ଷାକୁ ଦୃଷ୍ଟିରେ ରଖି ସମସ୍ତ ଆବଶ୍ୟକୀୟ ପଦକ୍ଷେପ ଗ୍ରହଣ କରିବାକୁ ପାକିସ୍ତାନ ଦାବି କରିଛି।
