ଅହମ୍ମଦାବାଦ,୧୬।୧୧: ଗୁଜରାଟ ବିଧାନସଭା ନିର୍ବାଚନ ରୋଚକ ହେବାରେ ଲାଗିଛି। ଆମ ଆଦମୀ ପାର୍ଟି(ଏଏପି)ର ସୁରଟ (ପୂର୍ବ) ପ୍ରାର୍ଥୀ କାଞ୍ଚନ ଜରିୱାଲା ବୁଧବାର ତାଙ୍କ ନାମାଙ୍କନ ପ୍ରତ୍ୟାହାର କରିଛନ୍ତି। କୌଣସି ଚାପରେ ନୁହେଁ ବରଂ ସ୍ବେଚ୍ଛାକୃତ ଭାବେ ତାଙ୍କ ନାମାଙ୍କନପତ୍ର ପ୍ରତ୍ୟାହାର କରିନେଇଛନ୍ତି। ଏହାପୂର୍ବରୁ ଏଏପି ଭାଜପା ନାଁରେ ଜରିୱାଲାଙ୍କୁ ଅପହରଣ ଏବଂ ତାଙ୍କ ନାମାଙ୍କନ ପ୍ରତ୍ୟାହାର କରିବାକୁ ବାଧ୍ୟ କରିଥିବା ଅଭିଯୋଗ କରିଥିଲା।
ୟଏଥିସହିତ ଜରିୱାଲା ନିଜ ପାର୍ଟିକୁ ଟାର୍ଗେଟ କରି କହିଥିଲେ, ମୋ ସହ କିଛି ପାରିବାରିକ ଘଟଣା ଘଟିଛି। ସେଥିପାଇଁ ମୁଁ ମୋର ନାମାଙ୍କନ ପ୍ରତ୍ୟାହାର କରିନେଲି। ଭାଜପା ମୋ ଉପରେ କୌଣସି ଚାପ ପକାଇ ନାହିଁ କିମ୍ବା କୌଣସି ଚାପରେ ମୁଁ ମୋର ନାମାଙ୍କନ ପ୍ରତ୍ୟାହାର କରିନାହିଁ। ମୁଁ ଆମ ଆଦମୀ ପାର୍ଟିରେ ଅଛି କି ନାହିଁ ତାହା ଉପରେ ମୁଁ ଶୀଘ୍ର ମୋର ଆଭିମୁଖ୍ୟ ବିଷୟରେ କହିବି।
ସେ ଆହୁରି ମଧ୍ୟ କହିଛନ୍ତି, ପ୍ରଚାର ଅଭିଯାନ ସମୟରେ ଲୋକମାନେ ମୋତେ ପଚାରିଥିଲେ ଯେ ମୁଁ କାହିଁକି ଜାତୀୟ ବିରୋଧୀ ତଥା ଗୁଜରାଟ ବିରୋଧୀ ଦଳର ପ୍ରାର୍ଥୀ ହେଲି। ଏହା ପରେ ମୁଁ ମୋର ବିବେକ ଅନୁସରଣ କଲି ଏବଂ ମୁଁ କୌଣସି ଚାପ ବିନା ମୋର ନାମାଙ୍କନ ପ୍ରତ୍ୟାହାର କଲି। ଗୁଜରାଟ ବିରୋଧୀ ଏବଂ ଜାତୀୟ ବିରୋଧୀ ଦଳକୁ ମୁଁ ସମର୍ଥନ କରିପାରିବି ନାହିଁ।
ଏଏପିର ବରିଷ୍ଠ ନେତା ମନୀଷ ସିସୋଡିଆ ନିର୍ବାଚନ ଆୟୋଗ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସି ଅଭିଯୋଗ କରିଥିଲେ ଯେ, ସୁରଟ (ପୂର୍ବ) କାଞ୍ଚନ ଜରିୱାଲାଙ୍କୁ ଭାଜପା ଅପହରଣ କରି ନେଇଛି। ୫୦୦ରୁ ଅଧିକ ପୋଲିସ ଜବରଦସ୍ତ କାଞ୍ଚନ ଜରିୱାଲାଙ୍କୁ ରିଟର୍ନିଂ ଅଫିସ କାର୍ଯ୍ୟାଳୟକୁ ନେଇଥିଲେ ଏବଂ ବନ୍ଧୁକ ମୁନରେ ତାଙ୍କ ନାମାଙ୍କନ ଫେରାଇ ଆଣିଥିଲେ। ଯାହା ଘଟୁଛି ତାହା ନିର୍ବାଚନ ଆୟୋଗ ଉପରେ ପ୍ରଶ୍ନବାଚୀ ସୃଷ୍ଟି କରିଛି। ଏହି ଅଭିଯୋଗ ପରେ ନିର୍ବାଚନ ଆୟୋଗ ମନୀଷ ସିସୋଡିଆଙ୍କ ନେତୃତ୍ୱରେ ଏଏପିର ୪ ଜଣିଆ ପ୍ରତିନିଧୀଙ୍କୁ ଭେଟିଥିଲେ।
