ଗଞ୍ଜାମ,୧୬ା୧୧(ଡି.ଏନ୍.ଏ.): ଗଞ୍ଜାମ ବ୍ଲକ କନ୍ଫରେନ୍ସ ହଲ୍ଠାରେ ଚତୁର୍ଥ ପଞ୍ଚାୟତ ସମିତି ଅଧିବେଶନ ବୁଧବାର ଅନୁଷ୍ଠିତ ହୋଇଥିଲା। ଏଥିରେ ବ୍ଲକ ଅଧ୍ୟକ୍ଷା ଶର୍ମିଷ୍ଠା ପ୍ରଧାନ ଅଧ୍ୟକ୍ଷତା କରିଥିଲେ। ବିଡିଓ ଜସ୍ମିନ ପ୍ରଧାନ ସ୍ବାଗତ ଭାଷଣ ଦେଇଥିବା ବେଳେ ଜିପିଓ ଶ୍ରୀକାନ୍ତ କୁମାର ଗୌଡ଼ ପୂର୍ବ ଅଧିବେଶନ ବିବରଣୀ ପଠନ କରିଥିଲେ। ୧୫ ନମ୍ବର ଜିଲା ପରିଷଦ ସଭ୍ୟ ସନାତନ ବେହେରା, ବିଇଓ ଭାଗିରଥୀ ବେହେରା, ମେଡିକାଲ ଅଫିସର ସୌମ୍ୟକାନ୍ତ ମହାପାତ୍ର, ସିଡିପିଓ ସଲୀଳା ପ୍ରଧାନ, ବିଦ୍ୟୁତ୍ ବିଭାଗ ସହକାରୀ ଯନ୍ତ୍ରୀ ଗୋପାଳ କୃଷ୍ଣ ପ୍ରଧାନ, କନିଷ୍ଠ ଯନ୍ତ୍ରୀ ଦିଲେଶ୍ୱର ଆଚାର୍ଯ୍ୟ, କୃଷି ସହକାରୀ ଅଧିକାରୀ ଜାନକୀ ବଲ୍ଲଭ ପଟ୍ଟନାୟକ ପ୍ରମୁଖ ବିଭାଗୀୟ ଅଧିକାରୀ ଉପସ୍ଥିତ ଥିଲେ। ବୈଠକ ପ୍ରାରମ୍ଭରେ ବିଭିନ୍ନ ବିଭାଗକୁ ନେଇ ଷ୍ଟାଣ୍ଡିଂ କମିଟି ଗଠନ ବେଳେ ଭାଜପା ସମର୍ଥିତ ସମିତି ମେମ୍ବରମାନେ ହଟ୍ଟଗୋଳ କରିଥିଲେ। ଶାସକ ଦଳ ସମର୍ଥିତ ସମିତି ମେମ୍ବର ଓ ବିରୋଧୀ ଭାଜପା ସମର୍ଥିତ ଜନପ୍ରତିନିଧିମାନଙ୍କ ମଧ୍ୟରେ କଥା କଟାକଟି ପର୍ଯ୍ୟନ୍ତ ଯାଇଥିଲା। ପରବର୍ତ୍ତୀ ସମୟରେ ବିଡିଓ ଆପୋସ ସମାଧାନ କରିବା ପରେ ୭ଟି ସ୍ଥାୟୀ ଷ୍ଟାଣ୍ଡିଂ କମିଟି ଗଠନ ହୋଇଥିଲା। ଯୋଜନା, ଅର୍ଥ, ପାନୀୟ ଜଳ ଯୋଗାଣ, ଜଙ୍ଗଲ ଓ ପରିବେଶ, ଗୋଖାଦ୍ୟ, ଶିକ୍ଷା କ୍ରୀଡ଼ା ଓ ସ୍ବାସ୍ଥ୍ୟ ବିଭାଗକୁ ନେଇ ଷ୍ଟାଣ୍ଡିଂ କମିଟି ଚେୟାରମ୍ୟାନ ଭାବେ ବ୍ଲକ ଉପାଧ୍ୟକ୍ଷା ମନୋନୀତ ହୋଇଥିବା ବେଳେ ମହିଳା ଶିଶୁ ବିକାଶ, ଗ୍ରାମାଞ୍ଚଳ ଗୃହ ନିର୍ମାଣ ଓ ସାମାଜିକ କଲ୍ୟାଣ ସ୍ଥାୟୀ କମିଟି ଚେୟାରମ୍ୟାନ ପାଇଁ ବ୍ଲକ ଅଧ୍ୟକ୍ଷାଙ୍କୁ ମନୋନୀତ କରାଯାଇଛି। ବିର୍ତ୍ତମାନ ଏହି ବ୍ଲକରେ ୧୩୦ ଯକ୍ଷ୍ମା ରୋଗୀଙ୍କ ମଧ୍ୟରୁ ୧୦୦ ରୋଗୀ ଭଲ ହୋଇଯାଇଥିବା ବେଳେ ମାତ୍ର ୩୦ ରୋଗୀଙ୍କୁ ମାଗଣା ମେଡ଼ିସିନ ଦିଆଯାଉଛି ବୋଲି ମେଡିକାଲ ଅଫିସର ମହାପାତ୍ର କହିଥିଲେ। ଟିବି ମୁକ୍ତ ଗଞ୍ଜାମ ବ୍ଲକ ପାଇଁ ଆହ୍ବାନ ଦିଆଯାଇଛି। କାଇଁଚପୁର ପଞ୍ଚାୟତରେ ସ୍ବୟଂ ସହାୟକ ମହିଳା ଗୋଷ୍ଠୀଙ୍କ ଟଙ୍କା ହେର୍ଫେର୍ ଘଟଣାର କ’ଣ ତଦନ୍ତ ହୋଇଛି ତାହା ୧୫ ନଂ ଜୋନ୍ ଜିଲା ପରିଷଦ ସଭ୍ୟ ବିଡିଓଙ୍କୁ ପ୍ରଶ୍ନ କରିଥିଲେ। ଅନ୍ୟପଟେ ନିମ୍ନମାନର ଛତୁଆ ତିଆରି କରି ତାହା ବଣ୍ଟନ କରାଯାଉଛି। ଯାହା ଶିଶୁମାନଙ୍କ ପ୍ରତି ବିପଦ ବୋଲି କିଛି ସମିତି ମେମ୍ବର ଓ ସରପଞ୍ଚ ଅଭିଯୋଗ ଆଣିଥିଲେ। କମିଟି ତଦନ୍ତ କରି ରିପୋର୍ଟ ପ୍ରଦାନ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବିଡିଓ ଜସ୍ମିନ ପ୍ରଧାନ ସୂଚନା ଦେଇଛନ୍ତ। ଏହି ଅଧିବେଶନରେ ଏବିଡିଓ ଭବାନୀ ଶଙ୍କର ପ୍ରଧାନ, ସମିତିସଭ୍ୟା ଦୀପାଳି ନାୟକ, ମାମି ଦାସ, ଗୀତାଞ୍ଜଳି ବେହେରା, ପାଳିବନ୍ଧ ସରପଞ୍ଚ ସଂଯୁକ୍ତା ପ୍ରଧାନ, ରଞ୍ଜନ ପଳାଇ, ଜାନକୀ ଦାସ, ଆର୍ ଚନ୍ଦନାଙ୍କ ସମେତ ଅନ୍ୟାନ୍ୟ ସରପଞ୍ଚ, ସମିତି ମେମ୍ବର ଉପସ୍ଥିତ ଥିଲେ।
