ନୂଆଦିଲ୍ଲୀ,୧୪।୧୧: ନିକଟରେ ମଲ୍ଟିମିଡିଆ ପ୍ଲେୟାର ଭିଏଲ୍ସି ଉପରେ ଭାରତ ସରକାର ପ୍ରତିବନ୍ଧ ଲଗାଇଥିଲେ। ଏବେ ଏହି ଆଦେଶ ହଟିଛି। ଫଳରେ ବ୍ୟବହାରକାରୀମାନେ ଭାରତରେ ଏହାକୁ ଡାଉନଲୋଡ କରିପାରିବେ। ସୋମବାର ଇଲେକ୍ଟ୍ରୋନିକ୍ସ ଓ ଆଇଟି ମନ୍ତ୍ରଣାଳୟ କମ୍ପାନୀ ଉପରୁ ପ୍ରତିବନ୍ଧକୁ ହଟାଇ ଦେଇଛି।
ଲୋକମାନେ ଭିଡିଓଲାନର ୱେବସାଇଟକୁ ଯାଇ ଭିଏଲସି ମିଡିଆ ପ୍ଲେୟାରକୁ ଡାଉନଲୋଡ କରିପାରିବେ। ଏଯାଏ ୭୩ ମିଲିୟନ ଲୋକ ଏହାକୁ ଡାଉନଲୋଡ କରି ସାରିଛନ୍ତି। ଏବେ ବି ଅନେକ ଲୋକ ଏହାକୁ ଡାଉନଲୋଡ୍ କରୁଛନ୍ତି।
ପ୍ରକାଶ ଯେ, ଭିଏଲସିର ମୂଳ କମ୍ପାନୀ ବ୍ୟବହାରକାରୀଙ୍କ ଡାଟା ଚାଇନାକୁ ପଠାଉଥିବା କୁହାଯାଉଥିଲା। ଚଳିତ ବର୍ଷ ଅକ୍ଟୋବରରେ କମ୍ପାନୀ ଭାରତ ସରକାରଙ୍କୁ ବ୍ୟାନ୍ ବିରୋଧରେ ଲିଗାଲ ନୋଟିସ ପଠାଇଥିଲା। ଭାରତରେ କାହିଁକି କମ୍ପାନୀର ସେବା ବନ୍ଦ କରାଗଲା ଓ କମ୍ପାନୀକୁ ନିଜର ପକ୍ଷ ରଖିବା ପାଇଁ ଭିଡିଓ କନଫରେନ୍ସର ସୁବିଧା ଯୋଗାଇ ଦେବାକୁ ନୋଟିସରେ କୁହାଯାଇଥିଲା। ଏହା ଉପରେ ଭାରତ ସରକାର ସମୀକ୍ଷା କରିଥିଲେ। କମ୍ପାନୀ ଠିକ ଭାବେ ନିଜର ପକ୍ଷ ରଖିବାକୁ ସକ୍ଷମ ହୋଇଥିବାରୁ ସମ୍ଭବତଃ ଭାରତ ସରକାର ଲାଗିଥିବା ବ୍ୟାନକୁ ହଟାଇ ଦେଇଥିବା କୁହାଯାଉଛି।
