ନୂଆଦିଲ୍ଲୀ,୧୫।୧୦ : ଆଇନମନ୍ତ୍ରୀ ଏବଂ ଆଇନ ସଚିବଙ୍କ ସମ୍ମିଳନୀକୁ ପ୍ରଧାନମନ୍ତ୍ରୀ ମୋଦି ଶନିବାର ସମ୍ବୋଧିତ କରିଛନ୍ତି। ପ୍ରଧାନନ୍ତ୍ରୀ କହିଛନ୍ତି ଯେ ଏକ ସୁସ୍ଥ ସମାଜ ପାଇଁ ଏକ ଦୃଢ଼ ନ୍ୟାୟିକ ବ୍ୟବସ୍ଥା ଗୁରୁତ୍ୱପୂର୍ଣ୍ଣ। ସେ ଆଇନ ମନ୍ତ୍ରୀ ତଥା ସଚିବମାନଙ୍କୁ କହିଛନ୍ତି ଯେ ଆଇନ ପ୍ରଣୟନ କରିବାବେଳେ ମନେରଖନ୍ତୁ ଯେ ଏହାକୁ ଗରୀବ ଲୋକ ସହଜରେ ଯେପରି ବୁଝିପାରିବେ।
ଆଜି ଦେଶ ସ୍ବାଧୀନତାର ଅମୃତମହୋତ୍ସବ ପାଳନ କରୁଛି। ସର୍ଦ୍ଦାର ପଟେଲଙ୍କ ପ୍ରେରଣା ଦେଶକୁ ସଠିକ ଦିଗକୁ ନେବାରେ ଲାଗିଛି। ଏହା ଆମକୁ ଧାର୍ଯ୍ୟ ସ୍ଥଳକୁ ନେଇଯିବ। ସେ କହିଛନ୍ତି ଯେ ଭାରତର ସମାଜର ବିକାଶ ଯାତ୍ରା ପୌରାଣିକ ଅଟେ। ଅନେକ ଆହ୍ବାନ ପରେ ଭାରତୀୟ ସମାଜ ବିକଶିତ ହୋଇଛି। ଆମ ସମାଜର ଏକ ଆବଶ୍ୟକତା ଅଛି ଯେ ପ୍ରଗତି ପଥରେ ଗତି କରୁଥିବାବେଳେ ଆଭ୍ୟନ୍ତରୀଣ ସଂସ୍କାର ଜାରି ରଖିବା ଉଚିତ। ଏହିପରି କୁରୀତିନୀତି, ଅପ୍ରାସଙ୍ଗିକ ନିୟମ ଏବଂ ଭୁଲ ପରମ୍ପରାକୁ ହଟାଇବା ଆବଶ୍ୟକ।
ପ୍ରଧାନମନ୍ତ୍ରୀ ଲୋକ ଅଦାଲତର ଗୁରୁତ୍ୱ ବିଷୟରେ କହିଥିଲେ। ସେ କହିଛନ୍ତି, ଲୋକ ଅଦାଲତ ମାଧ୍ୟମରେ ଦେଶରେ ଲକ୍ଷ ଲକ୍ଷ ମାମଲା ସମାଧାନ ହୋଇଛି। ଏହାଦ୍ୱାରା କୋର୍ଟର ଭାର ହ୍ରାସ ପାଇଛି। ଏହିପରି ଭାବରେ ଗାଁର ଗରିବ ଲୋକଙ୍କୁ ନ୍ୟାୟ ମିଳିବା ଅତି ସହଜ ହୋଇଛି। ସରକାର ଦେଶର ଲୋକଙ୍କ ଉପରେ ଚାପ ପକାଇବା ଉଚିତ ନୁହେଁ। ପ୍ରାୟ ଦେଢ଼ ହଜାର ପୁରୁଣା ଏବଂ ଅପ୍ରାସଙ୍ଗିକ ନିୟମକୁ ରଦ୍ଦ କରିଦିଆଯାଇଛି। ଏହି ନିୟମଗୁଡ଼ିକ ମଧ୍ୟରୁ ଅନେକ ପରଧିନତା ସମୟରୁ ପ୍ରଚଳିତ ହେଉଥିଲା। ଲୋକମାନଙ୍କୁ ତୁରନ୍ତ ନ୍ୟାୟ ପାଇବା ପାଇଁ ଲୋକ ଅଦାଲତ ଗଠନ କରାଯାଇଛି। ଏହି ପରିପ୍ରେକ୍ଷୀରେ ଅନେକ ରାଜ୍ୟରେ ଉତ୍ତମ କାର୍ଯ୍ୟ କରାଯାଉଛି।
