ଭୁବନେଶ୍ୱର,୨୩ା୯(ବ୍ୟୁରୋ): ରାଜ୍ୟର ଗୋପାଳପୁର, ଖପ୍ରାଖୋଲ, ମୋହନା, ଦାରିଙ୍ଗବାଡ଼ି, ଯୋଡ଼ା, ହାଟଡ଼ିହି, ମୁନିଗୁଡ଼ା, କୋଇଡ଼ା ଓ ସୁକୃଳି ଆଦି ସ୍ଥାନରେ ୯ଟି ଅବକାରୀ ଥାନା ପ୍ରତିଷ୍ଠା ହେବ। ସେହିପରି ଭୁବନେଶ୍ୱର-୨, ଜଳେଶ୍ୱର, ବାସୁଦେବପୁର, ସାଲେପୁର, କାମାକ୍ଷାନଗର, ଆର. ଉଦୟଗିରି, ଭଞ୍ଜନଗର, ପାରାଦୀପ, ଯାଜପୁର ରୋଡ୍, ନନ୍ଦପୁର, ନିମାପଡ଼ା, ରେଢ଼ାଖୋଲ ଓ ବଡ଼ଗାଁ ଭଳି ୧୩ ସହରରେ ନୂତନ ରେଞ୍ଜ କାର୍ଯ୍ୟାଳୟ ପ୍ରତିଷ୍ଠା କରାଯିବ। କଟକ, ବ୍ରହ୍ମପୁର ଓ ସମ୍ବଲପୁରଠାରେ ଅବସ୍ଥିତ ଇଆଇ ଏବଂ ଇବି ୟୁନିଟ୍ ଅଧୀନରେ ତିନିଟି ନୂତନ ସାଟେଲାଇଟ୍ ୟୁନିଟ୍ ପ୍ରତିଷ୍ଠା ହେବ। ସେସବୁ ବାଲେଶ୍ୱର, ଜୟପୁର ଓ ରାଉରକେଲାଠାରେ ହିଁ ପ୍ରତିଷ୍ଠା ହେବ। ରାଜ୍ୟ କ୍ୟାବିନେଟ ବୈଠକରେ ଏହାକୁ ଅନୁମୋଦନ କରାଯାଇଛି। ବୈଠକ ଶେଷରେ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର କହିଛନ୍ତି ଯେ, ଅବକାରୀ ନିର୍ଦ୍ଦେଶାଳୟ ଓ କ୍ଷେତ୍ର ପ୍ରତିଷ୍ଠାନକୁ ଅଧିକ ଦକ୍ଷ ଓ ଶକ୍ତିଶାଳୀ କରାଯିବ। ସେଥିପାଇଁ ନୂତନ ଅବକାରୀ ଥାନା, ନୂତନ ଅବକାରୀ ରେଞ୍ଜ କାର୍ଯ୍ୟାଳୟ, ନୂତନ ଇଆଇ ଏବଂ ଇବି ସାଟେଲାଇଟ୍ ୟୁନିଟ୍ ପ୍ରତିଷ୍ଠାକୁ ଗୁରୁତ୍ୱ ଦିଆଯାଇଛି। ପଦବୀ ସଂଖ୍ୟା ବି ବୃଦ୍ଧି କରାଯାଇଛି। ଅବକାରୀ ଅଧୀକ୍ଷକ, ଉପଅବକାରୀ ଅଧୀକ୍ଷକ, ଅବକାରୀ ନିରୀକ୍ଷକ, ଅବକାରୀ ଉପନିରୀକ୍ଷକ, ଅବକାରୀ ସହକାରୀ ଉପନିରୀକ୍ଷକ ଏବଂ ଅବକାରୀ ସିପାହି ଭଳି ୪୫୭ ଗୋଟି ଅତିରିକ୍ତ ନୂତନ ପଦବୀ ସୃଷ୍ଟି ହେବ। ତେବେ ମୋଟ୍ ପଦବୀ ସଂଖ୍ୟା ୨୧୯୭ରୁ ୨୬୫୪କୁ ବୃଦ୍ଧି କରାଯିବ। ଅବକାରୀ ଆୟୁକ୍ତଙ୍କ କାର୍ଯ୍ୟାଳୟରେ ବିଭିନ୍ନ ସ୍ତରରେ ୧୦ ଗୋଟି ଅତିରିକ୍ତ ନିୟମିତ ପଦବୀ ସୃଷ୍ଟି କରାଯିବ। ଅବକାରୀ ନିର୍ଦ୍ଦେଶାଳୟ ସେବା କ୍ୟାଡର୍ ପଦବୀ ସଂଖ୍ୟା ୩୯ରୁ ୪୯କୁ ବୃଦ୍ଧି ହେବ। ସେହିପରି ବିଭିନ୍ନ ଜିଲା ଅବକାରୀ କାର୍ଯ୍ୟାଳୟ ଏବଂ ଇଆଇ, ଇବି ୟୁନିଟ୍ରେ ୨୦ଟି ନୂତନ ନିୟମିତ ଅମଲା ପଦବୀ ସୃଷ୍ଟି ହେବ। ଜିଲା ଅବକାରୀ ଅମଲା ସେବା କ୍ୟାଡର୍ ପଦବୀ ସଂଖ୍ୟା ୫୨ରୁ ୭୨କୁ ବୃଦ୍ଧି କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି। ଉକ୍ତ ପ୍ରସ୍ତାବକୁ କ୍ୟାବିନେଟ ଅନୁମୋଦନ କରିଛି।
