ବରଗଡ ଅଫିସ,୧୩।୯: ବରଗଡ ଜିଲା ବିଜେପୁର ଗଞ୍ଜେଇଭାଟି ଛକରେ ମଙ୍ଗଳବାର ଏକ ସଡ଼କ ଦୁର୍ଘଟଣା ଘଟିଛି। ଏକ ଟ୍ରକ୍ ଧକ୍କାରେ ସ୍କୁଟିରେ ଯାଉଥିବା ଜଣେ ଛାତ୍ରୀ ସୁନୀତା ମେହେର ଗୁରୁତର ଭାବେ ଆହତ ହୋଇଛନ୍ତି। ତାଙ୍କୁ ଗୁରୁତର ଅବସ୍ଥାରେ ବୁର୍ଲା ଡାକ୍ତରଖାନାରେ ଭର୍ତ୍ତି କରାଯାଇଥିବା ବେଳେ ତାଙ୍କ ଅବସ୍ଥା ସଂକଟାପନ୍ନ ରହିଛି। ଅନ୍ୟପକ୍ଷରେ ଏହି ଘଟଣାକୁ ନେଇ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଛିା। ଲୋକେ ଟାୟାର ଜାଳି ରାସ୍ତା ଅବରୋଧ କରିଛନ୍ତି। ଖବର ପାଇ ଘଟଣାସ୍ଥଳରେ ବିଜେପୁର ଥାନାଧିକାରୀ ସନୟ କୁମାର ନାଏକ ପହଞ୍ଚି ଲୋକଙ୍କ ସହିତ ଆଲୋଚନା କରିଥିଲେ। ତେବେ ଆଲୋଚନା ଚାଲିଥିବା ବେଳେ ପୋଲିସ ସହିତ ଉପସ୍ଥିତ କିଛି ଯୁବକଙ୍କ ମଧ୍ୟରେ କଥା କଟାକଟି ଏବଂ ଧସ୍ତାଧସ୍ତି ହୋଇଥିଲା। ଏପରିକି ପରିସ୍ଥିତି ନିୟନ୍ତ୍ରଣ ପାଇଁ ଶେଷରେ ପୋଲିସ ଲୋକଙ୍କୁ ଗୋଡାଇ ପିଟିବା ସହିତ ଘଉଡାବାକୁ ଉଦ୍ୟମ କରିଥିଲେ। ଏଥିସହ କିଛି ଲୋକଙ୍କୁ ପୋଲିସ ଥାନାକୁ ଉଠାଇ ନେଇଥିବା ସୂଚନା ମିଳିଛି। ଘଟଣାକୁ ନେଇ ବିଜେପୁରରେ ଚାପା ଉତ୍ତେଜନା ଲାଗି ରହିଛି।
