ଦଶମନ୍ତପୁର, ୨୮ା୮( ଡି.ଏନ.ଏ.): ଶାରୀରିକ ଭିନ୍ନକ୍ଷମ ହୋଇ ମଧ୍ୟ ସେ ହାର ମାନିଯାଇନାହାନ୍ତି। କୌଣସି ସରକାରୀ ସହାୟତା ନ ପାଇ ମଧ୍ୟ ନିଜ ଗୋଡ଼ରେ ନିଜେ ଠିଆହେବାକୁ ସକ୍ଷମ ହୋଇଛନ୍ତି। ସେ ହେଉଛନ୍ତି ଏ. ମାଲକାନଗିରି ପଞ୍ଚାୟତର ମଙ୍ଗଳୁ ପାଇକ (୪୦)। ସ୍ତ୍ରୀ ତିଳୋତ୍ତମା, ଝିଅ ହେମଲତାଙ୍କୁ ନେଇ ତାଙ୍କ ସଂସାର। ରହିବା ପାଇଁ ଭଲ ଘରଟିଏ ନାହିଁ। କୌଣସି ସରକାରୀ ସହାୟତା ପାଇନାହାନ୍ତି ମଙ୍ଗଳୁ। ପରିବାର ଚଳାଇବା ଲାଗି ପଞ୍ଚାୟତ ସମ୍ମୁଖ ରାସ୍ତାକଡ଼ରେ ବସି ସାଇକେଲ ମରାମତି ଓ ବାଇକର ଟାୟାର ପଙ୍କଚର କାମ କରୁଛନ୍ତି। ଜନ୍ମରୁ ଭିନ୍ନକ୍ଷମ ମଙ୍ଗଳୁଙ୍କ ଅଣ୍ଟାରୁ ତଳକୁ ଶକ୍ତିହୀନ ହୋଇପଡ଼ିଛିି। ଛିଡ଼ାହେବା ମାତ୍ରେ ତାଙ୍କ ଶରୀର ଥରି ଉଠୁଛି। ୮ ମାସ ତଳେ ଦଶମନ୍ତପୁର ବ୍ଲକରେ ଚାଲିଥିବା ଭିନ୍ନକ୍ଷମ ସାମର୍ଥ୍ୟ ଶିବିରକୁ ଯାଇ ସେ ହୁଇଲ ଚେୟାରଟିଏ ସହାୟତା ପାଇଥିଲେ। ସେହି ହୁଇଲ ଚେୟାର ୫ ମାସ ନ ହେଉଣୁ ଅଚଳ ହୋଇପଡ଼ିଛି। କ୍ରମେ ମଙ୍ଗଳୁ ଘର ସମ୍ମୁଖରେ ବସି ଲୋକଙ୍କ ସାଇକେଲ ମରାମତି କରିବା ଆରମ୍ଭ କଲେ। କୋରାପୁଟ ଯାଇ ବାଇକ୍ ପଙ୍କଚର ମରାମତି କରିବା ଶିଖି ମଙ୍ଗଳୁ ଏହି କାର୍ଯ୍ୟ ମଧ୍ୟ କରୁଛନ୍ତି। ଏବେ ସେଥିରୁ ହେଉଥିବା ରୋଜଗାରରେ ପରିବାର ଚଳାଉଛନ୍ତି ସେ। ପୂର୍ବରୁ ଆବାସ ଯୋଜନାରେ ସାମିଲ କରିବା ପାଇଁ ଜଣେ ବ୍ୟକ୍ତିଙ୍କୁ ୭ଶହ ଟଙ୍କା ଲାଞ୍ଚ ଦେଇ ମଧ୍ୟ ଏଯାଏ ଆବାସ ଯୋଜନାରୁ ବଞ୍ଚତ୍ତ ହୋଇ ରହିଥିବା ସେ ଅଭିଯୋଗ କରିଛନ୍ତି। ଏ ସମ୍ପର୍କରେ ବିଏସ୍ଏସ୍ଓ ଗୌତମ ଖୋସ୍ଲାଙ୍କୁ ପଚାରିବାରୁ ସେ କହିଲେ, ଏହାର ଅନୁଧ୍ୟାନକରି କିଛି ସହାୟତା ବ୍ୟବସ୍ଥା କରିବେ।
