କେନ୍ଦୁଝର, ୧୩।୮(ସ୍ବ.ପ୍ର.): ସମସ୍ତଙ୍କୁ କିପରି ବିଶୁଦ୍ଧ ପାନୀୟ ଜଳ ମିଳିବ ସେ ନେଇ ପ୍ରଶାସନ ପକ୍ଷରୁ ପଦକ୍ଷେପ ନିଆଯାଉଥିଲେ ହେଁ ଏବେ ମଧ୍ୟ ଆଦିବାସୀ ଅଧ୍ୟୁଷିତ ବାଂଶପାଳ, ତେଲକୋଇ ଆଦି ବ୍ଲକ ଅଞ୍ଚଳରେ ଅନେକ ଗ୍ରାମ ଓ ବସ୍ତିର ଲୋକେ ପାନୀୟ ଜଳରୁ ବଞ୍ଚିତ ରହିଛନ୍ତି। କୋଟି କୋଟି ଟଙ୍କା ବ୍ୟୟରେ ବିଭିନ୍ନ ପ୍ରକାରର ଜଳ ଯୋଗାଣ ପ୍ରକଳ୍ପ ଜରିଆରେ ଜଳ ଯୋଗାଣ କରାଯାଉଛି। କିନ୍ତୁ ଏହି ପାହାଡିଆ ଅଞ୍ଚଳରେ ଲୋକମାନେ ନଦୀ, ଝରଣା, ପାଣି ଚୁଆ ଆଦିରୁ ପାଣି ସଂଗ୍ରହ କରି ଚାଲିଛନ୍ତି। ଅନେକ ଅଞ୍ଚଳରେ ପାନୀୟଜଳ ପାଇଁ ଲୋକଙ୍କୁ ପାହାଡ଼ ଚଢ଼ି ଯିବାକୁ ପଡୁଛି।
ସମସ୍ୟା କେନ୍ଦୁଝର ଜିଲା ବାଂଶପାଳ ବ୍ଲକ ଯାତ୍ରା ପଞ୍ଚାୟତ ମଙ୍ଗଳପୁର ସାହିରେ ଦେଖିବାକୁ ମିଳିଛି। ଏଠାରେ ୬୫ ଗରିବ ଆଦିବାସୀ ଶ୍ରେଣୀର ପରିବାର ବସବାସ କରୁଛନ୍ତି। ବହୁ କଷ୍ଟରେ ମୂଲ ମଜୁରୀ କରିଲେ ତାଙ୍କ ଘରେ ଚୁଲି ଜଳେ। ତେବେ ପିଇବା ପାଣି ପାଇଁ ନଳକୂଅଟିଏ ନାହିଁ। ଫଳରେ ପାଞ୍ଚ ଶହ ମିଟର ଦୂର ଯାଇ ୨୫ ଫୁଟ ପାହାଡ ତଳୁ ବେଡାନାଳ ଝରଣାରୁ ପ୍ରଦୂଷଣ ଯୁକ୍ତ ପାଣି ଆଣିବାକୁ ପଡୁଛି ବୋଲି କହିଛନ୍ତି। ବିଶେଷ କରି ମହିଳାମାନେ ଗରା, ଡେକଚି, ବାଲଟି ଆଦିରେ ପାଣି ଧରି ଯିବା ଆସିବାରେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି ବୋଲି ସାଇବାଣୀ ଜେନା ସମେତ ଅନ୍ୟମାନେ କହିଛନ୍ତି। ଅସ୍ବାସ୍ଥ୍ୟକର ପରିବେଶ ମଧ୍ୟରେ ଝରଣାରୁ ପାଣି ସଂଗ୍ରହ କରି ଆଣୁ ଥିବାରୁ ବିଭିନ୍ନ ପ୍ରକାର ରୋଗ ବ୍ୟାପିବା ଆଶଙ୍କା ରହିଛି। ଏଣୁ ବିଶୁଦ୍ଧ ଜଳ ଯୋଗାଇ ଦେବା ଜରୁରୀ ବୋଲି ଅବସରପ୍ରାପ୍ତ ଡାକ୍ତର ଲକ୍ଷ୍ମୀକାନ୍ତ ମହାନ୍ତି କହିଛନ୍ତି। ଏହାକୁ ନେଇ ସାଇବାଣୀ ସମେତ ବାସନ୍ତି ଗିରି, ନିକିତି ଗିରି, ପଠାଣି ବେହେରା, କୈଳାସ ପ୍ରଧାନ ପ୍ରମୁଖ ଗ୍ରାମବାସୀ ପୂର୍ବରୁ ପଞ୍ଚାାୟତ ଠାରୁ ଆରମ୍ଭ କରି ବ୍ଲକ ତଥା ଜିଲା ପ୍ରଶାସନ ନିକଟରେ ଅଭିଯୋଗ କରି ଆସୁଥିଲେ ହେଁ ସେମାନଙ୍କ ସମସ୍ୟା ସୁଧୁରୁ ନାହିଁ ବୋଲି କହିଛନ୍ତି। ବିଶେଷ କରି ବର୍ଷା ଦିନରେ ପାହାଡ଼ିଆ ରାସ୍ତାରେ ଯାତାୟତ ବିପଦପୂର୍ଣ୍ଣ ହେଉଥିବା ବେଳେ ମଇଳା ପାଣି ବ୍ୟବହାର ଯୋଗୁ ବିଭିନ୍ନ ପ୍ରକାର ରୋଗରେ ଆକ୍ରାନ୍ତ ହେବା ଆଶଙ୍କା ରହିଛି ବୋଲି ସେମାନେ କହିଛନ୍ତି। ଏଣୁ ପ୍ରଶାସନ ଏ ନେଇ ସ୍ବତନ୍ତ୍ର ଦୃଷ୍ଟି ଦେଇ ଏକ ନଳକୂଅ ଖନନ କରିବାକୁ ଗ୍ରାମବାସୀ ଦାବି କରିଛନ୍ତି।
