ନାଉଗାଁ,୫ା୮(ସ୍ବ.ପ୍ର.): ନାଉଗାଁ ବ୍ଲକ ଅନ୍ତର୍ଗତ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଉପରେ ୧୬ ପଞ୍ଚାୟତର ଏକ ଲକ୍ଷରୁ ଊର୍ଦ୍ଧ୍ୱ ଜନସାଧାରଣ ନିର୍ଭର କରିଥାନ୍ତି। କିନ୍ତୁ ଅସରାଏ ବର୍ଷା ହେଲେ ସ୍ବାସ୍ଥ୍ୟକେନ୍ଦ୍ର ପରିସର ବେହାଲ ହୋଇପଡ଼େ। ସ୍ବାସ୍ଥ୍ୟ କେନ୍ଦ୍ରରେ ରହିଥିବା ବହିଃବିଭାଗ ଚତୁଃପାର୍ଶ୍ୱରେ ପାଣି ଜମିଯାଏ। ଅଧିକ ବର୍ଷା ହେଲେ ଏହି ବହିଃବିଭାଗ କୋଠରି ମଧ୍ୟରେ ବି ପାଣି ପଶିଯାଏ। ଫଳରେ ରୋଗୀ ହନ୍ତସନ୍ତ ହେଉଥିବା ବେଳେ ଡାକ୍ତରମାନେ ରୋଗୀ ଦେଖିବାରେ ଅନେକ ଅସୁବିଧା ହୁଏ। ପାଣି ଜମିଥିବାରୁ ଅନେକ ସମୟରେ ଡାକ୍ତରଙ୍କ ପାଖରେ ଚିକିତ୍ସା ପାଇଁ ରୋଗୀଙ୍କ ସମ୍ପର୍କୀୟମାନେ ଟେକିଟେକି ଆଣିବାକୁ ବାଧ୍ୟ ହୋଇଥାନ୍ତି। ସମ୍ମୁଖରେ ଯାଇଥିବା ପୂର୍ତ୍ତ ବିଭାଗର ରାସ୍ତା ସ୍ବାସ୍ଥ୍ୟକେନ୍ଦ୍ରଠାରୁ ଉଚ୍ଚରେ ରହିଛି। ଫଳରେ ବର୍ଷା ହେଲେ ରାସ୍ତାର ପାଣି ସ୍ବାସ୍ଥ୍ୟକେନ୍ଦ୍ର ପରିସରରେ ଜମା ହୋଇଯାଏ। ସ୍ବାସ୍ଥ୍ୟକେନ୍ଦ୍ର ପରିସରରେ ନୂତନ କୋଠା ନିର୍ମାଣ କରାଯାଉଥିବାବେଳେ ଏଠାରେ ଜଳ ନିଷ୍କାସନ ଅବା ଡ୍ରେନେଜ ବ୍ୟବସ୍ଥା ହୋଇନାହିଁ। ଫଳରେ ପାଗ ପରିବର୍ତ୍ତନ ହୋଇ ପାଣି ନ ଶୁଖିବା ପର୍ଯ୍ୟନ୍ତ ଲୋକେ ସମସ୍ୟାରେ ପଡ଼ିଥାନ୍ତି। ବର୍ଷା ପାଣି ଜମି ରହୁଥିବାରୁ ଡେଙ୍ଗୁ, ମ୍ୟାଲେରିଆ ଆଦି ଜ୍ୱର ବ୍ୟାପିବା ଆଶଙ୍କା ରହିଛି। ସ୍ବାସ୍ଥ୍ୟ ବିଭାଗ ପକ୍ଷରୁ ଡେଙ୍ଗୁ ସଚେତନତା ସପ୍ତାହ ପାଳନ କରାଯାଉଥିବା ବେଳେ ଆଶା, ଅଙ୍ଗନଓ୍ବାଡିକର୍ମୀଙ୍କ ମାଧ୍ୟମରେ କୌଣସି ସ୍ଥାନରେ ପାଣି ଅଧିକ ଜମି ରହିଲେ ମଶାବଂଶ ବିସ୍ତାର କରିବାର ସମ୍ଭାବନା ରହିଛି ବୋଲି ସଚେତନତା କରାଯାଉଛି। ମାତ୍ର ସ୍ବାସ୍ଥ୍ୟକେନ୍ଦ୍ର ପରିସରରୁ ପାଣି ଜମିବା ସମସ୍ୟା ଦୂର କରିବା ପାଇଁ କୌଣସି ପଦକ୍ଷେପ ନିଆଯାଉନାହିଁ। ଏନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଏସମ୍ପର୍କରେ ନାଉଗାଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଭାରପ୍ରାପ୍ତ ଚିକିତ୍ସାଧିକାରୀ ମାନସ କୁମାର ମହାପାତ୍ର କୁହନ୍ତି, ପାଣି ଜମୁଥିବା ସମ୍ପର୍କରେ ପ୍ରଶାସନକୁ ଅବଗତ କରାଯାଇଛି।
