ଦାରିଙ୍ଗବାଡ଼ି,୧୮ା୫(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ହାତୀମୁଣ୍ଡା ପଞ୍ଚାୟତରେ ରହିଥିବା ଐତିହ୍ୟ ତୀର୍ଥକ୍ଷେତ୍ର ଋଷିମାଳରେ ସଂରକ୍ଷିତ ଜଙ୍ଗଲକୁ ସାଧାରଣ ଲୋକଙ୍କ ପକ୍ଷରୁ ଜବରଦଖଲ କରାଯାଉଥିବା ନେଇ ଟ୍ରଷ୍ଟ ପକ୍ଷରୁ ତହସିଲଦାର ଧୀରଜ ପାତ୍ରଙ୍କ ନିକଟରେ ଅଭିଯୋଗ ହୋଇଛି। ଅଭିଯୋଗ ପରେ ଉକ୍ତ ଜମି ରାଜସ୍ବ ବିଭାଗ ନା ବନ ବିଭାଗର ସଂରକ୍ଷିତ ଜଙ୍ଗଲ ରହିଛି କିମ୍ବା ଯେଉଁ ବ୍ୟକ୍ତି ଜବରଦଖଲ କରିଛନ୍ତି ତାଙ୍କ ନାମରେ ସରକାରୀ କାଗଜପତ୍ର ରହିଛି କି ନାହିଁ ସେ ନେଇ ତଦନ୍ତ କରିବାକୁ ତହସିଲଦାର ନିର୍ଦ୍ଦେଶ ଦେଇଥିବା କହିଛନ୍ତି। ନିର୍ଦ୍ଦେଶ ପାଇ ବ୍ରାହ୍ମଣୀଗାଁ ବନାଞ୍ଚଳର ବନପାଳ, ରାଜସ୍ବ ଅଧିକାରୀ ଓ ବ୍ରାହ୍ମଣୀଗାଁ ପୋଲିସ ପକ୍ଷରୁ ମିଳିତ ତଦନ୍ତ ପାଇଁ ଗୋଟିଏ ଦଳ ସେଠାକୁ ଯିବେ ବୋଲି ଜଣାପଡ଼ିଛି।
ପ୍ରକାଶ ଯେ, ଋଷିମାଳ ପାହାଡ଼ ଦେବଭୂମି ଭାବେ ପରିଚିତ ପ୍ରତ୍ୟେକ ବର୍ଷ ସେଠାରେ ବାରୁଣୀ ବୁଡ଼ ସହ ବିଭିନ୍ନ ପ୍ରକାର ପର୍ବ ପାଳନ କରାଯାଉଛି। ଏବେ ସରକାର ଉକ୍ତ ଋଷିମାଳ ପାହାଡ଼କୁ କାଟି ରାସ୍ତା ସମ୍ପ୍ରସାରଣ ସହ ଉନ୍ନୟନ କାର୍ଯ୍ୟ କରୁଛନ୍ତି। ଦୈନିକ ଶହଶହ ପର୍ଯ୍ୟଟକ ରାଜ୍ୟ ତଥା ରାଜ୍ୟ ବାହାରୁ ସେଠାକୁ ଆସୁଛନ୍ତି। ତୀର୍ଥକ୍ଷେତ୍ର ଋଷିମାଳର ବିକାଶ ପାଇଁ ଲକ୍ଷାଧିକ ଟଙ୍କା ସରକାର ବ୍ୟୟ କରିଛନ୍ତି। ଏହାର ସୁଯୋଗ ନେଇ ଉକ୍ତ ପାହାଡ଼ର ପାଦଦେଶରେ ରହୁଥିବା କିଛି ବ୍ୟକ୍ତି ବେଆଇନ ଭାବେ ଗୃହ ନିର୍ମାଣ କରୁଥିବା ଅଭିଯୋଗ ହୋଇଛି। ଏହାକୁ ନେଇ ଅଞ୍ଚଳରେ ଚାପା ଉତ୍ତେଜନା ଦେଖାଯାଇଛି। ପୂର୍ବରୁ ମଧ୍ୟ ଏଭଳି ବେଆଇନ ଗୃହ ନିର୍ମାଣ ଚାଲିଥିବା ବେଳେ ପ୍ରଶାସନ ପହଞ୍ଚି ତାକୁ ବନ୍ଦ କରିଥିବା ଅଞ୍ଚଳବାସୀ କହିଛନ୍ତି। ତେବେ ଯେଉଁ ଘର ନିର୍ମାଣକୁ ନେଇ ବିବାଦ ବଢ଼ିଛି ତା’ର ସଠିକ ତଦନ୍ତ ପରେ ହିଁ ତାହା ବେଆଇନ କି ନାହିଁ ଜଣାପଡ଼ିବ ବୋଲି ତହସିଲଦାର ଧୀରଜ ପାତ୍ର ଏବଂ ବନାଞ୍ଚଳ ଅଧିକାରୀ ହରିହର ବେହେରା କହିଛନ୍ତି।
ସୂଚନାଯୋଗ, ତୀର୍ଥକ୍ଷେତ୍ର ଋଷିମାଳ ପାହାଡ଼ରୁ ଋଷିକୁଲ୍ୟା ନଦୀର ପ୍ରାରମ୍ଭ ହୋଇଥିବା ଓ ଏହା ଗଙ୍ଗା ନଦୀଠାରୁ ୧ ହଜାର ବର୍ଷ ପୁରୁଣା ବୋଲି ଲୋକକଥାରେ କୁହାଯାଉଛି। ତେଣୁ ଏହି ତୀର୍ଥକ୍ଷେତ୍ର ଅଞ୍ଚଳବାସୀଙ୍କ ଭାବାବେଗ ସହ ଜଡ଼ିତ ରହିଛି। ତେଣୁ ଏହାର ନିରପେକ୍ଷ ତଦନ୍ତ କରିବାକୁ ଅଞ୍ଚଳବାସୀ ଏବଂ ଟ୍ରଷ୍ଟ ପକ୍ଷରୁ ପ୍ରଶାସନ ନିକଟରେ ଦାବି କରାଯାଇଛି।
