କଟକ,୧୭।୫(କାର୍ତ୍ତିକ ସାହୁ): ଓଡ଼ିଶା ପବ୍ଲିକ ସର୍ଭିସ କମିଶନ (ଓପିଏସ୍ସି) ପକ୍ଷରୁ ଓଡ଼ିଶା ସିଭିଲ ସର୍ଭିସ ପ୍ରିଲିମନାରି ପରୀକ୍ଷା-୨୦୨୫ର କାର୍ଯ୍ୟସୂଚୀ ବିଜ୍ଞପ୍ତି ପ୍ରକାଶ ପାଇଛି। ଆସନ୍ତା ଜୁନ୍ ୭ ତାରିଖ (ରବିବାର) ଏହି ପରୀକ୍ଷା ୨ଟି ପର୍ଯ୍ୟାୟରେ ହେବ। ଓଡ଼ିଶାର ୬ଟି ଜୋନ୍ ବାଲେଶ୍ୱର, ବ୍ରହ୍ମପୁର, ଭୁବନେଶ୍ୱର, କଟକ, ଜୟପୁର ଓ ସମ୍ୱଲପୁରରେ ପରୀକ୍ଷା କରାଯିବା ପାଇଁ ପ୍ରସ୍ତୁତି ହୋଇଛି। ପୂର୍ୱାହ୍ନ ୧୦ଟାରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ଜେନେରାଲ ଷ୍ଟଡିଜ୍ (ପେପର-୧) ଓ ଅପରାହ୍ନ ୧.୩୦ରୁ ଅପରାହ୍ନ ୩.୩୦ ଯାଏ ଜେନେରାଲ ଷ୍ଟଡିଜ୍ (ପେପର-୨) ପରୀକ୍ଷା ହେବ। ପେପର-୧ ପରୀକ୍ଷା ପାଇଁ ୧୦୦ଟି ବହୁବିକଳ୍ପ ଉତ୍ତରବିଶିଷ୍ଟ ଅବଜେକ୍ଟିଭ ପ୍ରଶ୍ନ ଓ ପେପର-୨ ପରୀକ୍ଷା ପାଇଁ ୮୦ଟି ବହୁବିକଳ୍ପ ଉତ୍ତରବିଶିଷ୍ଟ ଅବଜେକ୍ଟିଭ ପ୍ରଶ୍ନ ପରୀକ୍ଷାରେ ଆସିବ। ପରୀକ୍ଷାର୍ଥୀମାନେ ଓଏମ୍ଆର୍ ଶିଟ୍ରେ ପେପର-୧ ପାଇଁ କୋଡ୍ ୦୧ ଏବଂ ପେପର-୨ ପାଇଁ କୋଡ୍ ୦୨ ଲେଖିବେ। ଭିନ୍ନକ୍ଷମ ପରୀକ୍ଷାର୍ଥୀଙ୍କ ପାଇଁ ଉଭୟ ପେପର ପରୀକ୍ଷାରେ ଅଧିକ ୪୦ ମିନିଟ୍ ଲେଖାଏ ସମୟ ଦିଆଯିବ। ପରୀକ୍ଷାର୍ଥୀମାନଙ୍କ ପ୍ରବେଶ ପତ୍ର ଓ ନିର୍ଦ୍ଦେଶାବଳୀ କମିଶନ୍ ଓ୍ୱେବସାଇଟ୍ www.opsc.gov.inରେ ଆସନ୍ତା ମେ’ ୩୦ରୁ ଉପଲବ୍ଧ ହେବ ବୋଲି କମିଶନ୍ ପକ୍ଷରୁ ଶୁକ୍ରବାର ପ୍ରକାଶିତ ବିଜ୍ଞପ୍ତିରେ ଦର୍ଶାଯାଇଛି।
