ବାଲେଶ୍ୱର,୧୮ା୫(ବାଞ୍ଛାନିଧି ଦେ): ବାଲେଶ୍ୱର ଜିଲା ଅନ୍ତର୍ଗତ ସୋର-କୁପାରୀ ରାସ୍ତାର ଖଇରା ଥାନା ଅଧୀନ ଧୋବାଗାଡ଼ିଆ ଛକ ନିକଟରେ ରବିବାର ରାତିରେ ଏକ ମର୍ମନ୍ତୁଦ ଦୁର୍ଘଟଣା ଘଟିଛି l କାର୍ ଧକ୍କାରେ ଜଣଙ୍କର ମୃତ୍ୟୁ ଘଟିବା ସହ ଆଉ ଜଣେ ଗୁରୁତର ହୋଇଛନ୍ତି। ମୃତକ ଜଣକ ହେଲେ କୁପାରୀ ଗ୍ରାମର ଦିଲ୍ଲୀପ ଭୂୟାଁ ଓ ଗୁରୁତର ଜଣକ ହେଲେ ସେହି ଗ୍ରାମର ସନ୍ତୋଷ ସାହୁ।
ରବିବାର ବିଳମ୍ବିତ ରାତିରେ ଏହି ୨ ଜଣ ଧୋବାଗଡ଼ିଆ ଛକ ନିକଟରେ ରାସ୍ତା କଡ଼ରେ ଓଡି 0୧ବିଏଫ ୩୧୭୮ ନମ୍ବର ବିଶିଷ୍ଟ ଏକ ସ୍କୁଟି ଉପରେ ବସି କଥା ହେଉଥିଲେ । ଏତିକି ବେଳେ ଖଇରାରୁ କୁପାରୀ ଅଭିମୁଖେ ଦ୍ରୁତଗତିରେ ଯାଉଥିବା ଓଡି ୦୧ଏଏନ ୮୪୬୪ ନମ୍ବର ବିଶିଷ୍ଟ କାରଟି ଭାରସାମ୍ୟ ହରାଇ ସ୍କୁଟି ସହ ୨ ଆରୋହୀଙ୍କୁ ଧକ୍କା ଦେଇଥିଲା। ଦୁର୍ଘଟଣାଟି ଏପରି ଥିଲା ଯେ କାର୍ଟି ସ୍କୁଟିକୁ ଧକ୍କା ଦେବା ପରେ ସ୍କୁଟିଟି ପାଖରେ ଥିବା ଏକ ଦୋକାନ ଘରକୁ ବାଡ଼େଇବା ପରେ ଦୋକାନ ଘରଟି ଭାଙ୍ଗିଯାଇଥିଲା। ଦୁର୍ଘଟଣା ପରେ କାର୍ ମାଲିକ ଲୋଚନ ରାଉତ ଘଟଣାସ୍ଥଳରୁ ଫେରାର ହୋଇଯାଇଥିଲେ।
ଅନ୍ୟପଟେ ଦୁର୍ଘଟଣାସ୍ଥଳରେ ସନ୍ତୋଷଙ୍କ ମୃତ୍ୟୁ ଘଟିଥିବାବେଳେ ଦିଲୀପଙ୍କୁ ଗୁରୁତର ଅବସ୍ଥାରେ ଭଦ୍ରକ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ନ୍ୟାୟ ଦାବିରେ ସ୍ଥାନୀୟ ଲୋକେ ଧୋବାଗଡ଼ିଆ ଛକରେ ସୋର-କୁପାରୀ ଏବଂ ରାଣୀତାଲ-କୁପାରୀ ରାସ୍ତାକୁ ଟାୟାର ଜାଳି ଅବରୋଧ କରିଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ଦୁର୍ଘଟଣା ଘଟାଇଥିବା ବ୍ୟକ୍ତିଙ୍କୁ ଗିରଫ ସହ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେବା ପରେ ଉତ୍ତେଜନା ଥମିଥିଲା।
