ଅମରାବତି,୧୬।୫: ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରବାବୁ ନାଇଡୁ ଶନିବାର ଏକ ବଡ଼ ଘୋଷଣା କରିଛନ୍ତି। ରାଜ୍ୟରେ କ୍ରମାଗତ ଭାବେ ହ୍ରାସ ପାଉଥିବା ଜନସଂଖ୍ୟାକୁ ରୋକିବା ପାଇଁ ସରକାର ଏହି ନିଷ୍ପତ୍ତି ନେଇଛନ୍ତି। ନୂଆ ନିୟମ ଅନୁଯାୟୀ, ଦମ୍ପତିମାନେ ତୃତୀୟ ସନ୍ତାନ ଜନ୍ମ କଲେ ସେମାନଙ୍କୁ ୩୦,୦୦୦ ଟଙ୍କା ଏବଂ ଚତୁର୍ଥ ସନ୍ତାନ ଜନ୍ମ କଲେ ୪୦,୦୦୦ ଟଙ୍କାର ଆର୍ଥିକ ପ୍ରୋତ୍ସାହନ ରାଶି ଯୋଗାଇ ଦିଆଯିବ।
ଶ୍ରୀକାକୁଲମ ଜିଲ୍ଲାର ନରସନ୍ନାପେଟାଠାରେ ଆୟୋଜିତ ଏକ ଜନସଭାକୁ ସମ୍ବୋଧିତ କରି ନାଇଡୁ କହିଛନ୍ତି ଯେ ସରକାର ଏହି ନିଷ୍ପତ୍ତି ନେଇସାରିଛନ୍ତି ଏବଂ ଏକ ମାସ ମଧ୍ୟରେ ଏହାର ସବିଶେଷ ସୂଚନା ଓ ନିୟମାବଳୀ ପ୍ରକାଶ କରାଯିବ।
‘ସ୍ବର୍ଣ୍ଣ ଆନ୍ଧ୍ର-ସ୍ବଚ୍ଛ ଆନ୍ଧ୍ର’ କାର୍ଯ୍ୟକ୍ରମ ଅବସରରେ ମୁଖ୍ୟମନ୍ତ୍ରୀ କହିଛନ୍ତି, “ମୁଁ ଏକ ନୂଆ ନିଷ୍ପତ୍ତି ନେଇଛି। ଆମେ ତୃତୀୟ ସନ୍ତାନ ଜନ୍ମ ହେବା ମାତ୍ରେ ୩୦,୦୦୦ ଟଙ୍କା ଏବଂ ଚତୁର୍ଥ ସନ୍ତାନ ଜନ୍ମରେ ୪୦,୦୦୦ ଟଙ୍କା ଦେବୁ। ଏହା କଣ ଏକ ସଠିକ ନିଷ୍ପତ୍ତି ନୁହେଁ କି?”
ଉଲ୍ଲେଖଯୋଗ୍ୟ, ପୂର୍ବରୁ ସେ ଜନସଂଖ୍ୟା ନିୟନ୍ତ୍ରଣ ପାଇଁ ଓକିଲାତି କରୁଥିଲେ, କିନ୍ତୁ ବର୍ତ୍ତମାନର ସ୍ଥିତିକୁ ଦେଖି ସେ ମତ ବଦଳାଇଛନ୍ତି। ମୁଖ୍ୟମନ୍ତ୍ରୀ କହିଛନ୍ତି ଯେ ଏବେ ସମୟ ଆସିଛି, ସମାଜ ମିଳିତ ଭାବେ ଜନ୍ମ ହାର ବଢ଼ାଇବା ଦିଗରେ କାର୍ଯ୍ୟ କରିବା ଉଚିତ।
ନାଇଡୁଙ୍କ ଏହି ସଦ୍ୟତମ ଘୋଷଣା ପୂର୍ବରୁ ଦ୍ୱିତୀୟ ସନ୍ତାନ ଜନ୍ମ ଉପରେ ୨୫,୦୦୦ ଟଙ୍କାର ପ୍ରୋତ୍ସାହନ ରାଶି ଦେବା ପାଇଁ ଏକ ପ୍ରସ୍ତାବ ଆସିଥିଲା। ଗତ ମାର୍ଚ୍ଚ ୫ ତାରିଖରେ ମୁଖ୍ୟମନ୍ତ୍ରୀ ବିଧାନସଭାକୁ ଜଣାଇଥିଲେ ଯେ ରାଜ୍ୟ ସରକାର ଦ୍ୱିତୀୟ ସନ୍ତାନ ଜନ୍ମ କରୁଥିବା ଦମ୍ପତିଙ୍କୁ ୨ ୫,୦୦୦ ଟଙ୍କା ଦେବାକୁ ବିଚାର କରୁଛନ୍ତି।
ନାଇଡୁଙ୍କ ଅନୁଯାୟୀ, ଆୟ ବୃଦ୍ଧି ହେତୁ କିଛି ଦମ୍ପତି କେବଳ ଗୋଟିଏ ସନ୍ତାନ ରଖିବାକୁ ପସନ୍ଦ କରୁଛନ୍ତି, ଆଉ କେତେକ ଦମ୍ପତି ପ୍ରଥମ ସନ୍ତାନ ଯଦି ପୁଅ ନହୁଏ, ତେବେ ଯାଇ ଦ୍ୱିତୀୟ ସନ୍ତାନ ପାଇଁ ଚିନ୍ତା କରୁଛନ୍ତି। ଏହାଦ୍ୱାରା ରାଜ୍ୟର ଜନସଂଖ୍ୟା ବୃଦ୍ଧି ହାର କମିବାରେ ଲାଗିଛି ବୋଲି ସେ ଚେତାବନୀ ଦେଇଛନ୍ତି। ଜନସଂଖ୍ୟାକୁ ସ୍ଥିର ରଖିବା ପାଇଁ ମୋଟ ପ୍ରଜନନ ହାର (TFR) କୁ ୨.୧ କରିବା ଉପରେ ସେ ଗୁରୁତ୍ୱ ଦେଇଛନ୍ତି। ସେ କହିଛନ୍ତି ଯେ ମହିଳା ପିଛା ହାରାହାରି ପ୍ରଜନନ ହାର ୨.୧ ଶିଶୁ ରହିଲେ ହିଁ ଜନସଂଖ୍ୟା ସନ୍ତୁଳିତ ରହିଥାଏ।
