ପୁରୀ ଅଫିସ, ୯ା୭: ଆଷାଢ ଶୁକ୍ଳ ନବମୀ ତିଥିରେ ଶୁକ୍ରବାର ୩ ଆଖଡ଼ାର ନିଶାନ ଶୋଭାଯାତ୍ରା ସମ୍ପନ୍ନ ହୋଇଛି। ବଡ଼ ଆଖଡ଼ା, ହାତୀ ଆଖଡ଼ା ଏବଂ ନିର୍ମାହୀ ଆଖଡ଼ା ପକ୍ଷରୁ ନିଶାନ ସହ ମଠର ମହନ୍ତମାନେ ଶ୍ରୀଗୁଣ୍ଡିଚା ମନ୍ଦିରକୁ ଯାଇ ମହାପ୍ରଭୁଙ୍କୁ ଦର୍ଶନ କରିଥିଲେ। ସୂଚନାଯୋଗ୍ୟ, ଆଜକୁ ୬୦୦ବର୍ଷ ପୂର୍ବେ ରାମାନନ୍ଦ ଆଚାର୍ଯ୍ୟ ଜଗନ୍ନାଥ ଧାମକୁ ଆସି ମହାପ୍ରଭୁଙ୍କ ଦର୍ଶନ କରିବାକୁ ଯାଇଥିଲେ। ସେତେବେଳେ ମହାପ୍ରଭୁ ଶ୍ରୀଜଗନ୍ନାଥ ଆଡ଼ପ ମଣ୍ଡରେ ଅବସ୍ଥାନ କରିଥିଲେ। ତେଣୁ ରାମାନନ୍ଦ ବଡ଼ ଆଖଡା ମଠ ଶାଖା ଦଶାବତାର ମଠରେ ଅବସ୍ଥାନ କରିଥିଲେ। ସେ ଆଷାଢ଼ ଶୁକ୍ଳ ନବମୀ ତିଥିରେ ମହାପ୍ରଭୁଙ୍କ ଦର୍ଶନ ନିମନ୍ତେ ଆଡ଼ପ ମଣ୍ଡପକୁ ଯାଇଥିଲେ। ସେ ତାଙ୍କ ଦର୍ଶନ ସମୟରେ ବଡ଼ ଆଖଡ଼ା, ହାତୀ ଆଖଡ଼ା ଏବଂ ନିର୍ମୋହୀ ଆଖଡ଼ାର ନିଶାନକୁ ସାଥିରେ ନେଇଥିଲେ। ଏହି ପରମ୍ପରାକୁ ପାଥେୟ କରି ଶୁକ୍ରବାର ହାତୀ ଆଖଡ଼ା ମଠର ମହନ୍ତ ସୁଖରାମ ଦାସ, ବଡ଼ ଆଖଡା ମଠର ମହନ୍ତ ହରି ନାରାୟଣ ଦାସ, ନିର୍ମୋହୀ ମଠର ବାବନ ଚରଣ ଦାସ ଏବଂ ପୁରୀରେ ଥିବା ସମସ୍ତ ରାମାନନ୍ଦୀ ମଠର ମହନ୍ତମାନେ ସେମାନଙ୍କ ନିଶାନ ସହ ଆଡ଼ପ ମଣ୍ଡପ ଯାଇ ମହାପ୍ରଭୁଙ୍କୁ ଦର୍ଶନ କରିଥିଲେ।
