ଅମ୍ବିକାପୁର,୨୫ା୫: ଛତିଶଗଡ଼ର ସୁର୍ଗୁଜା ଜିଲାରେ ଜଣେ ମହିଳା ତାଙ୍କ ୯୦ ବର୍ଷୀୟା ଶାଶୁଙ୍କ ଭତ୍ତା ଟଙ୍କା ଉଠାଇବା ପାଇଁ ପିଠିରେ ୯ କି.ମି. ବୋହି ବ୍ୟାଙ୍କକୁ ଯିବା ଘଟଣା ଭାଇରାଲ ହୋଇଛି। ବୃଦ୍ଧାଙ୍କ ଓଜନରେ ନଇଁ ପଡ଼ୁଥିବା ମହିଳା ଜଣକ ଜଙ୍ଗଲ ରାସ୍ତା ଓ ପଥୁରିଆ ଭୂଇଁ ଦେଇ ପ୍ରଚଣ୍ଡ ଖରାରେ ଚାଲି ଚାଲି ଯାଉଥିବାର ଦୃଶ୍ୟ ଅନେକଙ୍କୁ ବିଚଳିତ କରିଛି। ଛତିଶଗଡ଼ର ଦୁର୍ଗମ ଅଞ୍ଚଳରେ ଭତ୍ତା ଟଙ୍କା ପାଇବା ପାଇଁ ଏହା ଏକ ସଂଘର୍ଷପୂର୍ଣ୍ଣ କାହାଣୀ। ମୈନପାଟ ଅଞ୍ଚଳର ଏହି ଭିଡିଓ ଭାଇରାଲ ହେବା ପରେ ସୋସିଆଲ ମିଡିଆରେ ବହୁ ସଂଖ୍ୟାରେ ପ୍ରତିକ୍ରିୟା ପ୍ରକାଶ ପାଇବା ସହ ଗ୍ରାମୀଣ ଭାରତରେ କଲ୍ୟାଣକାରୀ ଯୋଜନାର ସୁଫଳ ପାଇବାର ବାସ୍ତବତାକୁ ନେଇ ପ୍ରଶ୍ନ ଉଠିଛି।
ସୁଖମନିଆ ବାଈ ନାମ୍ନୀ ମହିଳା ତାଙ୍କ ବୃଦ୍ଧା ଶାଶୁଙ୍କୁ ୯ କି.ମି. ପିଠିରେ ବୋହିଥିଲେ, ଯେପରି ବୃଦ୍ଧା ଜଣକ ବ୍ୟାଙ୍କରୁ ଭତ୍ତା ଟଙ୍କା ଉଠାଇପାରିବେ। ଜଙ୍ଗଲ ଅଞ୍ଚଳରେ ଗମନାଗମନ ସୁବିଧା ନ ଥିବାରୁ ଲୋମାନଙ୍କୁ ମୌଳିକ ସେବା ପାଇବା ପାଇଁ ଦୀର୍ଘ ଦୁର୍ଗମ ପଥ ପାଦରେ ଚାଲି ଅତିକ୍ରମ କରିବାକୁ ପଡ଼ିଥାଏ ବୋଲି ସ୍ଥାନୀୟ ଅଧିବାସୀ କହିଛନ୍ତି। ଭତ୍ତା ପାଇବା ପାଇଁ ଅଙ୍ଗୁଳି ଛାପ କିମ୍ବା ପରିଚୟ ଯାଞ୍ଚ ଆବଶ୍ୟକ ଥିବାରୁ ହିତାଧିକାରୀ ବ୍ୟାଙ୍କରେ ଉପସ୍ଥିତ ରହିବା ଜରୁରୀ ବୋଲି ପେନ୍ସନ ନିୟମ ରହିଛି। ସେଥିପାଇଁ ସୁଖମନିଆ ଅନେକ ମାସ ହେଲା ଶାଶୁଙ୍କୁ ଏଭଳି ନେଇଆସୁଛନ୍ତି। ତେବେ ଏଥର ଜଣେ ବ୍ୟକ୍ତି ସେମାନଙ୍କର ଭିଡିଓ ପ୍ରସ୍ତୁତ କରିବା ସହ ମହିଳା କ’ଣ ପାଇଁ ବୃଦ୍ଧାଙ୍କୁ ଏତେଦୂର ପିଠିରେ ବୋହୁଛନ୍ତି ବୋଲି ସ୍ଥାନୀୟ ଭାଷାରେ ପ୍ରଶ୍ନ କରିଥିଲେ। ବ୍ୟାଙ୍କକୁ ବୃଦ୍ଧାଙ୍କୁ ନେଲେ ଯାଇ ୧,୫୦୦ ଟଙ୍କା ଭତ୍ତା ମିଳିବ ବୋଲି ମହିଳା ଜଣକ କହିଥିଲେ। ଯାତାୟାତ ସୁବିଧା ନ ଥିବାରୁ ଖାଲଖମାପୂର୍ଣ୍ଣ ଜଙ୍ଗଲ ରାସ୍ତା ଓ ଝରଣା ଅତିକ୍ରମ କରି ଯିବାକୁ ପଡ଼ିଥାଏ। ବ୍ୟାଙ୍କରେ ପହଞ୍ଚତ୍ବା ପରେ ପରିବାରକୁ ୧,୫୦୦ ଟଙ୍କା ଭତ୍ତା ମିଳିଥାଏ। ବେଳେବେଳେ ଏକାଧିକ ମାସର ଭତ୍ତା ଏକାଠି ମିଳିଥାଏ ବୋଲି ମହିଳା ଜଣକ କହିଥିଲେ। ପୂର୍ବରୁ ସ୍ଥାନୀୟ ଅଞ୍ଚଳରେ ଭତ୍ତା ଦିଆଯାଉଥିଲା ଓ ହିତାଧିକାରୀ ସୁବିଧାରେ ପହଞ୍ଚତ୍ପାରୁଥିଲେ। ଏବେ ସେହି ବ୍ୟବସ୍ଥା ବନ୍ଦ ହୋଇଯାଇଥିବା ମହିଳା କହିଛନ୍ତି।
