ନୂଆଦିଲ୍ଲୀ, ୨୩ା୫: ରେସଲର ଭିନେଶ ଫୋଗତ ଆଗାମୀ ଏସିଆନ ଗେମ୍ସ ଚୟନ ପ୍ରକ୍ରିୟାରେ ଭାଗ ନେବେ। ଏଥିନେଇ ତାଙ୍କୁ ଦିଲ୍ଲୀ ହାଇକୋର୍ଟ ଅନୁମତି ପ୍ରଦାନ କରିବା ସହ ରେସଲିଂ ଫେଡେରେଶନ ଅଫ୍ ଇଣ୍ଡିଆ (ଡବ୍ଲ୍ୟୁଏଫ୍ଆଇ) ଚୟନ ନୀତୀରେ ମାତୃତ୍ୱ ଲାଭ ପରେ ଫେରୁଥିବା ଭିନେଶଙ୍କ ଭଳି ଖେଳାଳିଙ୍କ ବିଚାର କରିବା ଲାଗି ବିବେକର ଅଭାବ ରହିଥିବା କହିଛନ୍ତି।
ମୁଖ୍ୟ ବିଚାରପତି ଡି କେ ଉପାଧ୍ୟାୟ ଓ ଜଷ୍ଟିସ ତେଜସ କାରିଆଙ୍କୁ ନେଇ ଗଠିତ ଖଣ୍ଡପୀଠ ଆସନ୍ତା ୩୦ ଓ ୩୧ ତାରିଖରେ ଭାରତୀୟ କ୍ରୀଡ଼ା ପ୍ରାଧିକରଣ (ସାଇ) ଭାରତୀୟ ଅଲିମ୍ପିକ୍ ଆସୋସିଏଶନ (ଆଇଓଏ)ର ଜଣେ ଲେଖାଏ ଅବଜରଭରଙ୍କ ଉପସ୍ଥିତିରେ ଚୟନ ପ୍ରକ୍ରିୟା ଆୟୋଜନ କରିବାକୁ ନିର୍ଦ୍ଦେଶ ଦେଇଛନ୍ତି। ଡବ୍ଲ୍ୟୁଏଫ୍ଆଇ ଦ୍ୱାରା ଏହାର ଭିଡିଓ ରେକର୍ଡିଂ କରାଯିବା ଦରକାର।
ଆସନ୍ତା ୩୦ ଓ ୩୧ ତାରିଖରେ ହେବାକୁ ଥିବା ଆଗାମୀ ଏସିଆନ ଗେମ୍ସ ସିଲେକ୍ସନ ଟ୍ରାଏଲ୍ସରେ ଭାଗ ନେବାକୁ ଅନୁମତି ଦିଆଯିବା ଉଚିତ। ଫେଡେରେଶନ ପକ୍ଷରୁ ଜାରି କରାଯାଇଥିବା ଚୟନ ନୀତୀ ଓ ସର୍କ୍ୟୁଲାରରେ ମାତୃତ୍ୱ ଲାଭ ପରେ ଫେରୁଥିବା ଆବେଦନକାରୀଙ୍କ ଭଳି ଖେଳାଳିଙ୍କୁ କୌଣସି ବିଶେଷ ଅଧିକାର ଦିଆଯାଇ ନାହିଁ ବୋଲି କୋର୍ଟ ନିର୍ଦ୍ଦେଶ ଦେଇଛନ୍ତି।
ଏଥିସହିତ ଫେଡେରେଶନ ପକ୍ଷରୁ ଜାରି କରାଯାଇଥିବା କାରଣ ଦର୍ଶାଅ ନୋଟିସ ସମ୍ପର୍କରେ କୋର୍ଟ କହିଛନ୍ତି, ଏହା ପୂର୍ବ ନିୟୋଜିତ ଯୋଜନା ଓ ବନ୍ଦ ପଡ଼ିଥିବା ବିଷୟକୁ ପୁଣି ଥରେ ଖୋଲାଯାଇଥିବା ହୃଦବୋଧ ହେଉଛି। ଖେଳ ଓ ନ୍ୟାୟର ହୀତ ଦୃଷ୍ଟିରୁ ଆବେଦନକାରୀଙ୍କୁ ଚୟନ ପ୍ରକ୍ରିୟାରେ ଭାଗ ନେବାକୁ ସୁଯୋଗ ଦିଆଯିବା ଆବଶ୍ୟକ। ଗତ ୧୮ ତାରିଖରେ ଖଣ୍ଡପୀଠ ଦେଇଥିବା ନିର୍ଦ୍ଦେଶ ବିରୋଧରେ ଭିନେଶ କରିଥିବା ଆବେଦନର ଶୁଣାଣି କରି କୋର୍ଟ ଉପରୋକ୍ତ ନିର୍ଦ୍ଦେଶ ଦେଇଛନ୍ତି।
