ପୁରୁଷୋତ୍ତମପୁର, ୨୪।୫ (ସବିତା ମିଶ୍ର): ଗଞ୍ଜାମ ଜିଲାର ପୁରୁଷୋତ୍ତମପୁର ସ୍ଥିତ ତାରାତାରିଣୀ କଲେଜରେ ଓଡ଼ିଆ ବିଷୟରେ ସ୍ନାତକୋତ୍ତର (ପିଜି) ପାଠ୍ୟକ୍ରମ ଖୋଲାଯାଇଛି। ସେହିପରି ସାଇକୋଲୋଜି ଓ ହୋମ ସାଇନ୍ସ ବିଷୟରେ ଅନର୍ସ ନେଇ ମଧ୍ୟ ରାଜ୍ୟର ଉଚ୍ଚଶିକ୍ଷା ବିଭାଗରୁ ଅନୁମୋଦନ ମିଳିଛି।
ଓଡ଼ିଆ ପିଜି ବିଭାଗରେ ୧୬ଟି ସିଟ୍ର ବ୍ୟବସ୍ଥା ରହିଥିବା ବେଳେ, ସାଇକୋଲୋଜି ଓ ହୋମ ସାଇନ୍ସ ଅନର୍ସ ବିଷୟରେ ପ୍ରତ୍ୟେକରେ ୩୨ଟି କରି ସିଟ୍ ବ୍ୟବସ୍ଥା ରହିଛି। ଏହି ପାଠ୍ୟକ୍ରମଗୁଡ଼ିକରେ ଚଳିତ ୨୦୨୬–୨୦୨୭ ଶିକ୍ଷାବର୍ଷରୁ ନାମଲେଖା ପ୍ରକ୍ରିୟା ଆରମ୍ଭ ହେବ।
ଏଥିପାଇଁ ଛାତ୍ରଛାତ୍ରୀମାନେ ସାମ୍ସ (SAMS) ମାଧ୍ୟମରେ ଆବେଦନ କରିପାରିବେ ବୋଲି କଲେଜର ଅଧ୍ୟକ୍ଷ ଡ଼ଃ ପ୍ରଦୀପ କୁମାର ସାହୁ ସୂଚନା ଦେଇଛନ୍ତି।
୧୯୭୯ ମସିହା ଅଗଷ୍ଟ ୧୩ ତାରିଖରେ ପ୍ରତିଷ୍ଠିତ ଏହି ତାରାତାରିଣୀ କଲେଜ ଶିକ୍ଷାଦାନ କ୍ଷେତ୍ରରେ ସାରା ରାଜ୍ୟରେ ବେଶ ସୁନାମ ଅର୍ଜନ କରିଆସିଛି। ଏହି ଅଞ୍ଚଳର ଗରିବ ଶ୍ରେଣୀର ଛାତ୍ରଛାତ୍ରୀମାନେ ଅର୍ଥାଭାବରୁ ଉଚ୍ଚଶିକ୍ଷାରୁ ବଞ୍ଚିତ ହେଉଥିବା ପରିପ୍ରେକ୍ଷ୍ୟରେ ଏଠାରେ ପିଜି ପାଠ୍ୟକ୍ରମ ଖୋଲିବା ପାଇଁ ଦୀର୍ଘଦିନ ଧରି ଦାବି ହୋଇଆସୁଥିଲା। ଶେଷରେ ରାଜ୍ୟ ସରକାର ଏହାକୁ ଗୁରୁତ୍ୱର ସହିତ ନେଇ ଚଳିତବର୍ଷରୁ ନାମଲେଖା ପାଇଁ ଅନୁମତି ପ୍ରଦାନ କରିଛନ୍ତି। ଏହାକୁ ନେଇ ଅଞ୍ଚଳବାସୀଙ୍କ ମଧ୍ୟରେ ଖୁସିର ଲହରୀ ଦେଖାଦେଇଥିବା ବେଳେ ସେମାନେ ସରକାରଙ୍କୁ କୃତଜ୍ଞତା ଜଣାଇଛନ୍ତି।
