ଭଞ୍ଜନଗର,୨୫ା୫(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟ ରାଜ୍ୟର ଏକ ପୁରାତନ ମହାବିଦ୍ୟାଳୟ। ୧୯୬୦ରେ ନିର୍ମିତ ଏହି ମହାବିଦ୍ୟାଳୟ ବ୍ରହ୍ମପୁର ବିଶବିଦ୍ୟାଳୟ ଅଧୀନରେ ଆସୁଥିବା ବେଳେ ଏହି ମହାବିଦ୍ୟାଳୟ ଶିକ୍ଷା, ଭିତ୍ତିଭୂମି ସମେତ ଅନ୍ୟାନ୍ୟ କ୍ଷେତ୍ରରେ ସୁନାମ ଅଛି। ତଥାପି ଆହୁରି କିଛି ବିକାଶ କଲେଜର କରିବା ଆବଶ୍ୟକତା ରହିଛି। ତେଣୁ ଗତ ଶୁକ୍ରବାର କାର୍ଯ୍ୟରେ ଯୋଗ ଦେଇଥିବା ନୂତନ ଅଧ୍ୟକ୍ଷ ଡ ଗଗନ ବିହାରୀ ପୁରୋହିତ କଲେଜର ଆଉ କିଛି ବିକାଶ କରିବା ଲକ୍ଷ୍ୟ ରଖିଛନ୍ତି। ତେଣୁ ସୋମବାର ସେ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକଙ୍କୁ ଭେଟି ଫୁଲତୋଡ଼ା ଦେଇ ସ୍ବାଗତ କରିବା ସହ କଲେଜର ଉନ୍ନତି ପାଇଁ ସହଯୋଗ କାମନା କରିଥିଲେ। ଏହି ସମୟରେ ବିଧାୟକ ନାୟକ କହିଥିଲେ କଲେଜର ଅନେକ କିଛି ବିକାଶ କରିବା ପାଇଁ ପଦକ୍ଷେପ ନିଆଯାଇଛି। ପର୍ଯ୍ୟାୟ କ୍ରମେ ଅର୍ଥ ଆସୁଛି ବିକାଶ ପାଇଁ। କଲେଜର ପୁରାତନ ଛାତ୍ର ନେତା ଭାବେ ମୋ’ କଲେଜର ବିକାଶ କରିବା ମୋର ପ୍ରମୁଖ କର୍ତ୍ତବ୍ୟ। ଆଗାମୀ ଦିନରେ କଲେଜର ବିକାଶ ପାଇଁ ଯାହା ସାହାଯ୍ୟ ସହଯୋଗ ଲୋଡ଼ା ଯୋଗାଇ ଦେବି ବୋଲି ବିଧାୟକ ନାୟକ କହିଥିଲେ। ଏହି ସମୟରେ ରସାୟନ ବିଜ୍ଞାନ ବିଭାଗ ମୁଖ୍ୟ ପ୍ରାଧ୍ୟାପକ କୁମୁନ୍ଦ ଚନ୍ଦ୍ର ମହାପାତ୍ର, ଯୁକ୍ତ ୨ ଧନ୍ଦାମୂଳକ ଶିକ୍ଷାନୁଷ୍ଠାନର ଅଧ୍ୟାପକ ଆର ହରିଶ କୁମାର ପ୍ରମୁଖ ଉପସ୍ଥିତ ଥିଲେ। ଏହାପରେ ଅଧ୍ୟକ୍ଷ ପୁରୋହିତ ଭଞ୍ଜନଗର ଉପଜିଲାପାଳ ତଥା କଲେଜ ପରିଚାଲନା କମିଟି ସଭାପତି ଉମାଶଙ୍କର ବେହେରାଙ୍କୁ ତାଙ୍କ କାର୍ଯ୍ୟାଳୟରେ ଭେଟି ସ୍ବାଗତ କରିବା ସହ କଲେଜର ଉନ୍ନତି ପାଇଁ ସହଯୋଗ କାମନା କରିଥିଲେ। ଉପଜିଲାପାଳ ବେହେରା ଯାହା ଆଇନ ଅନୁଯାୟୀ ହୋଇପାରିବ ତାହା ସମସ୍ତେ ମିଳିମିଶି କରିବା ପାଇଁ ପ୍ରତିଶ୍ରୁତି ଦେଇଥିଲେ। ଏହି ସମୟରେ ପ୍ରାଧ୍ୟାପକ କୁମୁନ୍ଦ ଚନ୍ଦ୍ର ମହାପାତ୍ର, ଆର ହରିଶ ମଧ୍ୟ ଉପସ୍ଥିତ ଥିଲେ।
