ନୂଆଦିଲ୍ଲୀ,୨୩।୫: ଦେଶରେ ସାଧାରଣ ଜନତାଙ୍କ ପକେଟ ଉପରେ ପୁଣି ଥରେ ମହଙ୍ଗା ମାଡ଼ ହୋଇଛି। ଆଜି (୨୩ ମଇ, ୨୦୨୬) ପେଟ୍ରୋଲ ଏବଂ ଡିଜେଲର ମୂଲ୍ୟରେ ପୁଣି ଥରେ ବୃଦ୍ଧି ଘଟିଛି। ପେଟ୍ରୋଲ ଲିଟର ପିଛା ୮୭ ପଇସା ମହଙ୍ଗା ହୋଇଥିବା ବେଳେ ଡିଜେଲ ଦରରେ ୯୧ ପଇସା ବୃଦ୍ଧି କରାଯାଇଛି। ଚଳିତ ମାସ ମଧ୍ୟରେ ଏହାକୁ ମିଶାଇ ତୃତୀୟ ଥର ପାଇଁ ତେଲ ଦର ବଢ଼ିଥିବାରୁ ଗ୍ରାହକଙ୍କ ଚିନ୍ତା ବଢ଼ିଯାଇଛି।
ତେବେ ପେଟ୍ରୋଲ-ଡିଜେଲ ମୂଲ୍ୟ ବଢ଼ୁଥିବା ବେଳେ ରୋଷେଇ ଗ୍ୟାସ ବା ଏଲପିଜି (LPG) ଗ୍ରାହକଙ୍କ ପାଇଁ କିନ୍ତୁ ଆଶ୍ୱସ୍ତିକର ଖବର ରହିଛି। ଆଜି ଦେଶରେ ଘରୋଇ ଏଲପିଜି ସିଲିଣ୍ଡର ଏବଂ କମର୍ସିଆଲ ଗ୍ୟାସ ସିଲିଣ୍ଡର ଦରରେ କୌଣସି ପରିବର୍ତ୍ତନ କରାଯାଇ ନାହିଁ। ଆନ୍ତର୍ଜାତୀୟ ବଜାରରେ ଶକ୍ତି ସଙ୍କଟ ଏବଂ ଭୂ-ରାଜନୈତିକ ତିକ୍ତତା ଜାରି ରହିଥିଲେ ମଧ୍ୟ ସରକାରୀ ତୈଳ କମ୍ପାନୀଗୁଡ଼ିକ ଗ୍ୟାସ ଦର ସ୍ଥିର ରଖି ଲୋକଙ୍କୁ ବଡ଼ ଆଶ୍ୱସ୍ତି ଦେଇଛନ୍ତି।
ଦିଲ୍ଲୀରେ ଘରୋଇ ଗ୍ୟାସ ସିଲିଣ୍ଡର ଦର ୯୧୩.୦ ଟଙ୍କା ରହିଥିବାବେଳେ କମର୍ସିଆଲ ଗ୍ୟାସ ସିଲିଣ୍ଡର ଦର ୩୦୭୧.୫ଟଙ୍କା ରହିଛି। କୋଲକାତା ୯୩୯.୦ ଓ ୩୨୦୨.୫ ଟଙ୍କା ରହିଛି।
ମଧ୍ୟପ୍ରାଚ୍ୟ ସଙ୍କଟ (Middle-East Crisis) ଏବଂ ଆମେରିକା ଓ ଇରାନ ମଧ୍ୟରେ ଚାଲିଥିବା ତିକ୍ତତା ଭିତରେ ଭାରତ ପାଇଁ ଏକ ବଡ଼ ଆଶ୍ୱସ୍ତିକର ଖବର ସାମ୍ନାକୁ ଆସିଛି। କତାରରୁ ବାହାରିଥିବା ଏଲପିଜି ବାହୀ ଏକ ବଡ଼ ସାମୁଦ୍ରିକ ଜାହାଜ ‘MV SYMI’ସୁରକ୍ଷିତ ଭାବେ ଗୁଜରାଟର କାଣ୍ଡଲା ବନ୍ଦରରେ ପହଞ୍ଚିଛି।
ଏହା ସହିତ ଭିଏତନାମର ପତାକା ଥାଇ ଆଉ ଏକ ବିଶାଳ ଗ୍ୟାସ ଜାହାଜ ‘Envy Sunshine’ ମଧ୍ୟ ପ୍ରାୟ ୪୬,୦୦୦ ମେଟ୍ରିକ ଟନ ରୋଷେଇ ଗ୍ୟାସ ଧରି କର୍ନାଟକର ନ୍ୟୁ ମାଙ୍ଗାଲୋର ବନ୍ଦରରେ ଆସି ପହଞ୍ଚିଛି। ଏହି ଦୁଇଟି ଯାକ ଟ୍ୟାଙ୍କର ଭାରତ ଆସିବା ପରେ ଦେଶରେ ଏଲପିଜି ଯୋଗାଣ ବହୁ ପରିମାଣରେ ସୱାଭାବିକ ହେବ।
